Bacarıqlı rəhbər, əsl pedaqoq

Bəşəriyyət tarixində müəllimin müdrik insanlar arasında həmişə xüsusi yeri olub. Müəllimlik bütün zamanlarda cəmiyyətdə ən yüksək qiymətə layiq peşə sayılıb. Gənc nəslin müstəqil həyata hazırlanması, dünyagörüşünün formalaşması, gələcəyin mütəxəssisinin ilk hazırlığı məhz orta məktəb illərindən başlayır. Cəmiyyət ən əziz, ən qiymətli sərvətini - uşaqları, öz ümidini, gələcəyini məhz müəllimə etibar edir. Respublikamızda müəllim adını şərəflə daşıyan və bütün varlığı ilə təhsilə bağlı olan pedaqoqlar çoxdur. Belə müəllimlərdən biri də ömrünün 60-cı baharını yaşayan Bakıdakı Heydər Əliyev adına liseyin direktoru, əməkdar müəllim Fikrət Xəlilovdur.

Fikrət Xəlilov 1952-ci ildə Azərbaycanın qərb bölgəsində yerləşən zəngin mədəniyyət və təhsil ənənələri olan Qazax rayonunun Qazaxbəyli kəndində anadan olub. 1974-cü ildə indiki Azərbaycan Dövlət Pedaqoji Universitetinin riyaziyyat fakültəsini bitirən Fikrət müəllim təyinatla Sabirabad rayonuna göndərilmiş və burada pedaqoji fəaliyyətə başlamışdır. Sonra fəaliyyətini Bakıdakı 254 nömrəli orta məktəbdə riyaziyyat müəllimi kimi davam etdirən F.Xəlilov 1992-ci ildən 2004-cü ilədək 287 nömrəli "Zəkalar" liseyində, 2004-cü ildən etibarən isə ümummilli liderin adını daşıyan Heydər Əliyev adına liseydə direktor vəzifəsində çalışır. F.Xəlilov işlədiyi dövrlərdə bir çox fəxri adlar və diplomlarla təltif olunub. Belə ki, 1986-cı ildə "Xalq maarif əlaçısı" döş nişanı, 1989-cu ildə "Metodist müəllim", 2005-ci ildə isə ölkə Prezidenti cənab İlham Əliyevin sərəncamı ilə "Əməkdar müəllim" fəxri adına layiq görülüb. Dövri mətbuatda elmi və metodiki məqalələrlə çıxış edən Fikrət müəllim "Fizika və riyaziyyat tədrisi" jurnalında "İrrasional tənliklərin tədrisi metodikası" və "İbtidai məktəb və məktəbəqədər tərbiyə" jurnalında "Hərəkətə aid məsələlərin tədrisi haqqında" metodik məqalələrin, Təhsil Nazirliyinin müvafiq əmri ilə qrif verilmiş və riyaziyyat müəllimi Adil Asalıyevlə birgə hazırladığı iki hissədən ibarət "Riyaziyyatdan testlər" adlı dərs vəsaitinin müəllifidir. Təhsil Nazirliyinin göndərişi ilə müxtəlif illərdə İsrail və Kanadada olan F.Xəlilov bir çox mövzularda keçirilən beynəlxalq seminar və konfransların iştirakçısıdır.

F.Xəlilovun yüksək peşəkarlığı, müəllimlik sənətinə olan sevgisi, gənc nəslin təlim-tərbiyəsinə göstərdiyi qayğı, bu yolda fədakarcasına çalışması rəhbərlik tərəfindən daim yüksək qiymətləndirilmiş və 2004-cü ildə ulu öndərin adını daşıyan Heydər Əliyev adına liseyə direktor vəzifəsinə təyin olunmuşdur. Yüksək təşkilatçılıq və idarəçilik keyfiyyətlərinə malik olan F.Xəlilov qısa müddət ərzində Heydər Əliyev adına liseyi layiq olduğu uca yerlərə yüksəltmiş və lisey respublikamızda nümunəvi təhsil müəssisəsinə çevrilmiş, 2008-ci ildə isə ölkə Prezidenti İlham Əliyevin sərəncamı ilə "Ən yaxşı ümumtəhsil məktəbi" müsabiqəsinin qalibi olmuşdur. Rəhbərlik etdiyi kollektivin böyük rəğbətini qazanan F.Xəlilov perspektivli gənc müəllimlərin və xüsusi istedada malik olan şagirdlərin potensialının aşkar edilməsində də xüsusi bacarığa malikdir. Təsadüfi deyil ki, onun rəhbərlik etdiyi Heydər Əliyev adına liseyin şagirdləri istər Tələbə Qəbulu üzrə Dövlət Komissiyasının keçirdiyi qəbul imtahanlarında, istər ölkədaxili, istərsə də beynəlxalq səviyyəli olimpiada və müsabiqələrdə yüksək nəticələr əldə edərək bu təhsil ocağının adını şərəflə yüksəldirlər.

