190 nömrəli məktəbdə işləmək mənim üçün böyük fəxrdir

Mən 2006-2010-cu illərdə ADPU-nun riyaziyyat fakültəsində riyaziyyat-informatika ixtisası üzrə təhsil almışam. Daha sonra informatika ixtisası üzrə magistraturanın əyani şöbəsinə daxil olmuş və bu il həmin universiteti bitirmişəm. Universiteti bitirdikdən dərhal sonra Təhsil Nazirliyinin müəllimlərin işə qəbulu ilə bağlı keçirəcəyi müsabiqədə iştirak etməyi qərara aldım, elektron ərizə formasını doldurdum. İyulun 27-də keçirilən imtahanda uğurlu nəticə əldə etdim.

İmtahan çox obyektiv və şəffaf şəraitdə keçirildi. Mən 34,13 balla siyahıda ilk yerdə yazdığım Səbail rayon O.Mirzəyev adına 190 nömrəli orta məktəbə qəbul olundum. Bu məktəb barəsində əvvəllər çox xoş sözlər eşitmişdim. Azərbaycan maarifinin incilərindən sayılan Sona xanım Tağıyevanın qurmuş olduğu və 60 ilə yaxın rəhbərlik etdiyi bir məktəbə işə qəbul olunmaq mənim üçün bir fəxr idi. Həmçinin məktəbin hazırkı direktoru, respublikanin əməkdar müəllimi Afət xanım Bakıxanova ilə ilk tanışlığımızda seçimimdə yanılmadığımı başa düşdüm. Məktəbdə məni elan olunmuş vakansiyadakı dərs saatları ilə tam təmin etdilər.

Məktəbə mənimlə eyni zamanda müsabiqə yolu ilə bir neçə müəllim də qəbul olunmuşdur. Məktəbin direktoru və direktor müavinlərinin bizə olan xoş münasibəti məktəb haqqındakı müsbət fikirlərimizi daha da artırdı.

Hazırda I, IV, VI, IX, X, XI siniflərdə informatika fənnini tədris edirəm. Mən və digər müsabiqə yolu ilə qəbul olunmuş müəllimlər bizə bu cür şərait yaratdıqları üçün Təhsil Nazirliyinə minnətdarlığımızı bildiririk. Biz fəxr edirik ki, respublikanın ən zəngin tarixi ənənələri olan təhsil ocağına - 190 nömrəli məktəbə işə qəbul olunmuşuq. Mən həmçinin bir daha öz adımdan və digər təzə qəbul olunmuş müəllimlər adından O.Mirzəyev adına 190 nömrəli orta məktəbin direktoru Afət Bakıxanovaya və məktəbin kollektivinə göstərdikləri isti münasibətə görə təşəkkürümü bildirirəm.

Afaq MURADOVA,

Bakı şəhər O.Mirzəyev adına

190 nömrəli tam orta məktəbin

informatika müəllimi

Azərbaycan müəllimi.- 2012.- 5 oktyabr.- S.5.