BDU-da alman alimi Heiko Krügerin "Dağlıq Qarabağ konflikti- hüquqi araşdırmalar" kitabının təqdimatı keçirilib

Bakı Dövlət Universitetində Xocalı faciəsinin 20-ci ildönümünə həsr olunmuş tədbir və alman alimi Heiko Krügerin "Dağlıq Qarabağ konflikti - hüquqi araşdırmalar" kitabının BDU-nun təşəbbüsü ilə ingilis dilindən rus dilinə tərcümə olunmuş variantının təqdimat mərasimi keçirilib. Tədbiri giriş sözü ilə açan universitetin rektoru, akademik Abel Məhərrəmov ən qəddar və amansız terror hadisələrindən biri olan Xocalı soyqırımı haqqında danışıb. Bildirib ki, Xocalı soyqırımı 200 ildən artıq müddətdə erməni millətçiləri tərəfindən xalqımıza qarşı aparılan etnik təmizləmə və soyqırımı siyasətinin qanlı səhifəsidir. Rektor qeyd edib ki, ümummilli liderimiz Heydər Əliyev xalqın tələbi ilə hakimiyyətə gəldikdən sonra Azərbaycan hökuməti və parlamenti Xocalı soyqırımı, bütövlükdə erməni millətçilərinin azərbaycanlılara qarşı törətdiyi cinayətlər haqqında həqiqətləri dünya dövlətlərinə, parlamentlərinə və beynəlxalq təşkilatlara çatdırmışlar. Bu gün bu siyasət Prezident İlham Əliyev, Heydər Əliyev Fondu, Fondun Rusiya nümayəndəliyi tərəfindən həyata keçirilir. Aparıcı dövlətlərin ikili standartlarından söhbət açan, Fransa Senatının antidemokratik qərarını xatırladan rektor alman alimi Heiko Krügerin "Dağlıq Qarabağ konflikti - hüquqi araşdırmalar" kitabına da toxunub. Deyib ki, xarici alimlər öz siyasətçilərindən fərqli olaraq, tarixi hadisələrə daha obyektiv yanaşırlar. Təqdimatı keçirilən kitab buna nümunədir.

Sonra tarix fakültəsinin dosenti Boran Əzizin "Xocalı - XX əsrin faciəsi", hüquq fakültəsinin dekanı, professor Əmir Əliyevin "Heiko Krüger və onun Dağlıq Qarabağ münaqişəsi haqqında hüquqi araşdırmaları" mövzusunda məruzələri dinlənilib.

Tədbirin sonunda Türkiyənin ölkəmizdəki səfirliyinin nümayəndəsi Halis Koyuncuoğlu və millət vəkili Gülər Əhmədova çıxış ediblər.

Azərbaycan müəllimi.- 2012.- 24 fevral.-S.4.