Tanınmış vokalistdən ustad dərsi

Azərbaycan Dövlət Akademik Opera və Balet Teatrının solisti, əməkdar artist Samir Cəfərov Naxçıvan Dövlət Universitetində incəsənət fakültəsinin tələbələri üçün növbəti ustad dərsi keçmişdir.

Dərsdən öncə universitetin rektoru, akademik İsa Həbibbəyli tanınmış sənətkarı salamlayaraq Azərbaycan vokal sənətinin, milli operanın müasir inkişaf səviyyəsindən danışmışdır. 2002-ci ildə Prezident Heydər Əliyevin xeyir-duası ilə Moskva şəhərində Qalina Vişnevskaya adına Opera Mərkəzində təhsil alan, eyni zamanda İtaliya musiqi məktəbindən də bəhrələnən, bir çox beynəlxalq müsabiqələrdə Azərbaycanı layiqincə təmsil edən Samir Cəfərovun yaradıcılığını yüksək qiymətləndirən rektor onun bugünkü Azərbaycan vokal sənətində zirvədə dayandığını vurğulamışdır. Qeyd olunmuşdur ki, Samir Cəfərov Azərbaycan Dövlət Akademik Opera və Balet Teatrında C.Verdinin "Traviata" operasında Alfred rolunu, "Riqoletto" operasında Duka rolunu, Ü.Hacıbəylinin "Koroğlu" operasında Koroğlu rolunu müvəffəqiyyətlə yaratmış, vokal sənətini uğurla tədris etməkdədir.

İncəsənət fakültəsinin dekanı, Naxçıvan Muxtar Respublikasının əməkdar artisti Mübariz Əsgərov çıxışında Samir Cəfərovun onun sənət taleyindəki rolundan, belə ustad dərslərinin keçirilməsinin əhəmiyyətindən danışmışdır.

Samir Cəfərov çıxış edərək istedadların üzə çıxarılmasında, onlara peşəkarlığın sirlərinin öyrədilməsində, xalqa tanıdılmasında var qüvvəsini əsirgəməyəcəyini bildirmişdir.

Sonra tələbələrin ifasında rəngarəng mahnılar səslənmiş, tanınmış vokalist onlara ifaçılıqla bağlı əhəmiyyətli tövsiyələr vermişdir. Gələcək ifaçılar səs diapazonuna uyğun repertuar seçimi, düzgün tələffüz və vurğu, boğazların və xırdalıqların yerli-yerində edilməsi, səhnə mədəniyyəti ilə bağlı zəruri tövsiyələr almışlar.

Məşhur müğənninin ifa etdiyi Üzeyir Hacıbəylinin "Koroğlu" operasından Koroğlunun ariyası, Tofiq Quliyevin sevilən bəstələrindən olan "Qızıl üzük" mahnısı böyük sevgi ilə qarşılanmışdır.

Mehriban SULTAN

Azərbaycan müəllimi.- 2012.- 13 yanvar.- S.4.