Respublika müsabiqəsinin qalibləri mükafatlandırıldı

Dekabrın 26-da Təhsil Nazirliyində Uşaq-Gənclər İdman və Şahmat məktəbləri, müəllim və idmançılar arasında 12 nominasiya üzrə keçirilmiş Respublika müsabiqəsi qaliblərinin mükafatlandırılması mərasimi keçirildi.

Mərasimi təhsil naziri Misir Mərdanov açaraq öncə iştirakçıları 31 dekabr - Dünya Azərbaycanlılarının Həmrəylik Günü və Yeni il bayramı münasibəti ilə təbrik etdi və onlara gələcək fəaliyyətlərində uğurlar arzuladı.

Təhsil Nazirliyində hər ilin sonunda idman nailiyyətlərini qeyd edib fərqlənən idman məktəbləri və idmançıların mükafatlandırılmasının artıq ənənəyə çevrildiyini qeyd edən nazir növbəti belə bir mərasimə yığışdıqlarını bildirdi.

İnsanların sağlamlığı və idmanın dövlət üçün mühüm əhəmiyyət kəsb edən məsələlərdən biri olduğunu nəzərə çatdıran Misir Mərdanov məhz buna görə də ümummilli lider Heydər Əliyevin idmanın inkişafına həmişə yüksək diqqət və qayğı ilə yanaşdığını, bu ənənənin hazırda ölkə Prezidenti cənab İlham Əliyev tərəfindən uğurla davam etdirildiyini vurğuladı. Qeyd etdi ki, ölkədə idmana göstərilən diqqət və qayğının nəticəsidir ki, son illər Azərbaycan idmançıları beynəlxalq yarışlarda böyük uğurlar əldə edirlər. Ölkəmizdə çoxlu sayda Avropa, dünya birincilikləri, olimpiya təsnifat turnirləri keçirilməkdədir. Bu baxımdan, Avropa Olimpiya Komitəsinin Baş Assambleyasında ilk Avropa Olimpiya Oyunlarının 2015-ci ildə Azərbaycanda keçirilməsi haqqında qərar qəbul edilməsini yüksək qiymətləndirən Misir Mərdanov bu mühüm hadisənin son illər ölkəmizin bütün sahələrdə, eləcə də idman sahəsindəki uğurları ilə əlaqələndirdi.

Azərbaycan Prezidentinin sərəncamına əsasən 2012-ci ilin ölkəmizdə "İdman ili" elan edilməsi ilə əlaqədar Təhsil Nazirliyinin tədbirlər planının təsdiq olunduğunu nəzərə çatdıran Misir Mərdanov bu müsabiqənin də həmin plana və nazirliyin müvafiq əmrinə əsasən keçirildiyini, müsabiqədə məqsədin Təhsil Nazirliyi sistemində fəaliyyət göstərən uşaq gənclər idman və şahmat məktəblərinin, həmin məktəblərdə çalışan məşqçi-müəllimlərin fəaliyyətlərini qiymətləndirmək, istedadlı idmançıları aşkar etmək və onları rəğbətləndirmək olduğunu söylədi.

Təhsil Nazirliyi tərəfindən təsdiq olunmuş müvafiq plana uyğun olaraq keçirilmiş tədbirlər barədə danışan nazir bildirdi ki, il ərzində uşaq-gənclər idman və uşaq-gənclər şahmat məktəbləri arasında 39 çempionat, birincilik, zona və seçmə yarışları, 11 respublika turniri, həmçinin beynəlxalq və respublika yarışlarına hazırlıqla əlaqədar 70 təlim-məşq toplantısı təşkil olunub. Cari ildə respublika birincilik, çempionat və kubok yarışlarında müxtəlif idman növləri üzrə 557, o cümlədən 219 qızıl, 172 gümüş, 166 bürünc medal qazanıldığını yüksək nailiyyət kimi dəyərləndirən Misir Mərdanov Avropa, dünya birinciliyi və çempionatlarında, eləcə də beynəlxalq turnirlərdə də idmançılarımızın ümumilikdə 97 medal, o cümlədən 55 qızıl, 17 gümüş və 25 bürünc medal əldə etdiklərini diqqətə çatdırdı.

Təhsil naziri çıxışında şahmat və futbolun daha da inkişaf etdirilməsi üçün ölkə Prezidentinin sərəncamları ilə təsdiq olunmuş Dövlət Proqramlarının icrası ilə bağlı görülmüş işlər, ümumi təhsil məktəblərində şahmatın tədrisi, uşaq-gənclər idman və şahmat məktəblərinin, ümumtəhsil, ilk peşə-ixtisas, orta ixtisas təhsili müəssisələrinin idmanla bağlı maddi-texniki bazasının möhkəmləndirilməsi istiqamətində atılmış addımlar barədə də ətraflı məlumat verdi. Çıxışının sonunda Misir Mərdanov müsabiqə qaliblərini təbrik edərək onlara uğurlar arzuladı, bu nailiyyətlərin davamlı olacağına inamını ifadə etdi.

Daha sonra uşaq-gənclər idman və şahmat məktəbləri, məşqçi-müəllim və idmançılar arasında 12 nominasiya üzrə təşkil olunmuş Respublika müsabiqəsinin qaliblərinin adları açıqlandı, onlara Təhsil Nazirliyinin diplomları və hədiyyələr təqdim olundu.

Mərasimdə Azərbaycan Milli Olimpiya Komitəsinin vitse-prezidenti Çingiz Hüseynzadə, gənclər və idman nazirinin müavini İsmayıl İsmayılov, Milli Məclisin deputatı Adil Əliyev, Azərbaycan Şahmat Federasiyasının vitse-prezidenti Faiq Həsənov çıxış edərək ölkə Prezidentinin idmanın inkişafına göstərdiyi diqqət və qayğıdan söz açıb, son illər bu sahədə əldə olunmuş nailiyyətlərdən danışdılar, qalibləri qazandıqları uğur münasibətilə təbrik etdilər.

Yusif ƏLİYEV

Azərbaycan müəllimi.- 2012.- 28 dekabr.- S.2.