Qusar rayon təhsil işçilərinin sentyabr konfransı keçirildi

Sentyabrın 5-də Qusar rayonunda təhsil naziri Misir Mərdanovun iştirakı ilə rayon təhsil işçilərinin konfransı keçirildi. Konfransda Qusar Rayon İcra Hakimiyyəti başçısının müavini Elman Mustafayev, Milli Məclisin deputatı Azər Badamov, ümumi təhsil, məktəbəqədər, məktəbdənkənar tərbiyə müəssisələrinin rəhbərləri, müəllimlər, valideynlər və b. iştirak edirdilər.

Azərbaycan Respublikasının Dövlət himni səsləndirildikdən sonra konfrans öz işinə başladı.

Tədbiri giriş sözü ilə açan Qusar Rayon İcra Hakimiyyəti başçısının müavini Elman Mustafayev konfrans iştirakçılarını salamlayaraq qarşıdan gələn yeni tədris ili münasibətilə təhsil işçilərini təbrik etdi. Ümummilli lider Heydər Əliyevin Azərbaycanda hakimiyyət illərini təhsilin intibah dövrü kimi səciyyələndirən E.Mustafayev son illər ölkə başçısı cənab İlham Əliyevin diqqət və qayğısı, həmçinin Heydər Əliyev Fondunun dəstəyi ilə təhsil sahəsində aparılan köklü islahatlardan söhbət açdı.

Qusar Rayon Təhsil Şöbəsinin müdiri Niftəli Fərzəliyev "2011-2012-ci dərs ilinin yekunları və qarşıda duran vəzifələr" mövzusunda məruzə ilə çıxış etdi. Bildirdi ki, Qusar rayonunda 90 ümumtəhsil məktəbi, o cümlədən 49 tam orta, 21 ümumi orta, 21 ibtidai məktəb fəaliyyət göstərir. Ötən tədris ilində 14289 şagird təhsilə cəlb olunmuşdur. Dağ kəndlərində mövcud olan kadr çatışmazlığı haqqında danışan N.Fərzəliyev bildirdi ki, bu problem get-gedə öz həllini tapmaqdadır. Belə ki, son illər rayonda yolların xeyli yaxşılaşması və məktəblərdə maddi-texniki bazanın möhkəmlənməsi, dövlət tərəfindən tətbiq edilən həvəsləndirmə tədbirləri ucqar dağ kəndlərində işləmək həvəsində olanların sayını artırmışdır. Bunun nəticəsində son illər Sudur, Qənərçay, Zuxul, yuxarı Kalunxur kimi kənd məktəblərində ixtisaslı kadrlara olan ehtiyac ödənilmişdir.

N.Fərzəliyev qeyd etdi ki, 2012-2013-cü tədris ilindən respublikamızın dövlət ümumtəhsil məktəblərinin 5-ci siniflərində təlimin Milli Kurikuluma əsasən aparılacağını nəzərə alaraq cari ilin iyun ayının 27-dən etibarən şəhər 4 nömrəli tam orta məktəbdə müəllimlər üçün fənn kurikulumlarının tətbiqi üzrə təlim kursları təşkil olunub. Beş təşkilat tərəfindən həyata keçirilən kurslara ayrı-ayrı fənlər üzrə 606 nəfər müəllim cəlb edilib.

O bildirdi ki, "Ən yaxşı müəllim" müsabiqəsində şəhər 1 nömrəli tam orta məktəbin müəllimi Lətifə Zəkiyeva və şəhər internat-məktəbin müəllimi Mülki Babaxanov qalib olmuş və ölkə Prezidenti cənab İlham Əliyevin müvafiq sərəncamı ilə hər birinə 5000 manat pul mükafatı verilmişdir.

Qeyd edildi ki, təhsil sisteminin informasiyalaşdırılması üzrə Dövlət Proqramı çərçivəsində rayonun bütün tam orta və ümumi orta məktəbləri kompüterlərlə təchiz edilmiş, 15 məktəbə noutbuk-proyektor dəstləri verilmiş, 15 məktəb Azərbaycan Təhsil Şəbəkəsinə qoşulmuşdur. Yeni texnologiyaların tətbiqi sahəsində şəhər 2 nömrəli tam orta məktəb xüsusilə fərqlənmişdir.

Milli Məclisin deputatı Azər Badamov çıxış edərək son illər təhsil sahəsində aparılan islahatlardan danışdı. Belə tədbirlərin keçirilməsinin region üçün əhəmiyyətli olduğunu bildirən A.Badamov təhsil işçilərini yeni tədris ili münasibətilə təbrik etdi.

Tədbirdə çıxış edən təhsil naziri Misir Mərdanov təhsil işçilərini qarşıdan gələn yeni dərs ili münasibətilə təbrik edərək onlara uğurlar arzuladı. Təhsil naziri ulu öndər Heydər Əliyevin müəllimlərə xüsusi hörmət və ehtiramla yanaşdığını, hər zaman təhsilə önəm verdiyini söylədi. Nazir ümummilli liderin layiqli davamçısı, ölkə Prezidenti cənab İlham Əliyev tərəfindən Azərbaycan elminin, təhsilinin inkişafına, eyni zamanda təhsil işçilərinə göstərilən diqqət və qayğıdan, Heydər Əliyev Fondunun bu istiqamətdə həyata keçirdiyi layihələrdən danışdı.

Təhsil naziri Misir Mərdanov bildirdi ki, son illər respublikanın hər yerində olduğu kimi, Qusar rayonunda da yeni məktəb binaları tikilib istifadəyə verilib. Regionda təhsilin inkişafına göstərilən diqqəti yüksək qiymətləndirən nazir uğurlarla yanaşı, problemlərin də mövcud olduğunu nəzərə çatdırdı.

Kadrlarla bağlı məsələlərə toxunan təhsil naziri Misir Mərdanov müəllimlərin yaş senzi ilə əlaqədar yaranan problemlərə həssas yanaşmağı, gənc kadrlara şərait yaradılmasını, yaşlı müəllimlərin fəaliyyətinin isə bacarıq və qabiliyyətlərinə görə tənzimlənməsini tövsiyə etdi. Şagird-müəllim nisbətinə toxunan təhsil naziri bu məsələnin ciddi xarakter daşıdığını və dünyanın inkişaf etmiş ölkələrində olduğu kimi, respublikamızda da rasionallaşdırmaya ehtiyac duyulduğunu nəzərə çatdırdı. Yeni fənn kurikulumlarının tətbiqi üzrə öyrədici təlimlərdən keçən müəllimlər haqqında məlumat verən nazir bu sahədə işlərin mərhələli şəkildə həyata keçirildiyini vurğuladı. Valideynlərin məktəblərə cəlb olunmasının vacibliyindən danışan Misir Mərdanov tapşırıq və tövsiyələrini verdi.

Digər çıxış edənlər konfrans haqqında fikirlərini bildirdilər.

Tədbirdə 2011-2012-ci tədris ilində orta məktəbi bitirmiş və yüksək balla ali məktəblərə daxil olmuş qusarlı məzunlara hədiyyələr verildi.

Niyazi RƏHİMOV

Azərbaycan müəllimi.- 2012.- 7 sentyabr.- S.3.