Voleybolçu qızlar Bakı turnirində birinci yeri tutublar

Bakı şəhərindəki 15 nömrəli Uşaq-Gənclər İdman Məktəbi 1977-ci ildən fəaliyyət göstərir. Burada voleybol, basketbol, üzgüçülük, şahmat və futbol bölmələri var. Bir qədər ətraflı söhbət açmaq istədiyimiz voleybol bölməsində 162 şagird bu idman növünün sirlərinə baş məşqçi Tatyana Karijovanın rəhbərliyi altında yiyələnir.

Müxtəlif yaş qrupları üzrə yaradılmış voleybol komandasının üzvləri rayon, şəhər və respublika yarışlarında iştirak edərək qələbələr qazanırlar. Onlar ötən ilin aprel-may aylarında 1997-1998-ci illər təvəllüdlü qızlar arasında keçirilən IV Respublika oyunlarının zona final yarışlarında və 15-16 noyabr tarixlərində Azərbaycan Respublikasının Dövlət müstəqilliyinin bərpasının iyirmi illiyinə həsr olunmuş VI Spartakiada yarışlarında I yeri tutaraq diplomlarla təltif olunublar. 2012-ci ilin 20-25 mart tarixlərində isə 1998-1999-cu il təvəllüdlü qızlar arasında keçirilən VIII Respublika oyunlarının zona final yarışlarında onlar II yeri tutaraq diplom və hədiyyələrlə mükafatlandırılıblar.

Bu günlərdə 15 nömrəli UGİM-in direktoru Cəmil Fətullayevdən aldığımız məlumatda bildirilir ki, Azərbaycan Voleybol Federasiyası, Bakı Şəhər Gənclər və İdman Baş İdarəsi və Bakı Şəhəri üzrə Təhsil İdarəsi bu il 2-6 noyabr tarixlərində voleybol üzrə 1998-1999-cu illər təvəllüdlü qızlar arasında Bakı şəhər açıq turniri keçirib. Bu turnirin keçirilməsində əsas məqsəd ölkəmizdə 2012-ci ilin "İdman ili" kimi qeyd olunması, voleybol idman növünün təbliği və inkişaf etdirilməsi, xarici ölkələrin idmançıları arasında ikitərəfli əlaqələrin genişləndirilməsi və idmançıların ustalıq səviyyəsinin artırılmasıdır. 9 komandanın iştirak etdiyi bu yarış Azərbaycan Voleybol Federasiyasının zalında dairəvi sistem üzrə keçirilib.

Noyabrın 6-da başa çatan turnirdə 15 nömrəli UGİM, Sumqayıt, Qax, Xətai, Lokomativ, Sabunçu, Suraxanı, Nəqliyyat və Azərreyl komandaları iştirak edib.

Ümumilikdə 9 komanda 3 yarımqrupda mübarizə aparıb. 15 nömrəli UGİM və Lokomativ I yerə, Sumqayıt II, Azərreyl komandası isə III yerə layiq görülüb.

Azərbaycan müəllimi.- 2012.- 23 noyabr.- S.10.