İstedadlı şagirdlər üçün xüsusi lisey siniflərinə şagird qəbulunun aparılması barədə

Azərbaycan Respublikası təhsil nazirinin əmri

Azərbaycan Respublikasının Prezidenti cənab İlham Əliyevin 17.04.2006-cı il tarixli, 1414 nömrəli sərəncamı ilə təsdiq olunmuş "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı"ndan irəli gələn konseptual xarakterli göstərişlərini rəhbər tutaraq respublikanın şəhər və rayonlarında istedadı ilə fərqlənən V, VI və VII sinif şagirdlərinin xüsusi lisey siniflərinə qəbulunun obyektiv və şəffaf keçirilməsini təmin etmək məqsədilə

ƏMR EDİRƏM:

1. Bölgələr üzrə müəyyən olunmuş şəhər və rayonların qeyd edilən təhsil müəssisələrinin bazasında xüsusi istedadı ilə fərqlənən şagirdlərin xüsusi lisey siniflərinə qəbulu ilə bağlı sənəd qəbulu 01.08.2012-ci il tarixindən 31.08.2012-ci il tarixinədək, müsahibə və qiymətləndirmə isə 07-08 sentyabr 2012-ci il tarixlərində aşağıdakı məktəblərdə keçirilsin:

- Gəncə şəhəri 27 nömrəli fizika-riyaziyyat və informatika təmayüllü lisey

- Sumqayıt şəhəri təbiət elmləri təmayüllü gimnaziya

- Mingəçevir şəhəri İ.Qayıbov adına 10 nömrəli tam orta məktəb

- Şirvan şəhəri S.Hüseynov adına 1 nömrəli tam orta məktəb

- Lənkəran şəhəri S.Kazımbəyov adına şəhər 6 nömrəli tam orta məktəb

- Şəki şəhəri 19 nömrəli tam orta məktəb

- Quba rayonu A.Məmmədov adına təbiət fənləri təmayüllü 2 nömrəli məktəb-lisey

- Ağdaş rayonu S.Vurğun adına şəhər 1 nömrəli tam orta məktəb

2. İstedadlı şagirdlərin xüsusi lisey siniflərinə şagird qəbulunu Monitorinq və qiymətləndirmə şöbəsi (T.Hacıyeva) həyata keçirsin.

3. Xüsusi lisey siniflərinə şagird qəbulu Azərbaycan dili və riyaziyyat fənləri üzrə ümumi sayı 50 sual olmaqla qiymətləndirmə vasitələri əsasında keçirilsin.

4. Gəncə şəhər Tİ, Sumqayıt, Mingəçevir, Şirvan şəhər və Lənkəran, Şəki, Quba, Ağdaş rayon təhsil şöbələrinə (Z.Hüseynov, V.Bağırov, N.Sultanov, P.Nəbiyev, Ş.Əhmədova, S.İsmayılova, S.Aslanov, L.Paşayev) tapşırılsın:

4.1. 07.09.2012-ci il tarixində müsahibə komissiyalarının fəaliyyətini təşkil etsinlər;

4.2. müraciət etmiş V, VI və VII sinif şagirdlərinin 07.09.2012-ci il tarixində saat 10.00-dan başlamaqla keçiriləcək müsahibədə iştirakını təşkil etsinlər;

4.3. müsahibədən keçmiş şagirdlərin 08.09.2012-ci il tarixində saat 10.00-da qiymətləndirmədə iştirakını təmin etsinlər.

5. İqtisadiyyat şöbəsi (Ş.Əliyev) qiymətləndirmə vasitələrinin çap olunması ilə bağlı smeta sənədlərinin hazırlanmasını təmin etsin.

6. İctimaiyyətlə əlaqə şöbəsi (B.Hüseynzadə) əmrin "Azərbaycan müəllimi" qəzetində və "Təhsil xəbərləri" məcmuəsində dərc olunmasını həyata keçirsin.

7. Əmrin icrasına nəzarəti öz üzərimdə saxlayıram.

Misir MƏRDANOV,

Azərbaycan Respublikasının təhsil naziri

9 avqust 2012-ci il

Azərbaycan müəllimi.- 2012.- 31 avqust.- S.2.