"Germanistikanın aktual problemləri"nə həsr olunmuş elmi-praktik konfrans

İyunun 1-də Azərbaycan Dillər Universitetində "Germanistikanın aktual problemləri"nə həsr olunmuş elmi-praktik konfrans keçirildi.

Konfransda Türkiyə, Avstriya, Almaniya, Rusiya universitetlərinin germanistika üzrə tanınmış professorları, Almaniyanın, Avstriyanın Azərbaycandakı səfirliklərinin nümayəndələri, ADU-nun professor-müəllim heyəti və tələbələri iştirak edirdilər.

Konfransı giriş sözü ilə açan ADU-nun alman dili fakültəsinin dekanı, dosent Sevinc Rzayeva germanistikanın elm sahəsi kimi daim öndə getdiyini və indi də aparıcı mövqe tutduğunu qeyd etdi. O, bu cür tədbirlərin keçirilməsində universitet rəhbərliyinin, xüsusi ilə də ADU-nun rektoru, Milli Məclisin deputatı, professor Səməd Seyidovun dəstəyinin olduğunu konfrans iştirakçılarının diqqətinə çatdırdı.

ADU-nun elmi işlər üzrə prorektoru, professor Dünyamin Yunusov tədbir iştirakçılarını universitet rəhbərliyi adından salamladı. Belə tədbirlərin keçirilməsində fakültə və kafedraların təşəbbüs göstərməsinin sevindirici hal olduğunu deyən D.Yunusov bildirdi ki, tədqiqat işi ilə məşğul olan daim inkişaf etməli, araşdırmalar aparmalıdır. Natiq universitet əməkdaşlarının monoqrafiya və dərs vəsaitləri nəşr etdirmələrini də yüksək qiymətləndirdi.

Türkiyənin Mərmərə Universitetinin xarici dillərin tədrisi bölümünün rəhbəri, professor Cemal Yıldız konfransda iştirak etdiyindən məmnun olduğunu bildirdi. Türkiyə və Azərbaycan universitetləri arasında əməkdaşlığın olduğunu və bu əməkdaşlığın inkişaf etdiyini konfrans iştirakçılarının nəzərinə çatdırdı. O, germanistikanın Almaniya ilə bağlı olmasına baxmayaraq İsveçrədə, Avstriyada və digər ölkələrin dilçilik universitetlərində də tədqiq olunduğunu qeyd etdi.

Bonn Universitetinin professoru Heinrich Kelz həm Almaniyanın daxilində, həm də bütün dünyada alman dilinin xarici dil kimi tədrisini təmin etmək qarşıda duran əsas vəzifələrdən biri olduğunu vurğuladı və konfransın işinə uğurlar arzuladı.

Almaniyanın Azərbaycandakı fövqəladə və səlahiyyətli səfiri Herbert Kvelle ADU-da təhsil alan tələbələrin alman dilinə böyük maraq göstərdiklərinin sevindirici hal olduğunu bildirdi.

Avstriyanın ölkəmizdəki səfirliyinin mədəni işlər üzrə attaşesi Ziqlinde Şpanlanq Avstriya nümayəndələrinin də konfransda iştirak etmələrindən məmnun olduğunu qeyd etdi.

Alman dilinin leksikologiyası və üslubiyyatı kafedrasının professoru Sərxan Abdullayev bilik qazanmaq üçün daim elmə maraq göstərməyi, elmi inkişaf etdirmək üçün səy göstərməyin vacib olduğunu vurğuladı. O, alman dili fakültəsinin buna daim təşəbbüs göstərdiyini bildirdi.

Konfransda əlavə çıxış edənlər də oldu.

Şakir CƏFƏROV

Azərbaycan müəllimi.- 2012.- 8 iyun.- S.5.