Gənc bəstəkar beynəlxalq müsabiqənin finalında iştirak etmək hüququ qazanıb

Gənc azərbaycanlı bəstəkar Türkər Qasımzadə ABŞ-ın Massaçusets ştatının Boston şəhərində keçirilən bəstəkarların ənənəvi 30-cu Beynəlxalq "ALEA III" müsabiqəsinin finalına vəsiqə qazanıb.

200-dən çox müraciət daxil olmasına baxmayaraq, yalnız 6 ölkə -ABŞ, Azərbaycan, İngiltərə, Avstriya, Fransa və Yunanıstan müsabiqənin finalında iştirak etmək hüququnu əldə edib.

Dünyanın mötəbər musiqi yarışmalarından biri hesab olunan "ALEA III" 1980-ci ildən keçirilir. Müsabiqənin keçirilməsində əsas məqsəd bəstəkarların yeni və müasir üslubda musiqi yaradıcılığına dəstək verməkdir.

Müsabiqənin final mərhələsinə vəsiqə qazanmış bəstəkarların əsərlərini dünyaca məşhur dirijor Teodor Antonionun rəhbərlik etdiyi ansambl səsləndirəcəkdir.

Üzeyir Hacıbəyli adına Bakı Musiqi Akademiyasının məzunu Türkər Qasımzadə beynəlxalq müsabiqənin bu ilin oktyabrında təşkil ediləcək final konsertində "Qurama" əsərini amerikalı musiqisevərlərə təqdim edəcəkdir.

Qeyd edək ki, azərbaycanlı gənc bəstəkar 2011-ci ildə Manhetten Musiqi Akademiyasında magistr dərəcəsi alıb. Hazırda Türkər Heydər Əliyev Fondunun dəstəyi ilə ABŞ-ın musiqi sahəsində ən qabaqcıl və nüfuzlu ali təhsil müəssisələrindən biri sayılan Ohayo ştatında yerləşən Sinsinati Konservatoriyasında bəstəkarlıq üzrə doktorluq təhsilini davam etdirir.

Gənc bəstəkarın əsərləri ABŞ, İsveçrə, İtaliya, Avstraliya və Latviyada keçirilmiş müxtəlif müsabiqələrin ən yüksək mükafatlarına layiq görülmüşdür.

Samirə KƏRİMOVA

Azərbaycan müəllimi.- 2012.- 31 avqust.- S.7.