"Azərbaycanın ali təhsil sisteminin tənzimlənməsi üzrə mövcud qanunvericiliyin qiymətləndirilməsi" mövzusunda seminar

Yanvarın 30-da Təhsil Nazirliyində Avropa İttifaqının (Aİ) TAİEX proqramı çərçivəsində "Azərbaycanın ali təhsil sisteminin tənzimlənməsi üzrə mövcud qanunvericiliyin qiymətləndirilməsi" mövzusunda seminarın açılış mərasimi keçirildi.

Təhsil Nazirliyi, Avropa İttifaqı, Bakı Dövlət Universitetinin təşkilatçılığı ilə keçirilən seminarın açılış mərasimində təhsil naziri Misir Mərdanov, Təhsil Nazirliyinin Ali Attestasiya Komissiyasının, Azərbaycan Milli Elmlər Akademiyasının, ali məktəblərin nümayəndələri və Aİ-nin ekspertləri iştirak edirdilər.

Tədbiri giriş sözü ilə açan təhsil naziri Misir Mərdanov bildirdi ki, seminarın məqsədi Azərbaycanın ali təhsil sisteminin Boloniya sistemi standartlarına uyğunlaşdırılması baxımından normativ-hüquqi sənədlərin monitorinqinin aparılması və qiymətləndirilməsindən ibarətdir. Avropa İttifaqı ekspertlərinin Avropa ölkələrinin qabaqcıl təcrübəsi əsasında müvafiq istiqamətlərdə Azərbaycandakı mövcud vəziyyətin müqayisəli təhlilini aparacaqlarını nəzərə çatdıran nazir seminarın ölkəmizdə ali təhsilin inkişafına mühüm töhfələr verəcəyinə əmin olduğunu söylədi.

Avropa İttifaqı ekspertlərinin Azərbaycanın təhsil qanunvericiliyi ilə yaxından tanış olduğunu bildirən Misir Mərdanov ölkəmizdə olan ekspertlərin yüksək səviyyəli mütəxəssislər olduğunu və onların imkanlarından maksimum yararlanmağın vacibliyini qeyd etdi.

Seminarda çıxış edən Avropa İttifaqının ekspertləri - Təhsil Hüququ və Siyasəti üzrə Avropa Assosiasiyasının prezidenti Jan De Groof, Ali təhsil üzrə İsveç Milli Agentliyinin nümayəndəsi Lennart Stahle, Finlandiyanın Ali Təhsilin Qiymətləndirilməsi Şurasının baş eksperti Karl Holm, təhsil nazirinin müavini Qulu Novruzov və Xəzər Universitetinin təsisçisi Hamlet İsaxanlı beynəlxalq və Avropa təhsil sisteminə inteqrasiyanın əsas prinsipləri, təhsil müəssisələrinin akkreditasiyası qaydaları, ali təhsil sahəsində təcrübə mübadiləsinin genişləndirilməsinin vacibliyi, universitetlər üçün reytinqlərin müəyyən edilməsi sisteminin yaradılması, tələbələrin biliklərinin qiymətləndirilməsi və digər məsələlər barədə fikirlərini bildirdilər.

Niyazi RƏHİMOV

Azərbaycan müəllimi.- 2012.- 3 fevral.- S.3.