Fikrət Xəlilovun dediklərindən: Müəllim sənətini seçməyimdə uzun müddət məktəb direktoru işləmiş, tanınmış pedaqoq, dayım Nuru Fərzəliyevin və Qazax şəhər 1 nömrəli orta məktəbdə təhsil aldığım illərdə bacarıqlı riyaziyyat müəllimim mərhum Qara Hacıyevin böyük rolu olub. Onları özümə örnək seçərək müəllimlik peşəsinə yiyələnmək üçün ali məktəbə daxil oldum. Ali məktəbi bitirdikdən sonra təyinatım üzrə 3 il Sabirabad rayonunun Talış kənd orta məktəbində işlədim. Həmin məktəbin mənim gələcək fəaliyyətimdə və həyatımda xüsusi rolu olub. Məktəbin direktoru İmanqulu Həsənovun rəhbərliyi altında işə başladığım ilk illərdən gələcək pedaqoji fəaliyyətimdə son dərəcə mühüm olan əsl müəllimlik, pedaqoji ustalıq və idarəetmə keyfiyyətlərini öyrəndim. Bəlkə də məndə həmin illərdən qalan adətdir ki, rəhbərlik etdiyim liseyə hamıdan yarım saat tez gəlirəm. Liseyimizin çıxışında şagirdlər üçün nəzərdə tutulmuş "Nə öyrənib gedirsən?", müəllimlər üçün isə "Nə öyrədib gedirsən?" başlıqlı müraciət var. Məncə, hər bir insan qarşısına məqsəd qoymalı və bu məqsədə çatmaq üçün var gücü ilə çalışmalıdır. Pedaqoji kollektivimiz bu gün qloballaşan dünyada hərtərəfli biliyə malik yüksək intellektual səviyyəli gənclərin hazırlanmasını qarşısına məqsəd qoyub. Qeyd edim ki, bu günün şagirdlərini gələcəyin ixtisaslı mütəxəssisi kimi qəbul etməliyik. Bu baxımdan qloballaşmanın geniş vüsət aldığı informasiya cəmiyyətində sosial-iqtisadi fəaliyyət sahələrində rəqabətin gücləndiyi, habelə təbii resursların tədricən tükəndiyi bir vaxtda təhsilin rolu daha da artmaqdadır. Hazırda respublikamızda şagirdlərin yüksək səviyyədə təhsil alması üçün dövlət tərəfindən hər bir şərait yaradılıb. Ümummilli liderimiz Heydər Əliyevin ideyaları əsasında formalaşan müasir Azərbaycan təhsili dünya təhsil sisteminə uğurla inteqrasiya olunur. Ölkə başçısı cənab İlham Əliyevin təhsilə göstərdiyi diqqət və qayğı nəticəsində respublikamızda yeni məktəblər tikilir. Biz təhsil işçiləri yaradılan şəraitdən maksimum istifadə etməli və gələcək nəslin inkişafı üçün var gücümüzlə çalışmalıyıq.

