Şagirdlər İKT biliklərinə dərindən yiyələnirlər

"2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində paytaxtın ümumtəhsil müəssisələrində bir çox işlər görülmüş, uğurlu layihələr həyata keçirilmişdir.

Bakıdakı 61 nömrəli tam orta məktəbin direktoru Zenfira Şıxəliyeva bildirdi ki, istənilən sahəyə çox asanlıqla nüfuz edən İKT-nin dərindən mənimsənilməsi informasiya cəmiyyətinin əsas tələblərindəndir. Qeyd olundu ki, təhsil ocağında 3 informatika otağı yaradılmış və bu otaqlarda 50 kompüter quraşdırılmışdır. Məktəb mərkəzləşdirilmiş İnternet şəbəkəyə qoşulub. İnformatika və digər fənn müəllimləri I-XI siniflərdə dərslərini informatika otaqlarında keçirlər.

242 nömrəli tam orta məktəbin direktoru Akif Rəsulov söylədi ki, burada İKT-nin tətbiqinə geniş yer verilib. Bu məqsədlə təhsil ocağında İKT ilə bağlı bir sıra tədbirlər həyata keçirilmişdir. Belə ki, İKT-dən bacarıqla istifadə edən müəllimlərin iş təcrübəsi yayılmış və İKT biliklərini artırmaq məqsədilə siniflərarası yarışlar təşkil edilmişdir. Nəticədə şagirdlər arasında İKT-yə həvəs əvvəlki illərlə müqayisədə xeyli artmışdır.

250 nömrəli tam orta məktəbin direktoru Nazim Adıgözəlov da məktəbin İnternet şəbəkəyə qoşulduğunu dedi. Bildirdi ki, məktəbdə işləyən müəllimlərin əksəriyyəti İKT biliklərinə dərindən yiyələnmək üçün kurslardan keçib. Bu gün fənn müəllimlərinin dərslərdə İKT-dən bacarıqla istifadə etməsi sayəsində şagirdlər İKT biliklərinə dərindən yiyələnirlər.

Şakir CƏFƏROV

Azərbaycan müəllimi.- 2012.- 14 dekabr.- S.4.