Ali təhsil ocağının nümayəndə heyəti Kars Qafqaz Universitetində

Naxçıvan Müəllimlər İnstitutunun professor-müəllim heyətinin bir qrupu Türkiyə Respublikasının Kars Qafqaz Universitetində olub. Səfər zamanı institutun rektoru, professor Oruc Həsənli çıxışında bildirmişdir ki, Naxçıvan Müəllimlər İnstitutu ölkəmizin inkişafına, dövlətçiliyimizin qorunub saxlanılmasına, ona sədaqətlə qulluq edəcək, ixtisaslarına layiqincə yiyələnəcək, xalqına, millətinə daim ürəkdən bağlı olacaq vətənpərvər mütəxəssislər yetişdirməyi özünün təməl prinsipləri hesab edir.

Bunun üçün daim çalışır, müasirləşən dünyada yeni tədris proqramlarından, təlim-tərbiyə prinsiplərindən istifadə edir. Qeyd edək ki, səfər zamanı tədrisdə və işgüzar münasibətlərin qurulmasında qarşılıqlı maraqlara əsaslanan on üç maddədən ibarət protokol imzalanmışdır. Protokolda iki qardaş ölkəni təmsil edən ali təhsil ocaqları arasında əməkdaşlığın geniş istiqamətləri öz əksini tapmışdır.

Məlumat üçün deyək ki, imzalanmış protokola əsasən Naxçıvan Müəllimlər İnstitutu ilə Kars Qafqaz Universiteti müəllim, tələbə, nəşr materialları, təhsil standartları üzrə məlumatların mübadiləsi, tədrisin planlaşdırılması və strateji inkişaf məsələlərində məsləhətləşmələr, yüksək peşə təhsilinin qurulmasına yardım sahələrində yaxından əməkdaşlıq edəcəkdir.

Naxçıvan Müəllimlər İnstitutunun Mətbuat xidməti

Azərbaycan müəllimi.- 2012.- 23 noyabr.- S.4.