Liseyin müəllimi Hökümə Əliyeva:

-1999-2000-ci tədris ilindən etibarən respublikamızın təhsil sahəsində İslahat Proqramı həyata keçirilməyə başladı. Mən o zaman bu İslahat Proqramını həyata keçirmək üçün Təhsil Nazirliyi tərəfindən seçilən 20 pilot məktəbindən biri olan 181 nömrəli məktəbdə işləyirdim. Pilot məktəblər əldə etdikləri təcrübəni aralarında bölüşmək məqsədi ilə "dəyirmi masa"lar, "açıq dərs"lər, "açıq qapı günləri" keçirirdilər. 2002-ci ildə işlədiyim məktəbdə bu cür tədbir keçirildi. Mənim 3-cü sinifdə hazırladığım "açıq dərs"də bir çox qonaqlar, eləcə də həmin illərdə "Zəkalar" liseyinin direktoru olan F.Xəlilov da iştirak etdi. F.Xəlilov dərs haqqında yüksək fikir söylədi. Sonra məni öz məktəbində keçirdiyi "dəyirmi masa"ya dəvət etdi. Çox böyük hörmətlə kollektivinə yaradıcı bir müəllim kimi təqdim etdi. Bir müddət keçdikdən sonra F.Xəlilov Heydər Əliyev adına liseyə direktor təyin edildi. Fikrət müəllimin məqsədi ulu öndərimizin adını daşıyan liseydə güclü kadr potensialı yaratmaq, məktəbin nüfuzunu günü-gündən artıraraq, daşıdığı adı doğrultmaq idi.

Fikrət müəllim məqsədini söyləyərək pedaqoji fəaliyyətimi məhz bu məktəbdə davam etdirmək üçün məni liseyə dəvət etdi. Beləliklə, 2006-cı ildən etibarən mən F.Xəlilovun rəhbərlik etdiyi kollektivdə çalışıram. İşimdən çox məmnunam. Çünki məktəbimizdə sağlam mənəvi-psixoloji mühit var, işləyən müəllim üçün gözəl şərait mövcuddur. Yenilikləri həyata keçirmək üçün rəhbərlik tərəfindən əlverişli əmək şəraiti yaradılmışdır. İslahatın tələblərinə uyğun olaraq liseyimiz səmərəli öyrənmə mühiti yaratmaq üçün geniş sinif otaqları, İKT avadanlıqları və digər texniki təlim vasitələri ilə təchiz edilmişdir. Bu məktəbdə işləyən hər bir müəllim dərk edir ki, təcrübəsini daim yeniləşdirməli, daha da zənginləşdirməlidir. Fikrət müəllim deyir ki, müəllim sözünün məsuliyyət yükü çox ağırdır. Əsl müəllimin dərin elmi biliyi, dünyagörüşü ilə yanaşı, böyük ürəyi də olmalıdır.Bütün bunları F.Xəlilovda görmək olar.

Yadımdadır ki, pedaqoji şurada Fikrət müəllim Nazim Hikmətin belə bir fikrinə istinad etdi: "Xoşbəxt o şəxsdir ki, səhər işə, axşam isə evə tələsir!". Fikrət müəllimin rəhbərlik etdiyi liseyin kollektivi istər pedaqoji, istər texniki heyət, istərsə də şagird kontingenti hər səhər böyük həvəslə məktəbə tələsir. Çünki hər birimiz bilirik ki, bizi xoşrəftar, səmimi, hər insana fərdi olaraq yanaşan diqqətli rəhbər, ən əsası isə gözəl insan gözləyir.

Hər birimiz fəaliyyətimizlə, nailiyyətimizlə Fikrət müəllimin etimadını doğrultmağa çalışırıq. İskəndərdən soruşublar: "Atanı çox sevirsən, yoxsa müəllimini? Cavab verib ki , müəllimimi! Atam məni fani dünyaya gətirib, müəllimim isə mənə əbədi həyat bəxş edib". Fikrət müəllim də məhz belə müəllimlərdəndir. O, rəhbərdən əvvəl bilikli, elmin qapılarını şagirdlərinin üzünə açan fədakar riyaziyyat müəllimidir. Ümummilli liderimiz Heydər Əliyev deyirdi: "Mən yer üzündə müəllimdən yüksək ad tanımıram". Fikrət müəllim məhz müəllim adını yüksəklərə qaldıran bir müəllimdir.

