Azərbaycan Təhsil İşçiləri Azad Həmkarlar İttifaqı Respublika Komitəsinin XVI hesabat-seçki konfransı keçirildi

Oktyabrın 10-da Azərbaycan Təhsil İşçiləri Azad Həmkarlar İttifaqı Respublika Komitəsinin XVI hesabat-seçki konfransı keçirildi.

Konfransdan əvvəl tədbir iştirakçıları Fəxri xiyabana gələrək ümummilli lider Heydər Əliyevin əziz xatirəsini ehtiramla yad etdilər, məzarı önünə gül dəstəsi qoydular. Görkəmli oftalmoloq alim, akademik Zərifə xanım Əliyevanın da məzarı ziyarət olundu. Konfrans iştirakçıları daha sonra Şəhidlər xiyabanına gedərək Azərbaycanın müstəqilliyi və ərazi bütövlüyü uğrunda şəhid olanların xatirəsini andılar, məzarları üzərinə qərənfillər düzdülər.

Konfrans Azərbaycan Respublikasının Milli Təhlükəsizlik Nazirliyinin Mədəniyyət Mərkəzində öz işinə başladı. Tədbirdə Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Mehbalıyev, Təhsil Nazirliyinin məsul işçiləri, respublikanın bütün bölgələrinin, eləcə də paytaxt rayonlarının TİAHİ komitələrinin, ali və orta ixtisas təhsili müəssisələrinin müəllim və tələbə həmkarlar ittifaqı təşkilatlarının sədrləri, bir sıra ali təhsil müəssisələrinin rektorları, tanınmış alim və pedaqoqlar, səkkiz ölkənin həmkarlar təşkilatları və beynəlxalq həmkarlar ittifaqları birliklərinin nümayəndələri iştirak edirdilər.

Öncə Azərbaycan Respublikasının Dövlət himni səsləndirildi. Ölkəmizdə təhsil sahəsində görülən işlərdən, əldə olunan nailiyyətlərdən, elm və təhsil işçilərinə dövlət tərəfindən göstərilən diqqət və qayğıdan bəhs edən filmin nümayişi konfrans iştirakçıları tərəfindən rəğbətlə qarşılandı. Azərbaycan Təhsil İşçiləri Azad Həmkarlar İttifaqı Respublika Komitəsinin XVI hesabat-seçki konfransının gündəliyi və iş qaydası təsdiq olunduqdan sonra Təhsil Nazirliyi Aparatının rəhbəri İlham Pirməmmədov təhsil naziri Misir Mərdanovun təbrikini oxudu.

Sonra Azərbaycan Təhsil İşçiləri Azad Həmkarlar İttifaqı Respublika Komitəsinin sədri, Milli Məclisin deputatı Səttar Mehbalıyevin rəhbərlik etdiyi qurumun 2006-2012-ci illər ərzində gördüyü işlərlə bağlı hesabatı dinlənildi. Səttar Mehbalıyev bildirdi ki, əsası xalqımızın ümummilli lideri Heydər Əliyev tərəfindən qoyulmuş strateji inkişaf kursunu əzmlə həyata keçirən ölkə başçısı cənab İlham Əliyevin apardığı uğurlu siyasət nəticəsində bu gün Azərbaycan sosial-iqtisadi inkişaf tempinə görə dünyanın ən öncül ölkələrindən birinə çevrilmişdir. Respublikamız inkişaf etdikcə həmkarlar ittifaqlarının da inkişaf etdiyini deyən məruzəçi dövlətimiz tərəfindən həmkarlar ittifaqı təşkilatlarının müstəqil fəaliyyət göstərə bilməsi üçün yaradılmış münbit şəraitin, ölkə rəhbərliyi səviyyəsində bu təsisatın cəmiyyət həyatındakı roluna verilən mühüm önəmin, vətəndaşların əmək hüquqları ilə bağlı qanun və qərarların qəbulu zamanı həmkarlar ittifaqı təşkilatlarının rəyinin nəzərə alınmasının onları yeni-yeni uğurların qazanılmasına ruhlandırdığını söylədi.

