Bakı şəhəri təhsil işçilərinin konfransı keçirildi

Sentyabrın 10-da Bakıdakı "Hyatt Regensy" otelinin Quba zalında Bakı şəhəri təhsil işçilərinin konfransı keçirildi.

Konfrans başlanmazdan əvvəl nümayəndələr Fəxri xiyabana gələrək ümummilli lider Heydər Əliyevin əziz xatirəsini ehtiramla yad etdilər, məzarı önünə gül dəstəsi qoydular. Görkəmli oftalmoloq alim, akademik Zərifə xanım Əliyevanın da məzarı ziyarət olundu.

Konfransda təhsil naziri Misir Mərdanov, Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Mirzə Cəfərzadə, Nizami Rayon İcra Hakimiyyətinin başçısı Tahir Budaqov, paytaxtın bir sıra rayonlarının icra hakimiyyətlərinin nümayəndələri, ümumtəhsil məktəblərinin, məktəbdənkənar müəssisələrinin rəhbərləri, müəllimlər, müxtəlif dövlət və qeyri-hökumət təşkilatlarının təmsilçiləri, alim və pedaqoqlar, müəllimlər, KİV nümayəndələri iştirak edirdilər.

Azərbaycan Respublikasının Dövlət himni səsləndirildikdən sonra konfrans öz işinə başladı.

"2011-2012-ci dərs ilinin yekunları və qarşıda duran vəzifələr" mövzusunda məruzə-təqdimatla çıxış etmək üçün söz Bakı Şəhəri üzrə Təhsil İdarəsinin müdiri Nailə Rzaquliyevaya verildi.

Qarşıdan gələn yeni dərs ili münasibətilə konfrans iştirakçılarını təbrik edən Nailə xanım ölkə iqtisadiyyatının dinamik inkişafının keyfiyyətli təhsil üçün əlverişli şərait yaratdığını söylədi. Qeyd etdi ki, təhsili Azərbaycanın davamlı inkişafının əsas amillərindən biri hesab edən Azərbaycan Respublikasının Prezidenti cənab İlham Əliyev onun inkişafına, dünyanın qabaqcıl ölkələrinin təhsil səviyyəsinə yüksəldilməsinə böyuk diqqət və qayğı göstərir. Məhz bu diqqət və qayğı sayəsində Azərbaycan təhsili son illər özünün yeni inkişaf dövrünə qədəm qoymuş, bu sahədə xeyli nailiyyətlər əldə edilmişdir.

Rəhbərlik etdiyi qurumun yarandığı ilk gündən fəaliyyətini təhsilin keyfiyyətinin yüksəldilməsinə yönəltdiyini deyən Nailə Rzaquliyeva görülən işlər barədə konfrans iştirakçılarına geniş məlumat verdi. Bildirildi ki, hazırda Bakı Şəhəri üzrə Təhsil İdarəsinin tabeliyində 316 orta, 3 əsas, 5 yardımçı, 1 evdə təhsil, 5 cəzaçəkmə müəssisəsində axşam məktəbi var. Həmin məktəblərdə 29870 müəllim 311695 şagirdin təlim-tərbiyəsi ilə məşğul olur.

Bu tədris ilində Bakı şəhərində 5 yeni məktəb binası inşa edilmişdir. 32 məktəbdə şagird sıxlığının aradan qaldırılması üçün əlavə korpus tikilərək istifadəyə verilmiş, 68 məktəbdə əsaslı təmir işləri aparılmışdır. 3 məktəbin istilik sistemi təmir edilmiş, 2 məktəbə qaz xətti çəkilmişdir.

Məktəblərə 221 adda 477830 nüsxə dərslik, 32 adda 2893 nüsxə dərs vəsaiti verilmişdir.

Nailə xanım çıxışında daha sonra qeyd etdi ki, qabaqcıl təhsil işçilərinin əməyinin qiymətləndirilməsi təhsilin keyfiyyətcə yüksəlməsinə təkan verib. Belə ki, ölkə başçısı cənab İlham Əliyevin müvafiq sərəncamına uyğun olaraq keçirilən "Ən yaxşı ümumtəhsil məktəbi" və "Ən yaxşı müəllim" müsabiqələri cəmiyyətdə çox böyük və mühüm hadisə kimi qiymətləndirilir. Həmin müsabiqələr məktəblər və müəllimlər arasında sağlam rəqabəti, innovativ fəaliyyətə istiqamətlənmiş yaradıcılıq və təşəbbüskarlıq meyillərini gücləndirir. Bu il Bakı şəhərinin 20 məktəbi "Ən yaxşı ümumtəhsil məktəbi", 51 müəllim isə "Ən yaxşı müəllim" adına layiq görülüb.

