Fənn olimpiadalarının ikinci turu keçirilib

Təhsil Nazirliyinin müvafiq əmrinə əsasən, yanvarın 9-da respublika fənn olimpiadalarının rayon (şəhər) mərhələsinin ikinci turu keçirilib. Bakı Şəhəri üzrə Təhsil İdarəsindən aldığımız məlumata görə, bu turda paytaxtın ümumtəhsil məktəblərinin 1000-ə yaxın şagirdi iştirak edib. Onlar şəhər mərhələsinin I turunda fərqlənənlərdir.

Qeyd edək ki, olimpiadanın noyabrın 13-də keçirilmiş ilk mərhələsində 120 min, dekabrın 5-də keçirilmiş II mərhələsinin I turunda isə 10 minə yaxın şagird iştirak etmişdir.

IX-XI siniflərin şagirdləri şəhər mərhələsinin II turunda 7 fənn - Azərbaycan dili və ədəbiyyat, Azərbaycan tarixi, riyaziyyat, fizika, kimya, biologiya, informatika üzrə biliklərini sınayıblar. İkinci turda məktəblilər kimya və biologiya üzrə 8, Azərbaycan dili və ədəbiyyat, Azərbaycan tarixi fənləri üzrə 23 nömrəli məktəblərdə, riyaziyyat, fizika və informatikadan isə 160 nömrəli klassik gimnaziyada yarışıblar.

Qeyd edək ki, nəticələr yanvarın 25-nə kimi müəyyənləşdirilib Təhsil Nazirliyinə təqdim ediləcək. Məktəblilərin fənn olimpiadasının respublika turunun isə mart ayında keçirilməsi nəzərdə tutulub. Onu da nəzərə çatdıraq ki, bilik yarışının respublika turunda qalib gələcək XI sinif şagirdləri Təhsil Nazirliyinin qərarı ilə mərkəzləşdirilmiş test imtahanından azad ediləcəklər.

Y.ƏLİYEV

Azərbaycan müəllimi.- 2011.- 14 yanvar.- S.1.