Azərbaycanlı tələbələrin xaricdə təhsil alması üçün geniş imkanlar yaradılıb

Kaspi Təhsil Mərkəzinin əməkdaşı Günel Abdullayeva Şimali Kiprin və Avropanın qabaqcıl universitetlərindən biri olan Doğu Akdeniz Universitetində (DAU) olmuşdur. Kaspi Təhsil Mərkəzindən AzərTAc-a bildirmişlər ki, məqsəd Şimali Kipr Türk Cümhuriyyətinin təhsil sistemi ilə yaxından tanış olmaq və DAU ilə gələcək iş strategiyasını müzakirə etmək olmuşdur.

Kaspi Təhsil Mərkəzinin əməkdaşı, həmin universitetin beynəlxalq əlaqələr şöbəsinin prorektoru, professor Məjid Hasemipourun, universitetin Azərbaycan üzrə təmsilçisi Orxan Həsənoğlunun iştirakı ilə Doğu Akdeniz Universitetinin rektoru, professor Abdullah Öztopraqla görüşmüşdür.

Görüşdə rektor ali təhsil ocağı barədə ətraflı məlumat vermişdir.

Bildirilmişdir ki, yüzlərlə azərbaycanlı gəncin hazırda təhsil aldığı Doğu Akdeniz Universiteti tələbələrə Avropa standartlarına uyğun təhsil imkanları yaradır. Universitetdə ABŞ, Kanada, Almaniya, Polşa, Çin, Fransa və digər ölkələrdən dəvət olunmuş professor-müəllim heyəti çalışır. Universitet bir çox beynəlxalq qurumların üzvüdür və dünyanın qabaqcıl ali təhsil müəssisələri ilə əməkdaşlıq edir.

Universitetin beynəlxalq əlaqələr üzrə prorektoru, professor Məjid Haşemipour azərbaycanlı gənclərin bakalavr, magistr, doktorantura proqramları üzrə türk və ingilis dillərində təhsil aldıqlarını söyləmişdir.

Görüşdə DAU-nun Azərbaycanın bir sıra təhsil ocaqları ilə rəsmi əməkdaşlıq etdiyi və bu əməkdaşlığın hər iki ölkənin təhsil ocaqlarına faydalı nəticələri vurğulanmışdır.

Kaspi Təhsil Mərkəzinin xaricdə təhsil şöbəsinin əməkdaşı Günel Abdullayeva təmsil etdiyi mərkəz barəsində ətraflı məlumat verərək gələcək planlar barədə danışmışdır.

DAU ilə qarşılıqlı əməkdaşlıqda maraqlı olduqlarını bildirən G.Abdullayeva gələcəkdə mərkəz tərəfindən ölkəmizdə hər il keçirilən beynəlxalq təhsil sərgisində bu universiteti də görmək istədiklərini bildirmişdir.

Sonda əməkdaşlığın gücləndirilməsi üçün qarşılıqlı fəaliyyətin genişləndirilməsi qərara alınmışdır.

Sonra universitetin jurnalistika fakültəsinin dekanı, professor Süleyman İrvan, idarəetmə fakültəsinin dekanı, professor Cema Tanova, ümumi fənlər və türk dili fakültəsinin dekanı, professor Rza Bəşirov, mühəndislik fakültəsinin dekanı, professor Hasan Amca ilə görüşən qonaq fakültələr barəsində geniş məlumat almışdır.

Azərbaycan müəllimi.- 2012.- 23 noyabr.- S.4.