"Narkotiklərə yox deyək!" devizi altında kampaniyaya start verildi

Aprelin 11-də Bakıdakı akademik Zərifə Əliyeva adına liseydə Azərbaycan Respublikası Təhsil Nazirliyi və Səhiyyə Nazirliyinin birgə təşəbbüsü ilə "Narkotiklərə yox deyək!" devizi altında kampaniyaya start verildi. Kampaniya gənclərin narkomaniyanın zərəri barədə məlumatlandırılması və onlarda sağlam həyat tərzinin formalaşdırılması məqsədini daşıyırdı. Tədbirdə təhsil nazirinin müavini Qulu Novruzov, səhiyyə nazirinin müavini Elsevər Ağayev, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun rəhbəri Araz Əliquliyev, Respublika Narkoloji Mərkəzinin direktoru Telman Məmmədhəsənov, Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov, akademik Zərifə Əliyeva adına liseyin direktoru Məhəbbət Vəliyeva, liseyin müəllim-şagird kollektivi və digər şəxslər iştirak edirdilər. Tədbir Azərbaycan Respublikası Prezidentinin 28 iyun 2007-ci il tarixli 2271 nömrəli sərəncamı ilə təsdiq edilmiş "Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə üzrə Proqram (2007-2012-ci illər)"dan irəli gələn vəzifələrin yerinə yetirilməsi məqsədilə həyata keçirilir. Öncə iştirakçılar liseyin foyesində təşkil olunmuş "Narkotiklərə yox deyək!" devizi altında çəkilmiş rəsmlərə baxdılar.

Tədbiri giriş sözü ilə açan akademik Zərifə Əliyeva adına liseyin direktoru Məhəbbət Vəliyeva qonaqları salamlayaraq, belə bir tədbirin akademik Zərifə Əliyeva adına liseydə keçirilməsinin qürurverici olduğunu və şagirdlərin gələcək həyatlarına müsbət təsir edəcəyini vurğuladı. Şagirdlərə tədbirin təkcə iştirakçısı kimi deyil, həm də maarifləndirmə işində gənclər arasında təkanverici qüvvə kimi fəaliyyətlərinin əhəmiyyətini bildirən M.Vəliyeva narkomaniyaya qarşı mübarizənin hər bir Azərbaycan vətəndaşı tərəfindən aparılmasının vacibliyini qeyd etdi.

Tədbirdə çıxış edən təhsil nazirinin müavini Qulu Novruzov Təhsil Nazirliyi və Səhiyyə Nazirliyinin birgə təşəbbüsü ilə orta ümumtəhsil məktəblərində narkomaniyaya və narkotik vasitələrin qanunsuz dövriyyəsi ilə bağlı "Narkotiklərə yox deyək!" devizi altında keçirilən maarifləndirmə kampaniyasına, ömrünü insanların sağlam həyat tərzində yaşamasına həsr edən görkəmli oftalmoloq, akademik Zərifə xanım Əliyevanın adını daşıyan liseydə start verilməsinin simvolik məna daşıdığını söylədi. Nazir müavini bildirdi ki, lisey şagirdlərə sağlam həyat tərzinin aşılanmasında ölkəmizdə ən nümunəvi təhsil müəssisələrindəndir. Narkomaniyaya və narkotik vasitələrin qanunsuz dövriyyəsinə qarşı mübarizənin dövlət siyasətinin ayrılmaz tərkib hissəsi olduğunu bildirən Q.Novruzov mövcud problemlə bağlı həyata keçirilən dövlət proqramlarından danışdı. Nazir müavini narkomaniya ilə mübarizədə ən effektiv vasitələrdən biri kimi maarifləndirmə tədbirlərinin həyata keçirilməsinin vacibliyini vurğuladı. Gənclərin pis vərdişlərdən uzaq olması və sağlam həyat tərzi keçirmələri üçün məktəbdənkənar müəssisələrə maraq göstərmələrinin müsbət nəticə verəcəyini bildirən Q.Novruzov narkomaniyaya qarşı mübarizədə gənclərin üzərinə böyük vəzifə düşdüyünü və Azərbaycan gəncinin bu vəzifənin öhdəsindən məharətlə gələ biləcəyinə ümidvar olduğunu söylədi.

Tədbirdə çıxış edən səhiyyə nazirinin müavini Elsevər Ağayev, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun rəhbəri Araz Əliquliyev və başqaları narkotiklərin qeyri-qanuni dövriyyəsi və istifadə miqyasının genişlənməsinin ciddi təhlükə yaradan amilə çevrildiyini qeyd edib, bu bəşəri bəlaya qarşı mübarizə tədbirlərindən danışdılar.

Sonra iştirakçılar slaydlar vasitəsilə narkomaniyanın törətdiyi fəsadlar və bəşəriyyətə verdiyi ziyanlar haqqında təqdimatı dinlədilər.

Şagirdləri maraqlandıran suallar cavablandırıldı.

Niyazi RƏHİMOV

Azərbaycan müəllimi.- 2012.- 13 aprel.- S.2.