SDU-da bayram tədbiri

Sumqayıt Dövlət Universitetində Dövlət Bayrağı Gününə həsr olunmuş tədbir keçirildi. Tədbirdə rektor, professor Nadir Qəhrəmanov çıxış edərək universitetin müəllim və tələbə heyətini, tədbir iştirakçılarını Dövlət Bayrağı Günü və Konstitusiya Günü münasibətilə təbrik etdi. Rektor bu günün mahiyyətindən bəhs etdi, üçrəngli bayrağın dövlətçiliyimizin və müstəqilliyimizin ən əziz, ən uca atributlarından biri olduğunu bildirdi. Konstitusiya Günü barədə də danışan rektor vurğuladı ki, konstitusiyanın ölkəmizdə əsas hüquqi sənəd kimi formalaşması və möhkəmlənməsində ulu öndər Heydər Əliyevin əvəzedilməz rolu olmuşdur.

Sonra çıxış edən ümumi tarix kafedrasının müdiri, professor Şirxan Səlimov Azərbaycanın konstitusiya tarixi barədə məlumat verdi, əsas Qanunun bugünkü cəmiyyətimizdəki rolundan bəhs etdi.

Azərbaycan tarixi kafedrasının müdiri, tarix elmləri üzrə fəlsəfə doktoru, dosent Əmirxan İsayev isə Azərbaycan bayrağının keçdiyi tarixi yola nəzər saldı, bu milli atributumuzun formalaşmasının tarixi aspektləri barədə danışdı.

Daha sonra Dövlət Bayrağı Gününə həsr olunmuş bayram konserti ilə tədbir davam etdi. Tələbələrin hazırladığı səhnələr maraqla qarşılandı.

Azərbaycan müəllimi.- 2012.- 9 noyabr.- S.5.