Fürsətdən istifadə edib 60 illik yubileyi münasibətilə F.Xəlilovu təbrık edirəm, ona Tanrıdan cansağlığı arzulayıram ki, bundan sonra da uzun illər təhsilimizə xidmət etsin.

Pedaqoji fəaliyyətə Heydər Əliyev adına liseydə başlamış gənc tarix müəllimi Hafiz Cabbarov:

- Hər bir insanın həyatının yaddaqalan anları olur. Bu anlar insan həyatını, onun fəaliyyətini istiqamətləndirir. Yaxşı yadımdadır, BDU-nun tarix fakültəsini bakalavr və magistr pillələri üzrə fərqlənmə diplomu ilə bitirdikdən sonra yeni ümid, yeni başlanğıc axtarışında idim. Çox sevdiyim, dəyər verdiyim bir sənət seçmişdim. Müəllim olmaq istəyirdim. Təsadüfən Xətai rayonunda yeni təhsil ocağının - Heydər Əliyev adına liseyin fəaliyyətə başladığını eşitmişdim. Ulu öndərin adını daşıyan məktəbdə işləmək şərəfli və eyni zamanda məsuliyyətli iş idi. Hələ pedaqoji fəaliyyətinə yeni başlamış şəxs üçün daha həyəcanlı idi. Bu həyəcan və ümidlə liseyə gəldim. Qəbul otağına yaxınlaşdım. Liseydə işləmək istəyimi bildirdim. Lakin müəllimlərin işə qəbul müsabiqəsinin artıq başa çatdığını dedilər. Taleyin işimi, yoxsa təsadüfmü, açıq qapıdan bu söhbəti dinləyən direktor məni içəri dəvət etdi. Otağa daxil oldum. Tanış olduq. Məqsədimi, məramımı bildirdim. Direktorun nurani görünüşü və alicənab qəbulu artıq bütün həyəcanıma son qoymuşdu. Bu, direktor, mənim pedaqoji fəaliyyətimin başlanmasına təsir göstərmiş Fikrət Xəlilov idi. Səmimi olaraq etiraf edirəm: Mən bütün uğurlarımın başlanğıcını o qısa və səmimi qəbulda görürəm. Artıq 8 ildir ki, bu liseydə çalışıram. Əgər tarix elmini kitablardan öyrənmişdimsə, pedaqoji fəaliyyəti Fikrət müəllimdən öyrəndim. Qısa müddət ərzində əvvəlcə dərsliklərin rəyçisi, daha sonra isə müəllifi oldum. 2010-cu ildə Azərbaycan Respublikasının Prezidenti İlham Əliyev cənablarının sərəncamı ilə "Ən yaxşı müəllim" müsabiqəsinin qaliblərindən oldum.

Müəllimlik peşəsini bütün peşələrdən üstün hesab edən Fikrət müəllim nizam-intizamı, müəllimlərə və şagirdlərə həssas, səmimi münasibəti uğurun açarlarından hesab edir. Yaxşı xatırlayıram. Bir dəfə dərsə gecikmişdim. Fikrət müəllim isə adəti üzrə yenə hər kəsdən öncə gəlib iş gününə başlamışdı. Tələsik addımlarla liseyin girişinə daxil oldum. Açığı çox utanırdım. Sanki bunu hiss edibmiş kimi, Fikrət müəllimin məni görməməzliyə vuraraq uzaqlaşdığını gördüm. Bu jestdən çox təsirləndim. Özüm-özümə bir daha gecikməyəcəyimə söz verdim. O hadisə mənə sübut etdi ki, pedaqoji ustalıq yalnız kitablarda yazılmır, fəaliyyətdə öz ifadəsini tapır.

Bəli, hamıya ömründən pay verən bir müəllim ömrünü də beləcə vərəqlədik. Vərəqlədikcə 60 il yaşamış və həyatının 40 ilinə yaxınını Azərbaycan təhsilinə həsr etmiş şərəfli və mənalı bir ömrün şahidi olduq. Biz də Fikrət müəllimi 60 illik yubileyi münasibətilə təbrik edir, uzun ömür, cansağlığı arzulayırıq.

Niyazi RƏHİMOV

Azərbaycan müəllimi.- 2012.- 29 iyun.- S.5.