BDU-da ilin ən yaxşı tələbələrinə diplomlar verilib

Dekabrın 26-da BDU Tələbə Həmkarlar İttifaqı Komitəsi (THİK) tələbələr arasında tədris göstəriciləri, nümunəvi nizam-intizamı, universitetin ictimai həyatında fəallığı ilə fərqlənən, yoldaşları arasında xüsusi nüfuza malik olan tələbələrin müəyyən edilməsi məqsədi ilə təşkil olunan "İlin ən yaxşı tələbəsi" adlı müsabiqənin qaliblərinin mükafatlandırılması mərasimini keçirib. Mərasimi giriş sözü ilə açan Bakı Dövlət Universitetinin rektoru, akademik Abel Məhərrəmov bu səpgili müsabiqələrin keçirilməsinin əhəmiyyətindən bəhs edib. Sonra akademik A.Məhərrəmov "İlin ən yaxşı tələbəsi" adını qazanmış tələbələri təbrik edib, onları bu fəxri ada daim sadiq qalmağa və daha böyük nailiyyətlər əldə etməyə səsləyib.

Tədbirdə Tələbə Həmkarlar İttifaqı Komitəsinin sədri Daşqın Qənbərov və Tələbə Gənclər Təşkilatının sədri Məmmədbağır Məmmədov da çıxış ediblər. 2012-ci ildə həyata keçirilən tədbirlər barədə məlumat verilərək gələcəkdə həyata keçirilməsi nəzərdə tutulan layihələrdən söz açılıb.

Sonda müsabiqədə qalib olmuş tələbələrə diplomlar təqdim edilib. Tədbir bədii hissə ilə yekunlaşıb.

Azərbaycan müəllimi.- 2012.- 28 dekabr.- S.3.