"Akademik Həsən Əliyev və Azərbaycan təbiəti" mövzusunda elmi-praktik konfrans

Dekabrın 25-də Bakıdakı 132-134 nömrəli Təhsil Kompleksində mütəfəkkir alim, görkəmli ictimai xadim, akademik Həsən Əliyevin 105 illik yubileyi münasibətilə və məktəblilərin ekoloji maarifləndirilməsini genişləndirmək məqsədilə Azərbaycan Respublikası Təhsil Nazirliyi Respublika Ekoloji Tərbiyə və Təcrübəçilik Mərkəzi və Bakı Şəhəri üzrə Təhsil İdarəsi birlikdə "Akademik Həsən Əliyev və Azərbaycan təbiəti" mövzusunda Bakı şəhəri məktəblilərinin elmi-praktik konfransı keçirildi.

Konfransda Azərbaycan Respublikası Təhsil Nazirliyinin, Ekologiya və Təbii Sərvətlər Nazirliyinin, Fövqəladə Hallar Nazirliyinin, İDEA Ətraf Mühitin Mühafizəsi üzrə Beynəlxalq Təşəbbüsünün, BDU-nin kafedra müdirləri və professorları, QHT və KİV nümayəndələri iştirak edirdilər.

Məktəblilərin elmi-praktik konfransının əsas məqsədi akademik Həsən Əliyevin ekologiya və təbiətin mühafizəsi sahəsində zəngin irsinin öyrənilməsi, görkəmli ekoloqun humanist ideyalarının təbliğ edilməsi, məktəblilərdə ətraf mühitə qayğıkeş və məsuliyyətli münasibətin tərbiyə edilməsindən ibarət idi. Konfransın əsas vəzifələri məktəblilərin ekoloji hərəkatının genişləndirilməsi, davamlı inkişaf prinsiplərinə uyğun olaraq ətraf mühitin və təbii sərvətlərin qorunmasında onların fəal iştirakının təmin edilməsi, əhali arasında ekoloji biliklərin təbliğ edilməsi, gənc nəsildə ekoloji dünyagörüşünün və mədəniyyətin formalaşdırılmasıdır.

Elmi-praktik konfransa Bakı şəhəri orta ümumtəhsil məktəblərinin V-XI sinif şagirdləri, məktəbdənkənar təhsil müəssisələrinin dərnək üzvlərindən ibarət 50-dən artıq konfrans iştirakçısı "Azərbaycanın bioloji müxtəlifliyi və meşələrin qorunması", "Ətraf mühitin mühafizəsi və ekoloji monitorinq", "Təbii sərvətlər və davamlı inkişaf" bölmələri üzrə referatlar və yaradıcılıq işləri təqdim etmişdilər.

Həmin gün tədbir iştirakçıları əvvəlcə Bakı məktəblilərinin yaradıcılıq işlərindən ibarət sərgi ilə tanış oldular. Sonra təhsil kompleksinin akt zalında konfransın açılışı oldu. Şagirdlərin ifasında Azərbaycanın Dövlət himni oxundu.

Konfransı giriş sözü ilə açan Təhsil Nazirliyinin Tərbiyə və məktəbdənkənar müəssisələrlə iş şöbəsinin müdiri Ağababa İbrahimov iştirakçıları təhsil naziri Misir Mərdanovun adından salamlayaraq onları 31 Dekabr - Dünya Azərbaycanlılarının Həmrəylik Günü və Yeni il bayramı münasibəti ilə təbrik etdi və Dünya Azərbaycanlılarının Həmrəylik Gününün bayram kimi qeyd edilməsinin ulu öndər Heydər Əliyevin adı ilə bağlı olduğunu vurğuladı.

Bu tədbir də Təhsil Nazirliyinin keçirdiyi silsilə tədbirlərdən biridir,- deyən A.İbrahimov bildirdi ki, biz hər il "Həsən Əliyev və Azərbaycan təbiəti" mövzusunda rəsm müsabiqəsi keçiririk. Bugünkü tədbir isə Bakı şəhəri məktəblilərinin ekologiya və təbiətin qorunmasından bəhs edən yaradıcılıq işlərinə həsr olunub. Sözünə davam edən Ağababa müəllim akademik Həsən Əliyevlə bağlı xatirələrini danışdı. Sonda şagirdlərə təbiəti akademik Həsən Əliyev kimi sevməyi, qorumağı tövsiyə etdi.

Konfransda Bakı Dövlət Universitetinin ekoloji coğrafiya kafedrasının müdiri, professor Şövqi Göyçaylı və Bakı Dövlət Universitetinin ekoloji kimya kafedrasının müdiri, professor Sevinc Hacıyeva çıxış edərək akademik Həsən Əliyevin irsinin gənclər üçün örnək olduğunu vurğuladılar.

Sonra Bakının Xətai rayonundakı 194 nömrəli tam orta məktəbin IX sinif şagirdi Cavidan İsmayılzadə, Bakı Modern məktəbinin VIII sinif şagirdi Teymur Fətullayev, Respublika Ekoloji Tərbiyə və Təcrübəçilik Mərkəzinin dərnək üzvü, Bakı şəhərindəki 58 nömrəli tam orta məktəbin VIII sinif şagirdi Əzizə Quliyeva, Xəzər Universiteti Dünya məktəbinin İB sinif şagirdi Aydan Nəsibova, Bakı şəhərindəki 258 nömrəli tam orta məktəbin XI sinif şagirdi Emil Ağayev, Bakıdakı 284 nömrəli tam orta məktəbin IX sinif şagirdi Təbriz Qasımov, Bakıdakı 132-134 nömrəli Təhsil Kompleksinin IX sinif şagirdi Fərid Cəfərov və başqaları çıxışları ilə təqdimatlarını nümayiş etdirdilər.

Elmi-praktik konfransda yekun sözü ilə çıxış edən münsiflər heyətinin sədri, BDU-nun coğrafi ekologiya kafedrasının professoru Telman Xəlilov münsiflər heyətinin qərarını oxudu. Konfransda fərqlənmiş şagirdlərə Təhsil Nazirliyi Respublika Ekoloji Tərbiyə və Təcrübəçilik Mərkəzinin, Bakı Şəhəri üzrə Təhsil İdarəsinin diplom və hədiyyələri, digər iştirakçılara isə sertifikatlar təqdim olundu.

Ədalət DAŞDƏMİRLİ

Azərbaycan müəllimi.- 2012.- 28 dekabr.- S.7.