Təhsil naziri Türkdilli Dövlətlərin Əməkdaşlıq Şurasının baş katibi ilə görüşüb

Aprelin 18-də təhsil naziri Misir Mərdanov Türkdilli Dövlətlərin Əməkdaşlıq Şurasının baş katibi Xəlil Akıncı ilə görüşüb.

Qonağı səmimi salamlayan nazir onu Təhsil Nazirliyində görməyindən məmnunluq hissi keçirdiyini bildirdi. 2009-cu ildə beynəlxalq qeyri-hökumət təşkilatı kimi yaradılan Türkdilli Dövlətlərin Əməkdaşlıq Şurasının türkdilli ölkələrin bir sıra sahələr üzrə əməkdaşlığının genişlənməsi və möhkəmlənməsində əhəmiyyətli rolundan söz açan təhsil naziri xüsusilə xalqlarımızın daha da yaxınlaşması üçün təhsillə bağlı əlaqələrinin dərinləşdirilməsinin vacibliyini diqqətə çatdırdı. Qeyd olundu ki, Azərbaycanla Türkiyə arasında bütün istiqamətlərdə qurulmuş əlaqələr uğurla inkişaf edir. Hər iki ölkənin təhsil sahəsində əməkdaşlığını yüksək qiymətləndirən nazir Misir Mərdanov hazırda 4000-dən çox azərbaycanlı gəncin Türkiyənin nüfuzlu universitetlərində, 3000-dən artıq türkiyəli tələbənin isə Azərbaycanın ali təhsil müəssisələrində oxuduğunu bildirdi. Ölkəmizdə Azərbaycan-Türkiyə Özəl Liseyləri, Qafqaz Universiteti, "Araz" hazırlıq kursları,Türkiyə Dəyanət Vəqfi Bakı Türk Liseyi və digər təhsil müəssisələrinin fəaliyyətindən razılıq hissi ilə söz açan təhsil naziri onlara hər cür şəraitin yaradıldığını söylədi. Nazir ümumi təhsil sahəsində mövcud əməkdaşlığın daha səmərəli təşkili üçün ortaq dərsliklərin hazırlanmasının aktual və vacib bir məsələ olduğunu və hər iki ölkənin müvafiq mütəxəssisləri arasında bu istiqamətdə müzakirələrin aparılmasının zəruriliyini diqqətə çatdırdı.

Türkdilli Dövlətlərin Əməkdaşlıq Şurasının baş katibi Xəlil Akıncı səmimi qarşılandığına görə təhsil naziri Misir Mərdanova minnətdarlıq etdi. Rəhbərlik etdiyi qurumun fəaliyyəti və gördüyü işlər barədə ətraflı məlumat verən Xəlil Akıncı hər bir millətin inkişafında təhsilin və elmin önəmli yer tutduğunu söylədi. Qonaq quruma daxil olan ölkələrin bütün istiqamətlərdə, xüsusilə təhsil sahəsində əlaqələrinin inkişafı ilə bağlı həyata keçirilməsi nəzərdə tutulan tədbirlərdən söz açaraq qarşılıqlı əməkdaşlığın genişləndirilməsinin zəruri olduğunu qeyd etdi.

Türk xalqlarının ortaq əlifbasının və dilinin qəbul olunması məsələsinə də toxunan Xəlil Akıncı bununla bağlı fikir və mülahizələrini söylədi. Türkdilli Dövlətlərin Əməkdaşlıq Şurasına üzv ölkələrin təhsil nazirlərinin görüşünün keçirilməsinin nəzərdə tutulduğunu söyləyən baş katib bunun türkdilli ölkələrin elm və təhsilinin inkişafına müsbət təsir göstərəcəyinə, müvafiq təkliflərlə bağlı ortaq bir fikrə gəlməyə imkan verəcəyinə ümidvar olduğunu bildirdi.

Görüşdə daha sonra türkdilli ölkələr arasında təhsil sahəsində əlaqələrin möhkəmlənməsi işinin daha səmərəli təşkili, qarşılıqlı maraq doğuran bir sıra digər məsələlər ətrafında da geniş fikir mübadiləsi aparıldı.

Sonda Türkdilli Dövlətlərin Əməkdaşlıq Şurasının baş katibi Xəlil Akıncıya xatirə hədiyyələri təqdim olundu.

Samirə KƏRİMOVA

Azərbaycan müəllimi.- 2012.- 20 aprel.- S.2.