Təhsil sahəsində əməkdaşlığa dair saziş imzalandı

İyulun 13-də Azərbaycan Respublikasının Təhsil Nazirliyi ilə Çin Xalq Respublikasının Təhsil Nazirliyi arasında 2012-2015-ci illərdə təhsil sahəsində əməkdaşlığa dair sazişin imzalanması mərasimi keçirildi.

Təhsil Nazirliyində təşkil olunmuş imzalanma mərasimində nazir Misir Mərdanov, təhsil nazirinin müavini Qulu Novruzov, Çin Xalq Respublikasının ölkəmizdəki fövqəladə və səlahiyyətli səfiri Xun Tsyuin, Azərbaycanın Çin Xalq Respublikasındakı səfiri Lətif Qəndilov iştirak edirdilər.

Qonaqları səmimi salamlayan nazir Misir Mərdanov Azərbaycanla Çin arasındakı əlaqələrdən söz açdı, ölkəmiz müstəqillik əldə etdikdən sonra xüsusilə təhsil sahəsində əməkdaşlığın daha da genişləndiyini diqqətə çatdırdı. Nazir Çin Xalq Respublikasının 200-dən artıq vətəndaşının ölkəmizin ali məktəblərində təhsil aldığını deyərək adıçəkilən ölkənin 16 gəncinin Azərbaycan tərəfinin təqaüdləri hesabına müxtəlif ixtisaslar üzrə respublikamızda ödənişsiz əsaslarla oxuduğunu bildirdi. Təhsil naziri 40-a yaxın azərbaycanlı gəncin Çin Xalq Respublikasının universitetlərində müxtəlif təhsil səviyyələri üzrə dövlət xətti ilə oxuduqlarını,17 tələbənin isə artıq məzun olduğunu söylədi.

Nazir Misir Mərdanov imzalanacaq sazişdə iki ölkə arasında təhsil sahəsində əməkdaşlığın inkişaf etdirilməsi, müəllim və tələbə mübadiləsinin aparılması, ali təhsil müəssisələrinin qarşılıqlı əlaqələrinin genişləndirilməsinin nəzərdə tutulduğunu qeyd etdi. Sazişin əhəmiyyətindən söz açan nazir müvafiq sənədin hər iki ölkənin təhsil sahəsində əməkdaşlığının daha da inkişafına xidmət edəcəyinə ümidvar olduğunu bildirdi.

Çin Xalq Respublikasının Azərbaycandakı fövqəladə və səlahiyyətli səfiri Xun Tsyuin Azərbaycanla Çin arasındakı təhsil əlaqələrindən geniş bəhs edərək bu əməkdaşlığın daha da genişləndirilməsinin zəruriliyini vurğuladı. Çin Xalq Respublikasının vətəndaşlarının Azərbaycanın ali təhsil müəssisələrində oxumağa hər zaman böyük maraq göstərdiklərini deyən səfir onların bizim ölkəmizdə yüksək səviyyədə təhsil almalarından razılıq hissi ilə danışdı. Səfir Xun Tsyuin təhsil sahəsində əməkdaşlığa dair imzalanacaq sazişin hər iki tərəf üçün mühüm əhəmiyyət kəsb etdiyini deyərək təhsillə bağlı əməkdaşlığın bundan sonra da yüksələn xətt üzrə davam edəcəyinə əmin olduğunu qeyd etdi.

Sonra təhsil naziri Misir Mərdanov və Çin Xalq Respublikasının Azərbaycandakı fövqəladə və səlahiyyətli səfiri Xun Tsyuin 2012-2015-ci illərdə təhsil sahəsində əməkdaşlığa dair sazişi imzaladılar.

Samirə KƏRİMOVA

Azərbaycan müəllimi.- 2012.- 20 iyul.- S.2.