Xaricdə təhsil almaq ən böyük arzum idi

Ölkəmiz müstəqillik qazandıqdan sonra azərbaycanlı gənclərin dünyanın istənilən ölkəsinin ali məktəblərində təhsil almalarına geniş imkanlar yaranıb. Hər il yüzlərlə gənc təhsil almaq üçün xarici ölkələrin ən nüfuzlu ali məktəblərinə gedir. Xaricdə təhsil almaq həmişə mənim də ən böyük arzum olub və çox sevinirəm ki, builki qəbul imtahanlarını uğurla verib məqsədimə çata bildim. Hazırda Şimali Kipr Doğu Akdeniz Universitetinin tələbəsiyəm.

Yeri gəlmişkən, bu təhsil ocağı haqqında məlumat vermək istərdim. 1979-cu ildə təsis olunmuş Doğu Akdeniz Universiteti son 30 ildə beynəlxalq miqyasda tanınan və akkreditasiyaları olan ali məktəb səviyyəsinə yüksələ bilmişdir. Hazırda bu təhsil müəssisəsində 16 mindən çox tələbə oxuyur. Onların arasında yerli tələbələrdən savayı, 68 ölkənin təmsilçiləri də var. Beynəlxalq Universitetlər Birliyi, Avropa Universitetlər Birliyi, Aralıq Dənizi Universitetlər Birliyi və İslam Ölkələri Universitetləri Federasiyasının İdarə Heyətinin üzvü olan DAU-nun diplomları bütün ölkələrdə tanınır. Fərəhləndirici haldır ki, bu universitetdə çox sayda azərbaycanlı gənc də təhsil alır və məhz bu səbəbdən mən özümü heç vaxt qəriblikdə hiss etmirəm. Onu da qeyd edim ki, bu ölkədə Azərbaycana hədsiz rəğbət bəsləyirlər və bizə hörmətlə yanaşırlar. Doğu Akdeniz Universitetində azərbaycanlılara çox böyük güzəştlər tətbiq olunur. İdmanda və digər sahələrdə xüsusi istedadları, bacarıq və qabiliyyətləri ilə fərqlənənlərə müxtəlif təqaüdlər verilir. Təhsildə yüksək bilik səviyyəsi nümayiş etdirən tələbələr isə, ümumiyyətlə, təhsil haqqını ödəməkdən azad olunurlar.

Şimali Kipr Doğu Akdeniz Universiteti bir neçə tədris korpusu, idman kompleksi, kitabxana və klubları olan şəhərcikdən ibarətdir. Təhsil ocağında yerli müəllimlərlə yanaşı, dünyanın inkişaf etmiş ölkələrindən gəlmiş alimlər də çalışır.

Burada tələbələrin yüksək səviyyədə təhsil almaları və asudə vaxtlarını maraqlı keçirmələri üçün hər cür şərait yaradılıb. Dərsə hazırlaşarkən 4 mərtəbədə yerləşən zəngin kitabxanadan istifadə edirik. Dərsdən sonra tələbələr vaxtlarını istədikləri dərnək və klublarda keçirir, idman kompleksində müxtəlif idman növü ilə məşğul olurlar. Bütün bunlardan başqa, tələbələr üçün müntəzəm olaraq gəzinti turları və digər maraqlı tədbirlər təşkil olunur.

Təhsil aldığım bir neçə ay ərzində ən xoşuma gələn cəhət isə azərbaycanlı tələbələr arasında çox səmimi münasibətin olmasıdır. Mənimlə birlikdə hüquq fakültəsində 11 nəfər azərbaycanlı tələbə də təhsil alır. Biz digər fakültələrdə oxuyan həmyerlilərimizlə daim sıx ünsiyyətdə oluruq, mehriban dolanırıq, qayğı və problemlərimizi birlikdə həll edirik. Buna görə də biz hətta tətil zamanı Azərbaycanda olduğumuz günlərdə də tez-tez görüşməyə, vaxtımızı birlikdə keçirməyə çalışırdıq. Mütəşəkkil qaydada fəaliyyət göstərmək üçün universitetdə Azərbaycan Tələbələrinin Cəmiyyətini yaratmışıq. Cəmiyyətin prezidenti hər il seçki yolu ilə tələbələrin arasından seçilir. Biz həftədə bir dəfə bir yerə toplaşaraq cari məsələləri, qarşıya çıxan problemlərin həlli yollarını, görəcəyimiz işləri müzakirə edirik. Ən önəmlisi odur ki, bütün tarixi günlərimiz və milli bayramlarımızla bağlı möhtəşəm tədbirlər keçiririk. Bu tədbirlərə tanınmış dövlət adamları, siyasətçilər, ictimai xadimlər, ziyalılar və sənətçiləri də dəvət edirik. Bu günlərdə çox ciddi şəkildə Xocalı soyqırımı ilə bağlı anım mərasimi keçirdik.

Qeyd edim ki, ümumiyyətlə, Doğu Akdeniz Universitetində tez-tez maraqlı tədbirlər, xüsusilə beynəlxalq səviyyəli elmi konfranslar, seminar və görüşlər təşkil edilir. Onlardan biri də noyabrda "Azərbaycan-Türkiyə: ortaq tariximiz və gənclər" mövzusunda keçirilən elmi-praktik konfrans idi. 1-5 noyabr tarixlərində baş tutan tədbirdə Şimali Kiprdə işgüzar səfərdə olan millət vəkillərimiz Gülər Əhmədova və Musa Qasımlı da iştirak edirdilər. Konfransdan öncə onlar bizimlə görüşərək azərbaycanlı tələbələrin Kiprdəki həyatı, universitetdə yaradılan şəraitlə yaxından tanış oldular. Deputatlarımızla söhbət zamanı onlar bütün qayğı və problemlərimizlə maraqlandılar və təhsilimizlə bağlı dəyərli tövsiyələrini verdilər.

Konfransdan sonra millət vəkillərimiz universitetin rektoru, professor Abdullah Öztopraqla görüşdülər. Abdullah bəy görüş zamanı qonaqlara rəhbərlik etdiyi ali təhsil ocağı haqqında geniş məlumat verib. Tələbələrlə görüşdüyünü rektorun nəzərinə çatdıran Gülər Əhmədova Şimali Kiprdə "Azərbaycan-Şimali Kipr Gənclər Cəmiyyəti"nin yaradılması fikrini professor Abdullah Öztopraqla müzakirə edib və bu təşəbbüs çox müsbət qarşılanıb.

Əli ƏLİYEV,

Doğu Akdeniz Universiteti

hüquq fakültəsinin I kurs tələbəsi

Azərbaycan müəllimi.- 2012.- 2 mart.- S.4.