Xırdalan şəhərində 5 nömrəli tam orta məktəbin yeni binası istifadəyə verilib

Abşeron rayonunun Xırdalan şəhərində 5 nömrəli tam orta məktəbin yeni binası istifadəyə verilmişdir.

Bu münasibətlə keçirilən mərasimdə təhsil naziri Misir Mərdanov, Abşeron Rayon İcra Hakimiyyətinin başçısı Zakir Fərəcov, Milli Məclisin deputatı Arif Alışanov iştirak etmişlər.

Mərasim məktəblilərin ifasında Azərbaycanın Dövlət himninin oxunması ilə açılmışdır. Bayram tədbirində çıxış edənlər respublikanın sürətli inkişafından, yeni məktəb binalarının tikintisindən, təhsildə qazanılan uğurlardan danışmışlar.

Nəhayət, mühüm an gəlib çatmış, qırmızı lent kəsilmişdir. Məktəb zəngi çalınmış və şagirdlər, o cümlədən birinci sinifdə oxuyacaq uşaqlar yeni məktəb binasının astanasına qədəm qoymuşlar. Qonaqlar siniflər, fənn kabinetləri, idman və akt zalları, tibb məntəqəsi və digər otaqlarla tanış olmuşlar.

Dördmərtəbəli məktəb binası köhnə məktəb binasının yerində ucaldılmışdır. Doqquzillik məktəb ilk şagirdlərini 1997-ci ildə qəbul etmişdir. 2002-ci ildə tam orta məktəbə çevrilmişdir. Lakin şagirdlərin çoxluğu tədris prosesində problemlər yaradırdı. Hazırda məktəbdə 967 şagird təhsil alır, 93 müəllim çalışır.

Azərbaycan müəllimi.- 2012.- 21 sentyabr.- S.4.