"Məktəbdaxili qiymətləndirmə: problemlər və qarşıda duran vəzifələr" mövzusunda müşavirə

Oktyabrın 12-də Təhsil Nazirliyində "Məktəbdaxili qiymətləndirmə: problemlər və qarşıda duran vəzifələr" mövzusunda müşavirə keçirildi. Tədbirdə nazirliyin şöbələrinin və müvafiq struktur bölmələrinin rəhbərləri, Sumqayıt Şəhər Təhsil Şöbəsinin və Abşeron Rayon Təhsil Şöbəsinin əməkdaşları, Bakının ümumtəhsil məktəblərinin direktorları və müəllimlər iştirak edirdilər.

Təhsil naziri Misir Mərdanov tədbiri açaraq iştirakçıları salamladı. Ölkəmizdə artıq 5-ci ildir ki, kurikulum islahatlarının aparıldığını deyən nazir bu islahatların tərkib hissəsi olan məktəbdaxili qiymətləndirmə ilə bağlı görülən işlərdən söz açdı. Qeyd etdi ki, müvafiq qurumların əməkdaşları bu məsələyə çox ciddi diqqət yetirirlər.

Dörd il ərzində məktəbdaxili qiymətləndirmə ilə bağlı müəllimlər üçün təlimlərin təşkil edildiyini, monitorinqlərin aparıldığını diqqətə çatdıran təhsil naziri bildirdi ki, bu sahədə müəyyən uğurlar əldə olunub. Lakin unutmaq olmaz ki, söhbət 150 mindən çox müəllimin bu işə cəlb olunmasından gedir. Kurikulum islahatının uğurla davam etdirilməsi məktəbdaxili qiymətləndirmənin müvafiq qaydalara uyğun olaraq aparılması ilə sıx bağlıdır.

Ölkəmizin hər yerində bu işin yüksək səviyyədə təşkilinin zəruri olduğunu vurğulayan Misir Mərdanov qarşıda duran vəzifələr haqqında danışdı. Nazir qeyd etdi ki, bu günlərdə işçi qrupu yaradılmalı, qrupun üzvləri qısa müddət ərzində xarici ölkələrin təcrübəsini öyrənməli, araşdırmalı, ölkəmizin 4 illik təcrübəsini də nəzərə almaqla bütövlükdə formativ qiymətləndirmə ilə bağlı nazirliyin tövsiyələrini hazırlayaraq yerlərə çatdırmalıdır.

