"Qələbəyə doğru irəli" mövzusunda ədəbi-bədii gecə

Fevralın 23-də Rəşid Behbudov adına Mahnı Teatrında Bakı Şəhəri üzrə Təhsil İdarəsinin təşkilatçılığı ilə Xocalı soyqırımının 20-ci ildönümünə həsr olunmuş "Qələbəyə doğru irəli" mövzusunda ədəbi-bədii gecə keçirildi. Qeyd edək ki, BŞTİ-nin müdiri Nailə Rzaquliyevanın imzaladığı müvafiq əmrə əsasən paytaxtın təhsil ocaqlarında Xocalı soyqırımının 20-ci ildönümü qeyd olunur. Tədbirlər planına əsasən ümumtəhsil müəssisələrində mühazirələr, bədii qiraət saatları təşkil olunur, tədris ocaqlarının İnternet saytlarına Xocalı soyqırımını əks etdirən materiallar yerləşdirilir, fotostendlər, guşələr hazırlanır, rəsm sərgiləri, ədəbi-bədii kompozisiyalar keçirilir, divar qəzetləri tərtib edilir, sənədli və bədii filmlər nümayiş etdirilir. Tədbirdə BŞTİ-nin və paytaxtın bir çox ümumtəhsil məktəblərinin nümayəndələri, Xocalı sakinləri və digər şəxslər iştirak edirdilər.

Öncə iştirakçılara Xocalı haqqında film və klip nümayiş etdirildi. Sonra Bakı məktəblilərinin ifasında şeirlər söylənildi, pantomim rəqslər göstərildi. Xocalıda erməni vəhşiliyinə məruz qalan və öz kiçik qızını itirən ananın "Turacım" deyərək fəryad etməsi və Milli Qəhrəman Əlif Hacıyev haqqında göstərilən səhnəciklər iştirakçılara kədərli anlar yaşatdı.

Tədbirdə çıxış edən Xocalı sakini və həmin hadisələrin canlı şahidi Murad Şükürov erməni vandallarının vəhşiliklərindən söz açdı. Bildirdi ki, Azərbaycan xalqının XX əsrdə üzləşdiyi dəhşətli faciələrdən biri də Xocalı soyqırımıdır. Xocalıda dinc əhaliyə qarşı törədilən misli görünməmiş vəhşiliyin hec vaxt qan yaddaşımızdan silinməyəcəyini bildirən M.Şükürov qeyd etdi ki, ümummilli lider Heydər Əliyev hakimiyyətə gəldikdən sonra Xocalı faciəsi ermənilərin Azərbaycan xalqına qarşı həyata keçirdiyi soyqırımı aktı kimi təsdiq olundu.Ulu öndər Heydər Əliyevin sayəsində Xocalı soyqırımının dünyaya tanıdılması istiqamətində xeyli iş görüldü. Ümummilli lider hər il faciənin ildönümündə Xocalı soyqırımı ilə bağlı xalqa müraciət etmiş, faciənin bütün azərbaycanlıların qan yaddaşına çevrildiyini vurğulamışdır. Bu gün ulu öndərin siyasi kursu ölkə Prezidenti İlham Əliyev tərəfindən layiqincə həyata keçirilir. Xocalı soyqırımının dəhşətlərinin dünya ölkələrinə çatdırılması istiqamətində ardıcıl işlər görülür. Biz inanırıq ki, haqq səsimizi dünya ictimaiyyəti eşidəcək və faciəyə öz hüquqi qiymətini verəcək.

Niyazi RƏHİMOV

Azərbaycan müəllimi.- 2012.- 24 fevral.- S.5.