ADU-da Misir səfiri ilə görüş keçirilib

Yanvarın 21-də ADU-nun rektoru, millət vəkili, professor Səməd Seyidov Misir Ərəb Respublikasının ölkəmizdəki səfiri, cənab Sabir Əbdülqadir Mənsuru qəbul etdi. Qonağı salamlayan rektor yeni tədris ilindən 10 azərbaycanlı tələbənin ADU-da ərəbşünaslıq ixtisası üzrə təhsil alacağını diqqətə çatdırdı. Ərəbşünaslıq ixtisasının 2011-2012-ci dərs ilindən tədrisinin məqsədəuyğun hesab edildiyini bildirdi. Həmçinin gələcəkdə ərəb filologiyası ixtisasının açılması və bu sahədə mütəxəssislərin hazırlanması barədə də fikirlərini söylədi.

Professor S. Seyidov bütün bunlarla yanaşı, həm də universitetdə fəaliyyət göstərən mərkəzlər barədə söz açaraq bu sahədə kifayət qədər təcrübənin olduğunu vurğuladı. O, açılması nəzərdə tutulan Ərəb Mərkəzinin bü gün ərəb dövlətlərinin mədəniyyətlərini, tarixini özündə əks etdirməsini vacib saydığını dedi.

Sonra səfir Sabir Əbdülqadir Mənsur ərəb mədəniyyətinin tanıdılması üçün məşhur alimlərin əsərlərinin Azərbaycan dilinə tərcüməsindən və bu sahədə aparılan işlərin vacibliyindən danışdı. O bildirdi ki, ikitərəfli münasibətlərin inkişafında elm və təhsil sahəsində əməkdaşlığın xüsusi rol oynadığı danılmazdır və universitetə bu sahədə dəstək verməyə hazır olduqlarını vurğuladı. Bu baxımdan tərəflər Ərəb Mərkəzinin müxtəlif lazımi elmi-metodik materiallarla təmin edilməsi, Misirdən müəllimlərin, mütəxəssislərin dəvəti məsələlərini də müzakirə etdilər.

Şakir CƏFƏROV

Azərbaycan müəllimi.- 2011.- 28 yanvar.- S.5.