Anadolu Universitetinin nümayəndə heyəti Bakı Dövlət Universitetində olub

Bakı Dövlət Universitetinin rektoru, akademik Abel Məhərrəmov Türkiyə Respublikasının Anadolu Universitetinin nümayəndə heyətini qəbul edib. Görüşdə Anadolu Universitetinin rektoru, professor Davut Aydın, rektor müavini, professor Mustafa Cavcar, Aviasiya və Kosmos Elmləri dekanı, professor Mehmet Şerif Kavsaoğlu, Azərbaycan-Türkiyə İş Adamları Birliyi İdarə Heyətinin sədri Cemal Yanğın, Türkiyə səfirliyinin II katibi Bahar Doğan iştirak ediblər.

Akademik Abel Məhərrəmov qonaqları universitetdə görməkdən məmnunluğunu ifadə edərək Türkiyə ilə Azərbaycan arasındakı dostluq, qardaşlıq əlaqələrindən, qloballaşan dünyada Azərbaycanla Türkiyənin birgə addımlamasından bəhs edib. Rektor həmçinin BDU-nun Türkiyənin bir çox universitetləri ilə əlaqəsinin olduğunu, Ankara Universitetinin hüquqşünas hazırlığı ilə bağlı ikili diplom veriləcəyini qonaqların diqqətinə çatdırıb.

Anadolu Universitetinin rektoru, professor Davut Aydın, öz növbəsində Azərbaycanın ilk ali təhsil müəssisəsi olan Bakı Dövlət Universitetində olmasından qürur hissi duyduğunu bildirərək Anadolu Universiteti haqqında ətraflı məlumat verib.

Rektor Davut Aydın səfərdə əsas məqsədin BDU və Anadolu Universiteti arasında əməkdaşlıq əlaqələri yaratmaqdan ibarət olduğunu söyləyib. Söhbət zamanı bununla bağlı bir sıra məsələlər də müzakirə edilib.

Daha sonra qonaqlar universitetlə yaxından tanış olmaq məqsədilə Nanoaraşdırmalar, Nüvə Maqnit Rezonans, Ekoloji monitorinq üzrə elmi-tədris laboratoriyalarında, Heydər Əliyev muzeyində, Elektron Tədris Mərkəzində olublar.

BDU-nun Mətbuat və informasiya şöbəsi

Azərbaycan müəllimi.- 2012.- 7 sentyabr.- S.3.