Beynəlxalq Müəllimlər Günü təntənəli şəkildə qeyd olundu

Oktyabrın 4-də Heydər Əliyev adına Sarayda Bakı Şəhəri üzrə Təhsil İdarəsinin təşkilatçılığı ilə 5 oktyabr Beynəlxalq Müəllimlər Gününə həsr olunmuş tədbir keçirildi. Tədbirdə təhsil naziri Misir Mərdanov, BŞTİ-nin müdiri Nailə Rzaquliyeva, Milli Məclisin deputatları, Təhsil Nazirliyinin nümayəndələri, təhsil müəssisələrinin direktorları, müəllimlər və başqaları iştirak edirdilər.

Tədbiri giriş sözü ilə açan BŞTİ-nin müdiri, əməkdar müəllim Nailə Rzaquliyeva peşə bayramı münasibətilə təhsil işçilərini təbrik etdi. N.Rzaquliyeva bildirdi ki, müəllim adı tarixən həmişə fədakarlıq, əzm, vətənə və millətə sevgi, insanpərvərlik anlayışları ilə birgə xatırlanıb. Müəllim olmaq ona görə şərəflidir ki, müstəqil Azərbaycanımızın gələcəyinin daha möhkəm təməllər üzərində qurulması yolunda onların əməyi ölçüyəgəlməzdir. Hörmətli Prezidentimiz İlham Əliyev cənablarının təhsilə diqqət və qayğısı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təhsilimizin himayədarı kimi yorulmaz fəaliyyəti biz təhsil işçilərini Azərbaycan xalqına və dövlətinə şərəflə xidmət etmək üçün daha da ruhlandırır.

Sonra Nailə Rzaquliyeva Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri Mehriban Əliyevanın müəllimlərə ünvanlanan təbrik məktubunu tədbir iştirakçılarının diqqətinə çatdırdı.

Tədbirdə çıxış edən təhsil naziri Misir Mərdanov ulu öndər Heydər Əliyevin adını daşıyan möhtəşəm sarayda təhsil işçilərinin peşə bayramını onlarla birlikdə qeyd etməkdən məmnunluq hissi duyduğunu bildirdi və bayram münasibətilə hər kəsi təbrik etdi. Misir Mərdanov qeyd etdi ki, hər il olduğu kimi, bu il də müəllimlərin peşə bayramı ərəfəsində Prezident İlham Əliyevin müvafiq sərəncamları ilə bir qrup təhsil işçisinə "Əməkdar müəllim" fəxri adı verilib, bir qrup təhsil işçisi isə "Tərəqqi" medalı ilə təltif edilib. Müəllim əməyinə verilən yüksək qiymətə görə ölkə Prezidenti cənab İlham Əliyevə təşəkkürünü bildirən nazir dövlət başçısının təhsilin inkişafını daim diqqət mərkəzində saxladığını vurğuladı. Hər il təhsilə ayrılan dövlət vəsaitinin artırıldığını bildirən Misir Mərdanov Azərbaycan müəlliminin əzmi, səyi nəticəsində təhsilimizin daha da inkişaf edəcəyinə inandığını söylədi. Təhsil naziri Misir Mərdanov ölkəmizdə təhsil sahəsində əldə edilən uğurlardan danışaraq Dövlət Proqramı çərçivəsində hər il yüzlərlə tələbənin dünyanın nüfuzlu universitetlərinə təhsil almaq üçün göndərilməsinin böyük əhəmiyyət daşıdığını və həmin gənclərin gələcəkdə ölkəmizdə müxtəlif sahələrin inkişafına öz töhfələrini verəcəklərinə əminliyini ifadə etdi.

Sonra tədbir bədii hissə ilə davam etdi. Bakı məktəblərinin, məktəbdənkənar təhsil müəssisələrinin istedadlı şagirdlərinin rəngarəng çıxışları maraqla qarşılandı.

Niyazi RƏHİMOV

Azərbaycan müəllimi.- 2012.- 12 oktyabr.- S.2.