Futbolçu qızlar Azərbaycan birincisi olmuşlar

Azərbaycan Respublikası Prezidentinin Azərbaycan Respublikasında 2012-ci ilin "İdman ili" elan edilməsi ilə bağlı sərəncamından irəli gələn vəzifələri həyata keçirmək məqsədilə Bakı Şəhəri üzrə Təhsil İdarəsinin Tədbirlər Planına əsasən bir sıra işlər həyata keçirilmişdir. Keçirilən tədbirlərdə digər təhsil müəssisələri ilə yanaşı Bakı şəhəri 9 nömrəli Uşaq-Gənclər İdman Məktəbi daha çox diqqəti cəlb edir. Burada fəaliyyət göstərən bölmələrin hər birində (güləş, basketbol, futbol) nailiyyətlər ürəkaçandır. İdman məktəbi daha hazırlıqlı komandaları ilə şəhər və respublika miqyaslı yarışların demək olar ki, hamısında iştirak edərək I - III yerləri qazanır.

İdman məktəbi "Azərbaycan Respublikasında futbolun inkişafına dair Dövlət Proqramı(2005-2015-ci illər)"nı əldə rəhbər tutaraq fəaliyyətini genişləndirmiş, bu sahədə də yüksək göstəricilərə nail olmuşdur. Belə ki, 2009-cu ildə 1 qrupla gənc futbolçuların hazırlığına start verən idman məktəbində hazırda 3 qrup fəaliyyət göstərir. Maraqlı burasıdır ki, Bakı təhsil sistemində yeganə olaraq qızlardan ibarət futbol komandası məhz burada formalaşmışdır. Komandanın 4 üzvü qızlardan ibarət yığma komandanın tərkibinə qəbul edilmişdir. Məşqçi-müəllim Zamin Əsədullayevin gərgin əməyi nəticəsində taktiki cəhətdən daha hazırlıqlı olan komanda fəaliyyəti dövründə bütün rəqiblərini məğlub etmişdir. Qızlardan ibarət futbol komandaları arasında keçirilən yarışların final mərhələsində Zaqatala komandasına 5:0 hesabı ilə qalib gələrək Azərbaycan birincisi olmuş komanda növbəti qələbə ilə öz azarkeşlərini bir daha sevindirmişdir. Sizi təbrik edirik, futbolçu qızlar!

Azərbaycan müəllimi.- 2012.- 22 iyun.- S.7.