Xüsusi istedada malik uşaq və yeniyetmələrin aşkara çıxarılması və inkişaf etdirilməsi ilə bağlı təhsil müəssisələrində müxtəlif mövzularda keçirilən silsilə tədbirlərdən bəhs edən Bakı Şəhəri üzrə Təhsil İdarəsinin müdiri həmçinin şagirdlərin fənn olimpiadalarının respublika turunda əldə etdikləri nailiyyətlərdən, beynəlxalq səviyyəli idman yarışlarında müvəffəqiyyətli çıxışlarından da söz açdı. Məktəbdənkənar təhsil müəssisələrinin səmərəli fəaliyyətini, buranın yetirmələrinin qazandıqları uğurları konfrans iştirakçılarının diqqətinə çatdırdı.

Qeyd edildi ki, bu il də ali məktəblərə tələbə qəbulunda Bakı məktəbləri məzunlarının xüsusi çəkisi artıb. Belə ki, 2012-ci ildə məzunların 51,83 faizi tələbə adını qazanıb. Bu göstərici keçən illə müqayisədə 5 faiz, 2006-cı illə müqayisədə 17 faiz artmışdır.

Bakı Şəhəri üzrə Təhsil İdarəsinin təşkilatçılığı və Bakcell şirkətinin sponsorluğu ilə Heydər Əliyev adına İdman-Konsert Kompleksində keçirilən və 5 minə yaxın məzunun iştirak etdiyi builki "Məzun-2012" tədbirinin də yaddaqalan bir hadisəyə çevrildiyini deyən məruzəçi burada təhsildə fərqlənmiş gənclərin mükafatlandırıldığını söylədi.

Təhsilin inkişafında, onun keyfiyyət göstəricilərinin yüksəldilməsində metodik işin təşkilinin mühüm rol oynadığını deyən Bakı Şəhəri üzrə Təhsil İdarəsinin müdiri ötən dərs ili ərzində 311 məktəbdə metodik işlər, elektron dərsliklər və İKT-dən istifadə, o cümlədən 150 məktəbdə illik proqram materiallarının yerinə yetirilməsi ilə əlaqədar mövcud vəziyyətin öyrənildiyini, konkret istiqamətlərdə metodik köməkliyin göstərildiyini bildirdi. Qeyd etdi ki, məktəblərimizdə "Elektron məktəb" layihəsi bir neçə ildir həyata keçirilir. Artıq 23 nömrəli məktəb və 20 nömrəli məktəb-lisey tam olaraq elektron təhsilə keçmişdir. Digər məktəblərin elektron jurnallara keçidi istiqamətində hazırlıqlar başa çatmaq üzrədir. Müəllimlərin İKT üzrə savadlılığının yüksəlməsi tezliklə paytaxtın bütün məktəblərində elektron məktəbə keçidin başa çatmasına imkan yaradacaqdır.

Məruzəçi daha sonra təlimin yeni məzmunu, müasir pedaqoji texnologiyaların öyrənilməsi və tətbiqi ilə bağlı keçirilən tədbirlərdən danışdı. Yaradıcılığa meyilli gənc müəllimlərin aşkar edilməsi, onların yaradıcılığının məqsədyönlü, ardıcıl və sistemli şəkildə inkişaf etdirilməsi üçün vaxtaşırı metodik köməklik göstərilməsinin daim diqqət mərkəzində saxlanıldığını dedi.

Məruzə-təqdimatında ötən dərs ilində görülən işlərdən, qazanılan uğurlardan geniş danışan Nailə Rzaquliyeva müəyyən nöqsan və çatışmazlıqları da ətraflı təhlil edərək onların aradan qaldırılması üçün bir sıra mühüm tədbirlərin həyata keçiriləcəyini qeyd etdi. 2012-2013-cü dərs ilində əsas devizlərinin təhsilin keyfiyyət göstəricilərinin yüksəldilməsi olduğunu söyləyən Bakı Şəhəri üzrə Təhsil İdarəsinin müdiri bu məqsədə çatmaq üçün bütün təhsil işçilərinin öz bilik və bacarıqlarını əsirgəməyəcəklərinə ümidvar olduğunu bildirdi.

