SDU-da beynəlxalq elmi konfrans

Sumqayıt Dövlət Universitetində (SDU) bu ali məktəbin yaranmasının 50 illik yubileyi ilə bağlı keçirilən silsilə tədbirlər davam edir. Bu silsilədən Sumqayıt Dövlət Universitetində növbəti beynəlxalq elmi konfrans keçirildi.

"İnnovasiya yönümlü inkişafın sosial-iqtisadi problemləri" mövzusunda keçirilən konfransı universitetin rektoru, professor Nadir Qəhrəmanov açaraq iştirakçılara tədbirin mahiyyəti barədə məlumat verdi. Ölkəmizin sosial-iqtisadi inkişafından bəhs edən rektor xüsusilə son illərdə innovativ inkişaf meyillərinin hiss edildiyini qeyd etdi.

SDU-da bu cür tədbirlərin artıq ənənəvi xarakter daşıdığını dilə gətirən N.Qəhrəmanov bildirdi ki, bu, universitetdə keçirilən sayca 18-ci beynəlxalq konfransdır. Rektor veriləcək təkliflərin əhəmiyyətli olacağına əminliyini ifadə edərək konfransın işinə uğurlar arzuladı.

Daha sonra Rusiya Elmlər Akademiyasının İqtisadiyyat İnstitutunun Postsovet ölkələri üzrə Tədqiqat Mərkəzinin müdiri Leonid Borisoviç Vardomskiy çıxış edərək ölkəmizin müstəqillik illərində əldə etdiyi nailiyyətlərə toxundu. Natiq bildirdi ki, Azərbaycan xüsusilə son illərdə innovasiya yönümlü inkişaf yoluna çıxıb. AMEA-nın müxbir üzvü, Azərbaycan Respublikasının Prezidenti yanında Dövlət İdarəçilik Akademiyasının Regional İqtisadi və Sosial Tədqiqatlar İnstitutunun direktoru, professor Əli Nuriyev ölkəmizin yeni inkişaf mərhələsinə daxil olduğunu qeyd etdi, qabaqcıl kapitalist ölkələrinin təcrübəsindən faktlar və müqayisələr gətirdi.

Sumqayıt Dövlət Universitetinin dosenti Albert Tağıyev isə Sumqayıtda fəaliyyət göstərən və yaradılacaq texniki parkların, eləcə də ayrı-ayrı dünya ölkələrində mövcud olan texnoparkların inkişafı problemlərindən bəhs etdi.

Daha sonra çıxış edən Sumqayıt Dövlət Universitetinin dosenti, Bakı Məşğulluq İdarəsinin rəisi Şəfa Əliyev Azərbaycan iqtisadiyyatının innovasiyalaşdırılmasında xüsusi iqtisadi zonaların tətbiqinin mühüm aspektləri barədə məlumat verdi.

Növbəti gün konfrans bölmə iclaslarında işini davam etdirdi. Konfransın işinə Sumqayıt Dövlət Universitetinin prorektoru, professor Yadigar Hüseynov yekun vurdu.

Sumqayıt Dövlət Universitetinin Mətbuat xidməti

Azərbaycan müəllimi.- 2012.- 5 oktyabr.- S.4.