Qəbələ Turizm və Otelçilik üzrə Peşə Tədris Mərkəzinin məzunlarına peşə diplomları təqdim olunub

Bu günlərdə Qəbələ şəhərində "Qafqaz Resort" hotelinin konfrans zalında 2009-cu ilin sentyabrından fəaliyyətə başlayan Qəbələ Turizm və Otelçilik üzrə Peşə Tədris Mərkəzinin 3-cü buraxılış məzunlarına diplomların təqdimetmə mərasimi keçirilib.

Tədbiri giriş sözü ilə açan mərkəzin direktoru Eyvaz Kazımov qeyd edib ki, zəngin mədəni-tarixi irsə və əlverişli təbii şəraitə malik olan Azərbaycan turizm sahəsində böyük inkişaf perspektivlərinə malikdir. Bu gün ölkəmizdə turizmin inkişafı üçün geniş imkanlar mövcuddur. Tədris mərkəzinin 3 illik fəaliyyəti barədə geniş məlumat verən E.Kazımov qeyd edib ki, müəssisənin əsas məqsəd və vəzifələrindən biri turizm sektoru üçün peşəkar kadrların hazırlanmasından ibarətdir. Bu məqsədə yüksək səviyyədə nail olmaq üçün turizm obyektləri ilə sistemli şəkildə iş aparılır, xarici dövlətlərin təcrübələri yaxından öyrənilir. Diqqətə çatdırıldı ki, bu gün mərkəzin 136 nəfər məzunu Azərbaycan Respublikası Təhsil Nazirliyi tərəfindən verilən peşələrinə uyğun diplomlara sahib olacaq.

"Qafqaz Resort" hotelin icraçı meneceri Ali Çaylaq çıxış edərək tədris mərkəzində əldə edilən nailiyyətlər, məzunların iş yerlərində qazandığı uğurlar barədə danışıb. O, Azərbaycan Respublikasında, o cümlədən Qəbələdə turizmin sürətli inkişafından bəhs etdi. Qəbələ Turizm və Otelçilik üzrə Peşə Tədris Mərkəzinin məhz turizm sektoru üçün mütəxəssislər hazırladığı bildirilib.

Tədbirdə çıxış edən "Qafqaz River-Side" hotelinin icraçı direktoru Atilla Çetinbaş, Qəbələ Rayon İcra Hakimiyyətinin təhsil, səhiyyə və mədəniyyət şöbəsinin müdiri Ətayə Osmanova turizmin Azərbaycan üçün böyük əhəmiyyət kəsb etdiyini və bu sektorda çalışanların üzərinə böyük məsuliyyət düşdüyünü qeyd ediblər. Diqqətə çatdırılıb ki, "Azərbaycan Respublikasında 2010-2014-cü illərdə turizmin inkişafına dair Dövlət Proqramı" ölkədə turizmin rastlaşdığı problemlərin həll edilməsi və turizm sahəsinin daha da inkişaf etdirilməsinin təmin edilməsi üçün hazırlanmışdır.

Sonra Qəbələ Turizm və Otelçilik üzrə Peşə Tədris Mərkəzinin məzunlarına diplomlar təqdim olunub.

Niyazi RƏHİMOV

Azərbaycan müəllimi.- 2012.- 27 iyul.- S.2.