Öz sənətinin fədaisi

Elm adamının ağlı bəşəriyyətin yolunu işıqlandırır, qabiliyyəti və zəkası insanın qüdrətini artırıb, onu yenilməz edir, təbiətin sirləri labirintində daim məşəl yandırır. Belələri ilə ünsiyyətdə olmaq böyük xoşbəxtlikdir. Bu xoşbəxtlikdən pay almaq üçün yolumuzu ali təhsilimizin avanqardı olan Bakı Dövlət Universitetinin mexanika-riyaziyyat fakültəsinin ali riyaziyyat kafedrasına saldıq. Kafedranın dosenti Sarvan Hüseynovla görüşdük. Bəri başdan deyək ki, bu gün bu ali təhsil ocağının auditoriyaları, laboratoriyaları adama geniş elmi-tədqiqat institutlarını xatırladır.

Qızğın müzakirələr, elmi-diskussiyalar, şəffaf, obyektiv imtahan prosesi insanın qəlbini qürur hissi ilə doldurur.

Ölkəmizdə elm, təhsil sahəsində həyata keçirilən uğurlu islahatlar nəticəsində, həmçinin BDU-nun rəhbərliyi, xüsusilə rektor, akademik Abel Məhərrəmovun gərgin əməyi sayəsində burada elmi tədqiqat işləri, səmərəli pedaqoji fəaliyyət, intellektual kadr hazırlığı üçün geniş imkanlar yaranıb. Elmi-tədqiqat laboratoriyaları regionda analoqu olmayan ən müasir cihazlarla təchiz edilib. Bütün bunlardan bəhs etdikcə qəlbi elm, təhsil sevgisi ilə çırpınan Sarvan Hüseynov ilə daha yaxından tanış olmaq, onu həm də oxucularımıza tanıtdırmaq qərarına gəldik.

Sarvan müəllim 1971-ci il mayın 22-də Qərbi Azərbaycanın Qafan rayonunun Keypəşin kəndində anadan olub. Orta məktəbi həmin rayonun Pəyhan kəndində bitirib. Sonra Bakı Dövlət Universitetinin mexanika-riyaziyyat fakültəsinə daxil olub. 1989-91-ci illərdə orduda xidmət edib. Tələbəlik illərindən çalışqanlığı, geniş erudisiyası, savadı ilə müəllimlərin diqqətini çəkən S.Hüseynov 1998-ci ildən bu klassik elm, təhsil məbədində bir vaxtlar ona dərs deyən müəllimlərilə çiyin-çiyinə çalışır. Respublikamızın tanınmış riyaziyyatçı alimlərindən-professorlar Ələddin Şəmilov, Qəmbər Namazov, Sabir Mirzəyev, Kazım Həsənov və başqaları Sarvan müəllimdən razılıq hissi ilə danışırlar.

Sarvan Hüseynov hələ tələbəlik illərindən riyaziyyatın çətin, "qarlı aşırımlarla" dolu yollarında ilk kövrək addımlarını ataraq maraqlı mövzularla bağlı elmi tədqiqat işləri aparmaq arzusuyla yaşayırdı. Məhz bu maraq və istedad onu AMEA-nın Riyaziyyat və Mexanika İnstitutunun aspiranturasına gətirib çıxarır.

Deyirlər zəhmət və istedad qoşa qanaddır. Məhz bu iki amil Sarvan müəllimin fəaliyyətində bir vəhdət təşkil edir. O, qısa müddətdə AMEA-nın müxbir üzvü, respublikamızın tanınmış riyaziyyatçılarından olan, mərhum İlham Məmmədovun rəhbərliyi altında "Qeyri-müntəzəm qüvvətüstlə cırlaşan ikinci tərtib divergent elliptik tənliklərin həllərinin keyfiyyət xassələri" mövzusunda dissertasiya müdafiə etmiş, fizika-riyaziyyat üzrə fəlsəfə doktoru alimlik dərəcəsi almışdır. Sonra BDU-da kiçik elmi işçi, 2001-2003-cü illərdə müəllim, 2003-cü ildən dosent kimi fəaliyyət göstərir. Həmişə elmi axtarışlarını davam etdirən, elmin ən uca zirvəsini fəth etməyə səy göstərən istedadlı və zəhmətsevər alim bu gün doktorluq dissertasiyası üzərində işləyir.

Sarvan müəllimin apardığı dərslərin əhatə dairəsi genişdir: ali riyaziyyat, xətti cəbr, ehtimal nəzəriyyəsi və xüsusi törəməli tənliklər. O, 36 elmi məqalənin və bir dərs proqramının müəllifidir. Müxtəlif beynəlxalq simpozium və konfranslarda iştirak edərək respublikamızı ləyaqətlə təmsil etmişdir. 2004-cü ildə Riyaziyyat və Mexanika İnstitutunun 45 illiyinə həsr olunmuş riyaziyyat və mexanika üzrə X beynəlxalq konfrans, 2005-ci ildə AMEA-nın müxbir üzvü, professor İ.T.Məmmədovun anadan olmasının 50 illiyinə həsr olunmuş beynəlxalq konfrans, yenə həmin ildə Rusiyanın Samara vilayətində diferensial tənliklər və onların tətbiqi Ümumrusiya elmi konfransı, 2008-ci ildə REA-nın müxbir üzvü, professor L.D.Kudryavsevin 85 illiyinə həsr olunmuş III beynəlxalq konfrans, həmin ildə Naxçıvanda təşkil olunmuş riyaziyyat və texnika elmləri üzrə beynəlxalq konfransda etdiyi çıxışlar maraqla qarşılanmışdır.

Sarvan müəllimin "Müntəzəm və qeyri-müntəzəm cırlaşan ikinci tərtib divergent elliptik tənliklər" üçün Dirixle məsələsi, Harnak bərabərsizliyi, Hölder kəsilməzliyindən bəhs edən əsərləri vardır.

S.Hüseynov tələbəlik yollarında ilk kövrək addımlarını atan, köməyə, şəfqətə ehtiyacı olan tələbələrinə dərsdən sonra təmənnasız olaraq kömək edir, problemlərin həlli yollarını göstərir. Məhz buna görə də tələbələri onu elmi-tədqiqat laboratoriyasında, ya da auditoriyada, sözün həqiqi mənasında, əsl müəllim kimi görür, qəbul edirlər. Sarvan müəllim üçün auditoriya müqəddəs məkandır, tələbələri isə müstəqil Azərbaycanımızın gələcək taleyində (həm də tarixində) xüsusi rol oynayacaq şəxsiyyətlərdir.

Müqəddəs müəllim sənətinə qəlbən, ruhən bağlı olan Sarvan Hüseynovun bir amalı var: Bu sənətə vurğunluğu ictimai borc səviyyəsinə yüksəltmək. Biz də bu istedadlı alimə, zəhmətsevər pedaqoqa elmimizin, təhsilimizin tərəqqisi yolunda yeni yaradıcılıq uğurları arzulayırıq.

Zahid RZA

Azərbaycan müəllimi.- 2012.- 20 aprel.- S.7.