Azərbaycanlı alim Hindistanda keçirilən elmi konfransdan qayıdıb

Bu yaxınlarda Astara Pedaqoji Kollecinin direktoru, fəlsəfə doktoru, dosent, əməkdar müəllim Əlihəsən Həmzəyev Hindistanda Maunt Abu şəhərində keçirilən beynəlxalq elmi tədbirdə iştirak edib.

4-9 oktyabr tarixində Braxma Kumaris Ümumdünya Mənəviyyat Universitetində təşkil olunan beynəlxalq tədbir haqqında Ə.Həmzəyev təəssüratlarını bizimlə bölüşərək deyir:

- Braxma Kumaris Ümumdünya Mənəviyyat Universiteti "Ağlın dincliyi" adlı Beynəlxalq retrit keçirir. Maunt Abu şəhərində universitetin baş qərargahında bu təhsil ocağının 75 illik yubileyi münasibətilə keçirilən proqramda yüzdən artıq millətin nümayəndələri, müxtəlif peşə, mədəniyyət adamları, eləcə də dövlət rəhbərləri iştirak edirdilər. Orada bir həftə ərzində çox maraqlı və mənalı tədbirlərdə iştirak etdim. Müxtəlif millətlərin nümayəndələri ilə görüşlər keçirdim. Ən yaddaqalan və ürəkləri riqqətə gətirən iki məqam haqqında fikirlərimi bildirmək istəyirəm.

Birincisi odur ki, 10 minə yaxın iştirakçının qarşısında çıxış edərək öz ürək sözlərimi onlara çatdırdım. İlk növbədə, hind xalqını odlar yurdu - Azərbaycan xalqı, rəhbərlik etdiyim kollecin müəllim və tələbələri adından salamladım. Yubiley münasibətilə onları təbrik edərək qeyd etdim ki, Braxma Kumaris təşkilatı saf səylər sayəsində bütün dünyanı zorakılıq əleyhinə mübarizə aparmağa, müxtəlif xalqların insanları arasında daha yaxşı münasibətlərin yaranmasına səsləyir. Ümid edirəm ki, sülh və əmin-amanlıq doğma Azərbaycan torpağına da gələcəkdir. 20 faiz torpağımız ermənilər tərəfindən zəbt edilmişdir. Azərbaycan həmişə sülh tərəfdarı olub və olacaqdır. Artıq 20 ildən yuxarıdır ki, bizim dövlətimiz qan tökmədən bu konflikti həll etməkdən ötrü əlindən gələni edir. Braxma Kumaris Universitetinin təbliğ etdiyi və yaydığı ideyalar qloballaşmaqda olan dünyamızın dayağıdır, hətta bu dünyanı böyük faciələrdən xilas etmək gücünə malikdir.

İkinci ən çox yaddaqalan hadisə isə Hindistana və bütün dünyaya yayılan "Badhuban" radiosuna verdiyim müsahibəm oldu. "Badhuban" tərcümədə "bal meşəsi" deməkdir, yəni ballı torpaq, şirinli torpaq. Radionun əməkdaşları dedilər ki, onların əsas məqsədləri dinləyicilərinin mədəni inkişafı və birliyi, sağlamlığı, sosial təminatı, təhsili ilə bağlı verilişlər təşkil etmək və onların bu sahədə əməli fəallığını birləşdirməkdən ibarətdir. Proqramlarında yerli cəmiyyətin və onun sakinlərinin xüsusi ehtiyaclarını əks etdirən verilişlər hazırlayır və əsasən kənd camaatının, uşaq və qadınların problemləri, onların təhsil haqqında fikirlərini dinləyir və müzakirə edirlər. Radionun əməkdaşları məni böyük hörmətlə qarşıladılar. Tədbirin beynəlmiləlliyini qeyd edərək belə görüşlərin insanların daha da yaxınlaşmasına və zorakılığa qarşı birgə mübarizə aparmaqları üçün fiziki və mənəvi kamilliyə gedən yolun onlara aşılanması istiqamətində mühüm rolundan danışdım. Torpaqlarımızın erməni bədxahları tərəfindən zəbt olunması və 1 milyondan artıq soydaşımızın qaçqın düşməsi haqqında məlumat verərək tezliklə bizim Qarabağda sülhün və əmin-amanlığın bərqərar olacağına ümidlərimizin olduğunu ifadə etdim.

Bir sözlə, Hindistandan böyük təəssürat və xatirələrlə qayıtdım. İnanıram ki, Azərbaycan qüdrətli bir dövlət kimi öz həqiqətlərini bundan sonra da bütün dünyaya yayacaq və düşmənlərin istəyini gözlərində qoyacaqdır.

Azad ABDULLAYEV

Azərbaycan müəllimi.- 2012.- 2 noyabr.- S.11.