Qeyd olundu ki, 2006-2012-ci illəri əhatə edən hesabat dövründə ATİAHİ Respublika Komitəsi qarşıya qoyulan istiqamətlər üzrə fəaliyyət göstərərək ittifaq üzvlərinin əmək, sosial, iqtisadi hüquqlarının və qanuni mənafelərinin təmin edilməsi ilə bağlı bir sıra işlər görüb. Həmin dövrdə ATİAHİ Respublika Komitəsi Məclisinin 7, Rəyasət Heyətinin 72 iclası keçirilib. İclaslarda 649 məsələ müzakirə olunub. Bildirildi ki, ATİAHİ Respublika Komitəsi də Azərbaycanın gənclər siyasətinin fəal iştirakçılarındandır. Hesabat dövrü ərzində Respublika Komitəsi tərəfindən hər il ali məktəb tələbələri üçün bədii yaradıcılıq festivalları, müsabiqələr, fənn olimpiadaları, intellektual yarışlar, xüsusi istedada və yaradıcılığa malik gənclərin aşkarlanması və onların potensial imkanlarının genişləndirilməsi ilə bağlı tədbirlər təşkil olunmuşdur. Bu cür tədbirlər çərçivəsində tələbələrə adlı təqaüdün verilməsi xüsusi əhəmiyyət kəsb edir. 2011-2012-ci tədris ilindən başlayaraq aztəminatlı ailələrdən olan 38 tələbənin təhsil haqqının 30 faizi həmkarlar ittifaqının vəsaiti hesabına ödənilmişdir.

Milli Məclisin deputatı Səttar Mehbalıyev daha sonra rəhbərlik etdiyi qurumla Təhsil Nazirliyi arasında qurulmuş əməkdaşlıqdan, birgə həyata keçirilən tədbirlərdən də geniş söz açdı.

Məruzəsində hesabat dövrü ərzində ATİAHİ Respublika Komitəsinin gördüyü işlər barəsində konfrans iştirakçılarına ətraflı məlumat verən sədr komitənin bundan sonra da üzərinə düşən vəzifələri layiqincə yerinə yetirəcəyinə ümidvar olduğunu dedi və bu işdə hamıya uğurlar arzuladı.

Sonra ATİAHİ Respublika Komitəsinin təftiş komissiyasının hesabatı dinlənildi. Respublikanın bir sıra bölgələrinin, eləcə də paytaxt rayonlarının TİAHİ komitələrinin, ali və orta ixtisas təhsili müəssisələrinin müəllim və tələbə həmkarlar ittifaqı təşkilatlarının sədrləri fəaliyyətlərindən söz açdılar, Respublika Komitəsi ilə əməkdaşlıqlarından danışdılar.

Qeyd edək ki, konfransa respublikanın bütün bölgələrindən 181 nümayəndə seçilmişdi.

Geniş fikir mübadiləsi və diskussiya şəraitində keçən XVI hesabat- seçki konfransında ATİAHİ Respublika Komitəsinin işi qənaətbəxş hesab edildi və Səttar Mehbalıyev yekdilliklə yenidən növbəti dövr üçün komitənin sədri seçildi.

Konfransda həmçinin gündəlikdə duran digər məsələlərə də baxıldı, TİAHİ Respublika Komitəsinin yeni heyəti və təftiş komissiyası seçildi.

Tədbirdə xarici ölkələrin həmkarlar təşkilatları və beynəlxalq həmkarlar ittifaqları birliklərinin nümayəndələri də çıxış edərək ATİAHİ Respublika Komitəsinin fəaliyyətini yüksək qiymətləndirdilər, azərbaycanlı həmkarlarına xatirə hədiyyələri təqdim etdilər və qonaqpərvərliyə görə minnətdarlıqlarını bildirdilər.

Sonda Təhsil İşçiləri Azad Həmkarlar İttifaqı Respublika Komitəsinin XVI hesabat-seçki konfransı nümayəndələrinin Azərbaycan Respublikasının Prezidenti cənab İlham Əliyevə müraciəti qəbul olundu.

Samirə KƏRİMOVA

Azərbaycan müəllimi.- 2012.- 19 oktyabr.- S.9.