ADİU-nun bir qrup əməkdaşına mükafatlar təqdim olundu

Sentyabrın 29-da Azərbaycan Dövlət İqtisad Universitetində Azərbaycan təhsilinin inkişafında xidmətlərinə görə bu ali təhsil ocağının bir qrup əməkdaşına "Şöhrət" ordeni, "Tərəqqi" medalı və "Əməkdar müəllim" fəxri adlarının verilməsi ilə əlaqədar təqdimat mərasimi keçirildi. Tədbiri giriş sözü ilə təhsil naziri Misir Mərdanov açaraq ilk öncə tədbir iştirakçılarını salamladı. Sonra Azərbaycan Respublikasının Prezidenti İlham Əliyevin 26 sentyabr 2011-ci il tarixli sərəncamları ilə Azərbaycan Dövlət İqtisad Universitetinin bir qrup əməkdaşının fəxri adlarla təltif olunmasını ölkə başçısının təhsil işçilərinə göstərdiyi diqqət və qayğı kimi dəyərləndirdi.

Tədbirdə universitetin bir qrup əməkdaşına "Şöhrət" ordenini, "Tərəqqi" medalını və "Əməkdar müəllim" fəxri adlarının vəsiqələrini təqdim edən nazir, həm də yüksək ixtisaslı iqtisadçı kadrların hazırlanması sahəsində uzun müddət səmərəli elmi-pedaqoji fəaliyyətinə görə və universitetin 80 illik yubileyi münasibətilə universitetin digər əməkdaşlarına Təhsil Nazirliyinin "Azərbaycan Respublikası qabaqcıl təhsil işçisi" döş nişanlarını və fəxri fərmanlarını verdi.

Təhsil naziri çıxışının sonunda Azərbaycanın bütün təhsil işçiləri adından Azərbaycan Dövlət İqtisad Universitetinin 80 illik yubileyi münasibətilə universitetin professor-müəllim heyətini təbrik etdi və onlara daha böyük uğurlar arzuladı.

Şakir CƏFƏROV

Azərbaycan müəllimi.- 2011.- 30 sentyabr.- S.3.