Sonra Təhsil Nazirliyinin Monitorinq və qiymətləndirmə şöbəsinin müdiri Təranə Hacıyeva "Məktəbdaxili qiymətləndirmə: problemlər və qarşıda duran vəzifələr" mövzusunda təqdimatı tədbir iştirakçılarının diqqətinə çatdırdı. Öncə yeni qiymətləndirməyə keçid və yeni qiymətləndirmə sisteminin hüquqi əsasları haqqında məlumat verən natiq bildirdi ki, 2003-cü ildə beynəlxalq təşkilatların köməyi və tövsiyəsi ilə məktəbdaxili qiymətləndirmənin yeni nəzəriyyəsi və icra mexanizmlərinin hazırlanmasına başlanılmış və 2008-2009-cu dərs ilində ibtidai təhsil səviyyəsində yeni qiymətləndirmə sistemi tətbiq olunmuşdur. Beynəlxalq və müəyyən qədər yerli təcrübə əsasında "Azərbaycan Respublikasının ümumtəhsil sistemində Qiymətləndirmə Konsepsiyası" hazırlanmış və Azərbaycan Respublikası Nazirlər Kabinetinin 2009-cu il 13 yanvar tarixli, 9 nömrəli qərarı ilə təsdiq edilmişdir. Konsepsiyada məktəbdaxili qiymətləndirmənin tərkib hissələrinin (diaqnostik, formativ və summativ) prinsipləri, əsas xüsusiyyətləri və mexanizmi təsbit olunmuşdur. Daha sonra təqdimatda dünya təcrübəsində yeni qiymətləndirmə, məktəbdaxili qiymətləndirmənin tərkib hissələri, ənənəvi və yeni qiymətləndirmənin səciyyəvi cəhətləri, formativ qiymətləndirmə, bu qiymətləndirmənin nəzəri əsasları, dünya ədəbiyyatında formativ qiymətləndirmə, dünyanın məşhur pedaqoqlarının bununla bağlı fikirlərindən bəhs olundu. 2010-2011 və 2011-2012-ci dərs ilində yeni qiymətləndirmə sisteminin tətbiqi ilə bağlı monitorinqlərin keçirildiyini deyən Təranə Hacıyeva araşdırmaların nəticələrini iştirakçıların diqqətinə çatdıraraq qeyd etdi ki, bu sahədə qarşıya çıxan çətinliklərin və mövcud problemlərin aradan qaldırılması məqsədilə bir sıra zəruri tədbirlər həyata keçirilmişdir. V siniflərdə dərs deyən müəllimlər üçün keçirilən təlimlərdə təlim materialının qiymətləndirmə hissəsi daha da təkmilləşdirilmiş və təlimlərin monitorinqi keçirilmiş, məktəbli kitabçası və formativ qiymətləndirməyə uyğunlaşdırılmış, formativ qiymətləndirmə jurnalının tərtib edilməsi üçün işçi qrupu yaradılmış, jurnal layihə şəklində Bakı, eləcə də Gəncə, Lənkəran və Bərdə məktəblərində ibtidai sinif müəllimləri tərəfindən sınaqdan keçirilmişdir. Sınaqdan keçirilmiş formativ qiymətləndirmə jurnalı daha da təkmilləşdirilərək çap edilmiş və 2012-2013-cü dərs ilində istifadə üçün məktəblərə paylanılmışdır. İbtidai təhsil səviyyəsi və V sinifdə tədris olunan fənlər üzrə müxtəlif qiymətləndirmə vasitələrindən ibarət vəsait hazırlanmış və çap olunmuşdur.

Növbəti bir neçə slaydda formativ qiymətləndirmə jurnalı nümayiş etdirildi və jurnaldan istifadə qaydaları, əsas xüsusiyyətlər, meyarlar üzrə qeydiyyatın aparılması və s. haqqında geniş məlumat verildi.

Daha sonra təqdimatda qiymətləndirmə sahəsində mövcud problemləri diqqətə çatdıran natiq onların aradan qaldırılması istiqamətində həyata keçiriləcək tədbirlərdən söz açdı. Bildirdi ki, bu məqsədlə müəllim fəaliyyətinin monitorinqinin, formativ qiymətləndirmənin və onun jurnalda qeydiyyatının aparılmasını təmin edən monitorinqlərin keçirilməsi, Təhsil Nazirliyinin tövsiyələri əsasında yerli təhsili idarə edən orqanlar və məktəb müəllimlərindən ibarət xüsusi komissiya tərəfindən summativ qiymətləndirmə vasitələri bankının yaradılması, formativ qiymətləndirmədə valideynlərlə əməkdaşlıq qiymətləndirmə üsuluna üstünlük verilməsi nəzərdə tutulub.

Məruzəçi təqdimatın sonunda bu məsələ ilə bağlı təkliflərini verdi.

Tədbirdə çıxış edən Təhsil Nazirliyinin Kənd rayonları üzrə ümumi təhsil şöbəsinin müdiri Aydın Əhmədov, Strateji təhlil, planlaşdırma və kadrların idarəolunması şöbəsinin müdiri Fərzəli Qədirov, Bakı Avropa Liseyinin direktoru Zülfiyyə Veysova və digərləri müzakirə olunan məsələ ilə bağlı fikirlərini bildirərək təkliflərini səsləndirdilər.

Hicran ƏKBƏROVA

Azərbaycan müəllimi.- 2012.- 19 oktyabr.- S.2.