AMİ-də ali məktəblərin müəllimləri üçün ixtisasartırma kursları keçirilir

Azərbaycan Müəllimlər İnstitutunun əlavə təhsil üzrə prorektoru Rahim Əzizovdan aldığımız məlumatda bildirilir ki, AMİ-də keçirilən kursda 15 ali məktəbdən 68 müəllim iştirak edir. Üçaylıq kurslarda dinləyicilərin Milli Məclisin deputatları, mərkəzi icra orqanlarının rəhbərləri, aparıcı mütəxəssisləri, tanınmış elm və mədəniyyət xadimləri ilə görüşləri nəzərdə tutulmuşdur.

Kurs çərçivəsində Ağır Cinayətlərə Dair İşlər üzrə Azərbaycan Respublikası Məhkəməsinin hakimi, yazıçılar və jurnalistlər birliklərinin, Azərbaycan Teatr Xadimləri İttifaqının üzvü, tanınmış hüquqşünas Ənvər Seyidov və Azərbaycan Respublikasının Prezidenti yanında Dövlət İdarəçilik Akademiyasının professoru Fuad Məmmədovla dinləyicilərin görüşləri keçirilmişdir. Tədbirlərdə hər iki qonağın həyat və fəaliyyətindən söz açılmışdır.

Canlı diskussiya şəraitində keçən bu görüşlərdə Ə.Seyidov cəmiyyətin müxtəlif sahələrini əhatə edən hüquq məsələlərinə aid, F.Məmmədov isə kulturologiya elmi ilə əlaqədar sualları cavablandırmışlar.

Şakir CƏFƏROV

Azərbaycan müəllimi.- 2012.- 19 oktyabr.- S.9.