Azərbaycan Memarlıq və İnşaat Universitetində Professor Ənvər Qasımzadənin 100 illik yubileyinə həsr olunmuş konfrans keçirilib

Aprelin 19-da Azərbaycan Memarlıq və İnşaat Universitetində Azərbaycanın görkəmli memarı və dövlət xadimi, memarlıq doktoru, professor, AMEA-nın müxbir üzvü Ənvər Əli oğlu Qasımzadənin anadan olmasının 100 illik yubileyinə həsr edilmiş "Müasir Azərbaycan memarlığının problemləri" adlı elmi-praktik konfrans keçirildi.

Konfransı giriş sözü ilə AzMİU-nun rektoru, professor Gülçöhrə Məmmədova açaraq böyük şəxsiyyət, dövlət xadimi olan Ənvər Qasımzadənin həyat və yaradıcılığı haqqında danışdı. İki bölmə üzrə aparılacaq konfrans barədə tədbir iştirakçılarına məlumat verildi.

"Akademik Ə.Ə.Qasımzadənin həyat və yaradıcılığı" adlı geniş məruzə ilə memarlıq üzrə fəlsəfə doktoru, AzMİU-nun beynəlxalq əlaqələr üzrə prorektoru Nərgiz Abdullayeva çıxış etdi.

Konfransda çıxış edən təhsil naziri Misir Mərdanov görkəmli memar Ənvər Qasımzadənin mənalı həyat yolundan geniş söhbət açaraq 57 il ömür sürən bu insanın necə böyük işlər, layihələr həyata keçirdiyini qeyd etdi. Bildirildi ki, bu nəslin şəcərəsi çox böyükdür. Bu barədə gənc nəslə geniş məlumat çatdırmaq lazımdır. Ənvər Qasımzadənin Azərbaycan xalqının qəlbində tanınmış ictimai xadim, görkəmli memar, xeyirxah, vətənpərvər və təvazökar insan kimi yeri əbədidir.

Nazir çıxışının sonunda Ənvər Qasımzadənin 100 illik yubileyi münasibəti ilə keçirilən tədbirin təşkilatçılarının əməyini yüksək dəyərləndirdi.

Tədbirdə daha sonra professor Nurqələm Mikayılov, professor Rəhim Şükürov, texnika elmləri namizədi, dosent Rizvan Allahverdiyev çıxış edərək Ənvər Qasımzadə haqqında xatirələrini danışdılar.

Konfransda həmçinin müxtəlif beynəlxalq müsabiqələrdə qalib gəlmiş gənc memarlara diplomlar və hədiyyələr təqdim olundu.

Sonda tədbir iştirakçıları Ənvər Qasımzadənin həyat və yaradıcılığına həsr edilmiş filmə baxdılar.

Ədalət DAŞDƏMİRLİ

Azərbaycan müəllimi.- 2012.- 20 aprel.- S.2.