Yasin Həsənovun adı gənc istedadların "Qızıl kitabı"na yazılıb

"Ən böyük arzum tarixin yaddaşında şəxsiyyət kimi qalmaqdır. Bunun üçünsə daim irəli can atmaq, "Mən dövlətim üçün, xalqım üçün nə etdim" sualına cavab tapacaq işlər görmək əzmindəyəm. Ötən hər günü, açılan hər sabahı mənalı və məzmunlu yaşamaq məqsədilə yorulmadan nəsə etmək, fərqli işlərlə yadda qalmaq istəyirəm", - deyən müsahibim Yasinin fəxarət gətirən fikirləri ilə tanış olduqda istər-istəməz qürur hissi keçirir, Vətən torpağının belə övladlar yetişdirdiyindən fəxr duyursan. İlk baxışdan adama elə gəlir ki, bu dolğun fikirlər yaşlı, yetkin bir insanın fikridir. Müqəddəs amalları ilə yaşını qabaqlayan paytaxt məktəblisi Yasin Etibar oğlu Həsənov isə Heydər Əliyev adına liseyin VI sinif şagirdidir. Dərs əlaçısı olan yeniyetmə 2007-ci ildən Tofiq Quliyev adına 12 nömrəli onbirillik musiqi məktəbinin vokal sinfində təhsil alır. Vaxtilə istedadlı uşaqların təmsil olunduğu "Bəri bax" qrupunun solisti olan Yasin xalq artisti Rauf Babayevin və gənc vokalçı Ramil Qasımovun tələbəsidir. Yasinin yüksək məharətlə ifa etdiyi "Vətənim", "Dostuma məktub", "Ana", "Bakım", "Azərbaycanım", "Mənim dünyam", "Sülh mesajı", "Bakı", "Dostlar" mahnılarını həyəcansız dinləmək olmur. Artıq onun 20 mahnıdan ibarət olan 2 albomu və "Vətənim" adlı iki klipi işıq üzü görüb.

Bu illər ərzində musiqi sahəsində bir çox uğurlara imza atan Yasin məktəb, şəhər, respublika miqyaslı tədbirlərdə yuksək göstəricilər nümayiş etdirib. 2010-cu ildə "V&V Company" tərəfindən keçirilən tədbirdə "Gənc istedadlar" nominasiyasında "Qran Pri" mükafatına layiq görülərək ilin "Ən gənc müğənnisi" adına layiq görülüb, elə həmin il Rəşid Behbudov adına Mahnı Teatrında keçirilən "Zirvədəkilər" müsabiqəsində diploma, "AS produksion" və "Oskar" mədəniyyət qəzetinin dəstəyi ilə keçirilən müsabiqədə isə "Qızıl mikrofon" mükafatına layiq görülərək fəxri diplomla təltif olunub. O, 2011-ci ildə Rusiyanın Sankt-Peterburq şəhərində keçirilən XII "Prazdnik detstva" beynəlxalq uşaq müsabiqəsində 27 ölkədən 700 iştirakçı arasında "Qran Pri" mükafatına layiq görülərək Azərbaycan bayrağını ucaldıb. Belarusun Mozır şəhərində keçirilən VII beynəlxalq vokal müsabiqəsində 25 ölkədən 600 iştirakçı arasında "Qran Pri" mükafatına, Rumıniyanın Oneşti şəhərində keçirilən XVI beynəlxalq pop müsabiqəsində 13 ölkədən 50-60 iştirakçı arasında 11 nəfərdən ibarət müxtəlif ölkələrin nümayəndələri olan münsiflər heyətinin rəyi ilə "Qran Pri"yə, xüsusi diploma və III yerə, Belarusun Klimov şəhərində keçirilən beynəlxalq uşaq müsabiqəsində 17 ölkədən 1000 iştirakçı arasında xüsusi diploma və II yerə, Belarusun Vitebsk şəhərində keçirilən IX beynəlxalq uşaq müsabiqəsində səsi və səhnə mədəniyyəti ilə tamaşaçıların və münsiflər heyətinin rəğbətini qazanaraq laureat adına və II yerə, Almaniyanın Berlin şəhərində keçirilən ənənəvi beynəlxalq musiqi müsabiqəsində isə I yerə layiq görülməklə ən yüksək mükafata sahib olmuşdur.

Azərbaycan Respublikasının Prezidenti İlham Əliyevin 19 dekabr 2011-ci il tarixdə imzaladığı "Gənc istedadların xüsusi təqaüdə layiq görülməsi haqqında" sərəncamı ilə Yasin Həsənovun adı Azərbaycanın gənc istedadlarının "Qızıl kitabı"na daxil olunmaqla o, xüsusi aylıq təqaüdə layiq görülüb.

Sifai SƏFƏROV

Azərbaycan müəllimi.- 2012.- 3 fevral.- S.7.