"Bizim uşaq dünyamız" adlı hesabat tədbiri

Aprelin 10-da Heydər Əliyev Sarayında Nizami Rayon Uşaq-Gənclər Yaradıcılıq Mərkəzinin "Bizim uşaq dünyamız" adlı musiqili hesabat tədbiri keçirildi. Tədbirdə Azərbaycan Respublikası təhsil nazirinin müavini Qulu Novruzov, Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, Bakı Şəhər İcra Hakimiyyəti başçısının müavini Fidumə Hüseynova, Nizami Rayon İcra Hakimiyyətinin başçısı Tahir Budaqov, millət vəkilləri Fəttah Heydərov, Hadi Rəcəbli, Sədaqət Vəliyeva, Aydın Mirzəzadə, Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov və b. iştirak edirdilər.

Öncə mərkəzin fəaliyyəti barədə film nümayiş olundu. 1800-ə yaxın uşaq, yeniyetmə və gəncin burada 32 adda dərnəkdə öz asudə vaxtlarını səmərəli və faydalı keçirdikləri və uşaqların dünyagörüşlərinin formalaşdırılması, məlumat dairələrinin genişləndirilməsi, istedad və bacarıqlarının üzə çıxarılması məqsədilə müxtəlif mədəni-kütləvi tədbirlərin təşkil olunduğu diqqətə çatdırıldı. Vurğulandı ki, mərkəzin 38 illik fəaliyyəti ərzində yeniyetmələr rayon, şəhər, respublika, hətta beynəlxalq səviyyəli uşaq tədbirlərində böyük uğurlar qazanıblar.

Aparıcılar Lalə Sultanlı və uşaqların sevimlisi Kamran İsrafilov tədris ili ərzində mərkəzin gördüyü işlərdən və qazandığı nailiyyətlərdən bəhs etdilər. Sonra səhnədə ayrı-ayrı dərnəklərin üzvləri məharətlərini göstərdilər. Balaca istedadlar "Şirinlər", "Balaca aşpazlar", "Sehrli otaq" rəqs qrupunun, "Şən sirk", "Çiçəyim" uşaq teatr studiyasının üzvlərinin çıxışları tamaşaçıları məmnun etdi. Dünya uşaqları ilə dostluq edən, onların incəsənət və mədəniyyətini öyrənən, beynəlxalq festivallarda, bayram və şənliklərdə, müsabiqə və sərgilərdə Azərbaycanımızı təmsil edən yeniyetmələr milli və dünya xalqlarının rəqslərini məharətlə ifa etdilər. Sonra dərnəklərin nailiyyətlərini əks etdirən fotoslaydlar monitorda göründü. Mərkəzin nümayəndə heyəti Amerika Birləşmiş Ştatlarının Vaşinqton şəhərində olarkən "Ən çox sevdiyim idman növü" mövzusunda keçirilən IV Beynəlxalq Uşaq İncəsənət Festivalında qalib gələn və I yeri tutan 12 yaşlı Nərmin İsmayılzadə və gənc fototurist dərnəyinin üzvü Şamil Quluzadənin uğurlarından söz açıldı.

Tədbirin sonunda qonaqlar mərkəzin yaradıcı heyətinə öz təşəkkürlərini və xoş arzularını bildirib, bütün çıxışlardan məmnun qaldıqlarını ifadə etdilər.

Təhsil nazirinin müavini Qulu Novruzov yeniyetmələrin cəsarətli, olduqca maraqlı, orijinal, rəngarəng çıxışlarını illik hesabat kimi dəyərləndirərək alqışladı və Təhsil Nazirliyinin diplomunu Nizami Rayon Uşaq-Gənclər Yaradıcılıq Mərkəzinin direktoru Lalə Qətiyə təqdim etdi.

Sifai SƏFƏROVA

Azərbaycan müəllimi.- 2012.- 13 aprel.- S.3.