Sonra məruzə ətrafında çıxışlar oldu. "Ən yaxşı ümumtəhsil məktəbi" müsabiqəsinin qalibi, Bakı şəhərindəki 141 nömrəli tam orta məktəbin direktoru Fərəh Hüseynova, 1 nömrəli İxtisaslaşdırılmış Olimpiya Ehtiyatları Uşaq-Gənclər Şahmat-Dama İdman Məktəbinin məşqçi-müəllimi Fərid Abbasov, 20 nömrəli məktəb-liseyin VMA-nın prezidenti Cülnarə Aslanova, "Ən yaxşı müəllim" müsabiqəsinin qalibi, 144 nömrəli tam orta məktəbin müəllimi Aksana Səfərova, Nizami Rayon İcra Hakimiyyətinin başçısı Tahir Budaqov çıxış edərək ötən müddət ərzində Bakı Şəhəri üzrə Təhsil İdarəsinin təhsilin inkişafı istiqamətində gördüyü işləri yüksək dəyərləndirdilər, ölkənin təhsil sistemində qazanılan uğurlardan, görülən işlərdən söz açdılar. Bakıdakı 72 nömrəli liseyin məzunu - qəbul imtahanlarında 700 bal toplamış Xeyransa Məmmədova belə bir yüksək nəticənin əldə olunmasında onun üzərində böyük əməyi olan müəllimlərinə və valideynlərinə öz minnətdarlığını bildirdi.

Konfransda təhsil naziri Misir Mərdanov çıxış edərək bütün təhsil işçilərini qarşıdan gələn "Bilik günü" münasibətilə təbrik etdi, onlara işlərində yeni-yeni uğurlar arzuladı.

Nazir ümummilli lider Heydər Əliyevin layiqli davamçısı, ölkə başçısı cənab İlham Əliyev tərəfindən Azərbaycan təhsilinin, elminin inkişafına, eyni zamanda təhsil işçilərinə göstərilən diqqət və qayğıdan danışaraq ölkədə əlverişli təlim mühitinin yaradılması istiqamətində çox mühüm işlərin görüldüyünü bildirdi. Təhsilə ayrılan büdcə vəsaitinin onun inkişafına yönəlmiş xərclərinin ilbəil artdığını söyləyən təhsil naziri bununla bağlı statistik rəqəmləri təhsil işçilərinin diqqətinə çatdırdı.

Nazir ölkəmizdə məktəb infrastrukturunun yeniləşdirilməsi, maddi-texniki bazasının gücləndirilməsi istiqamətində görülən işlər barədə də geniş məlumat verdi. Qeyd olundu ki, ötən dərs ilində respublika üzrə ümumilikdə 50000 şagird yerlik 167 yeni məktəb istifadəyə verilib. Bunlarla yanaşı, 103 məktəb əsaslı təmir olunub, 21 məktəb üçün əlavə korpuslar inşa edilib.

Təhsil sahəsində görülən işlərdən, həyata keçirilən tədbirlərdən ətraflı bəhs edən nazir Misir Mərdanov müəllimlik peşəsinin şərəfli, eyni zamanda çətin və məsuliyyətli olduğunu bildirdi. Müəllimlərin peşəkarlıq səviyyəsindən, bilik və bacarıqlarından, bu gün müasir müəllimə verilən tələblərdən danışan təhsil naziri fikirlərini konfrans iştirakçıları ilə bölüşdü.

Çıxışında bir sıra həlli vacib məsələlərə də toxunan nazir Misir Mərdanov bununla bağlı mülahizələrini söylədi, konfrans iştirakçılarına dəyərli tövsiyələr verdi.

Konfransın sonunda ölkəmizdə təhsil sahəsində görülən işlərdən, əldə olunan nailiyyətlərdən bəhs edən filmin nümayişi iştirakçılar tərəfindən rəğbətlə qarşılandı.

Samirə KƏRİMOVA

Azərbaycan müəllimi.- 2012.- 14 sentyabr.- S.6.