Qəhrəmanlar unudulmurlar

Şabran şəhər Roman Yusifov adına 2 nömrəli texniki fənlər təmayüllü tam orta məktəbdə Azərbaycanın Milli Qəhrəmanı Roman Yusifovun büstü açılmışdır.

Azərbaycan xalqının azadlıq və müstəqillik uğrunda mücadiləsi tarixində şanlı səhifələr çox olmuşdur. Xalqımızın igid və qəhrəman oğulları bu yolda canlarından keçmiş, həyatlarını qurban vermişlər.

Tariximizin belə səhifələrindən biri də 1995-ci ilin mart hadisələridir. O dövrdə ümummilli liderimiz Heydər Əliyevin yorulmaz fəaliyyəti nəticəsində atəşkəsə nail olunması, "Əsrin müqaviləsi"nin imzalanması, dövlətimizin qüdrətinin getdikcə artmasını gözü götürməyən, Azərbaycanda ictimai-siyasi sabitliyi pozmaq istəyən qüvvələr dövlət çevrilişinə cəhd etdilər.

Mart ayının əvvəllərində Qazax rayonunda baş verən silahlı toqquşma daha sonra martın 15-də Bakı şəhərində Daxili İşlər Nazirliyinin Xüsusi Təyinatlı Polis Dəstəsinin dövlət çevrilişinə göstərilən cəhdləri ilə nəticələndi.Qiyamçılarla 3 gün aparılan danışıqlar heç bir nəticə vermədikdə üsyan hərbi güc tətbiq etməklə yatırıldı.Təəssüf ki,o günlər Azərbaycan xalqına qarşı cinayət edənlərin atəşindən, gülləsindən xalqımızın mərd, igid, cəsur övladları da həlak oldular. Onlardan iki nəfəri Roman Yusifov və Samir Zülfüqarov şabranlı idi.

Ölkə Prezidenti Heydər Əliyevin 4 aprel 1995-ci il tarixli Fərmanı ilə Azərbaycan Respublikasının Konstitusiya dövlət quruluşunun müdafiəsi, onun müstəqilliyinin qorunub saxlanılması və dövlət çevrilişi cəhdinin qarşısının alınması zamanı şəxsi qəhrəmanlıq və şücaət göstərdiklərinə görə onlara Azərbaycanın Milli Qəhrəmanı adı və "Qızıl ulduz" medalı verilmişdir.

Roman Yusifovun təhsil aldığı 2 nömrəli tam orta məktəb-lisey iftixarla onun adını daşıyır. Milli Qəhrəmanın yaşadığı küçəyə onun adı verilmiş, böyüyüb boya-başa çatdığı evinin qarşısında barelyefi vurulmuşdur.

Qeyd etmək lazımdır ki, Roman Yusifovun məktəbin qarşısında qoyulmuş büstü ötən illərin, müstəqilliyimizin ilk dövrlərinin yadigarı idi və bu abidənin müasir şəkildə yeniləşməsinə ciddi ehtiyac vardı. Məktəbin Valideyn-Müəllim Assosiasiyasının təşəbbüsü və rayon icra hakimiyyətinin yaxından köməkliyi ilə bu abidənin Milli Qəhrəmanın adına və xatirəsinə layiq olan bir şəkildə yenidən qurulması qısa bir zaman kəsiyində həyata keçirildi. Bu, məktəbin və rayonun fəxri, dövlətçiliyin qorunması yolunda canından keçən Vətən övladının, Azərbaycanın Milli Qəhrəmanı Roman Yusifovun xatirəsinə olan hörmət və ehtiramın nəticəsi idi.

Martın 17-də, Milli Qəhrəmanın şəhid olduğu gündə onun şərəfinə ucaldılmış abidənin açılış mərasimi keçirildi. Mərasimə rayon icra hakimiyyətinin, rayonun idarə, müəssisə və təşkilatlarının nümayəndələri, məktəb-liseyin müəllim və şagird kollektivi, Milli Qəhrəmanın və məktəbin digər şəhid məzunlarının ailə üzvləri toplaşmışdılar.

Tədbiri giriş sözü ilə məktəb-liseyin direktoru Rafiq Hüseynov açdı, Azərbaycanın Dövlət himni səsləndirildi.

Sonra məktəbin sinifdənxaric və məktəbdənkənar işlər üzrə təşkilatçısı G.Rzayeva Roman Yusifovun həyatı və döyüş yolu barədə ətraflı məlumat verdi. Məktəb-liseyin IX "b" sinfinin gənc heydərçiləri Milli Qəhrəmana həsr edilmiş şeirlər söylədilər.

Daha sonra Roman Yusifovun sinif rəhbəri olmuş riyaziyyat müəllimi Nəzifə Əliyeva öz xatirələrini danışdı. Söz Milli Qəhrəmanın anası Kübra Yusifovaya verildi. O, oğlunun xatirəsinin daim əziz tutulduğuna,göstərilən diqqətə və qayğıya görə ölkə Prezidenti İlham Əliyevə, rayon rəhbərliyinə və məktəbin kollektivinə öz minnətdarlığını bildirdi.

Şabran Rayon İcra Hakimiyyətinin başçısı Novruz Novruzov 15-17 mart 1995-ci ildə dövlətçiliyimizin sınağa çəkildiyi tarixi şərait, ümummilli liderimiz Heydər Əliyevin rəhbərliyi ilə həyata keçirilən tədbirlər və xalqın nümayiş etdirdiyi həmrəylik barədə ətraflı məlumat verdi. O bildirdi ki, bu silahlı toqquşmada həlak olan 32 nəfər döyüşçüdən ikisinin şabranlı olması bu torpağın yetişdirdiyi oğulların Vətənə və dövlətçiliyimizə sədaqətinin nümunəsidir.

Şəmistan Əlizamanlının "İgid əsgər, möhkəm dayan" mahnısının sədaları altında Şabran Rayon İcra Hakimiyyətinin başçısı Novruz Novruzov və Azərbaycanın Milli Qəhrəmanı Roman Yusifovun anası Kübra Yusifova büstün üzərindən ağ örtüyü götürdülər.

Toplantı iştirakçıları büstün önünə gül dəstələri qoydular, Milli Qəhrəmanın valideynləri ilə xatirə şəkilləri çəkdirdilər.

Azərbaycan müəllimi.- 2012.- 30 mart.- S.5.