Məktəbdə yazıçı ilə görüş

Noyabrın 3-də Bakıdakı 190 nömrəli tam orta məktəbdə yazıçı-dramaturq, Milli Məclisin deputatı Hüseynbala Mirələmovla görüş keçirildi. Tədbiri giriş sözü ilə məktəbin direktoru Afət Bakıxanova açaraq qonaqları salamladı. Məktəbin direktor müavini Qənirə Əmircanova Hüseynbala Mirələmovun yaradıcılığı barədə ətraflı danışdı.

Tədbirdə akademik Ziyad Səmədzadə çıxış edərək görüşün əhəmiyyətini yüksək qiymətləndirdi. Qeyd etdi ki, Hüseynbala Mirələmov müasir Azərbaycan incilərini bilən yazıçıdır. Onun yaradıcılığı özünəməxsus xüsusiyyətləri ilə fərqlənir.

Milli Məclisin deputatı Hadı Rəcəbli yazıçı-dramaturq Hüseynbala Mirələmovla bir sinifdə oxumalarından, hələ o vaxt orta məktəbdə oxuyarkən yaradıcılıqla məşğul olmasından söz açdı. Bildirdi ki, Hüseynbala Mirələmov yazıçı-dramaturq olmaqla bərabər, həm də millət vəkilidir. Bu gün onun dövlət məmuru kimi geniş bir iş aparması heç də yazıçının yaradıcılığına mane olmur, əksinə, yeni əsərlər üzərində həvəslə işləyir.

Təbbirdə professorlardan Nizami Cəfərov, Hüseyn Əsgərov, Nizaməddin Şəmsizadə, Əjdər Ağayev, xalq artisti Nurəddin Mehdixanlı və başqaları yazıçı-dramaturq Hüseynbala Mirələmovun əsərləri barəsində öz ürək sözlərini söylədilər.

Yazıçının əsərlərindən ibarət ədəbi kompozisiya göstərildi, şagirdlər şeir söylədi və rəqs etdilər.

Sonda Hüseynbala Mirələmov şagirdləri və qonaqları maraqlandıran suallara cavab verərək görüşü təşkil edən şəxslərə öz minnətdarlığını bildirdi.

Tədbir diskussiya şəklində başa çatdı.

Şakir CƏFƏROV

Azərbaycan müəllimi.- 2012.- 16 noyabr.- S.11.