Azadlıq mücahidləri "Tərəqqi" liseyində ədəbi-bədii kompozisiya və "dəyirmi masa" tədbiri ilə anıldı

Xalqımızın azadlıq mübarizəsi tarixinə qanla yazılmış qəhrəmanlıq səhifəsi kimi düşmüş 20 Yanvar faciəsinin iyirmi ikinci ildönümü ölkəmizin bütün idarə və müəssisələrində, təhsil ocaqlarında olduğu kimi paytaxtdakı İ.Hacıyev adına "Tərəqqi" texniki-humanitar təmayüllü liseydə də silsilə tədbirlərlə qeyd olundu. Bu məqsədlə liseydə 20 Yanvar hadisələrinə həsr olunmuş şagirdlərin əl işlərindən və rəsm əsərlərindən ibarət stendlər hazırlanmış, sinif divar qəzetləri buraxılmış, şagirdlər tərəfindən referatlar, inşa yazıları yazılmış, dərslər keçilmiş, şagirdlərin Şəhidlər xiyabanına ziyarəti təşkil olunmuşdur.

Yanvarın 18-də liseydə faciə qurbanlarının xatirəsinə həsr olunmuş anım mərasimi və şagirdlərin 20 Yanvar hadisələrinə dair nə bildiklərini, həmin hadisələrə necə qiymət verdiklərini nümayiş etdirən "dəyirmi masa" keçirildi. Anım mərasimi və "dəyirmi masa"nın keçirildiyi geniş konfrans zalında şəhidlərin xatirəsinə guşə yaradılmış, şagirdlər tərəfindən yazılmış referatların nümayişi təşkil olunmuşdu.

Liseyin həm Azərbaycan, həm də rus bölməsi üzrə II-dən başlamış XI-dək müxtəlif siniflərində təhsil alan şagirdlərin hazırladıqları həmin referatlarda faciənin başvermə səbəbləri, onun ürəkağrıdan statistikası, faciəyə verilən qiymət, o vaxt Moskvada yaşayan ulu öndər Heydər Əliyevin faciə ilə bağlı verdiyi bəyanat və s. məsələlər öz əksini tapmışdır.

Anım mərasimi şəhidlərin ruhunun bir dəqiqəlik sükutla yad olunması və Dövlət himninin ifası ilə başlandı. Proyektor vasitəsi ilə lövhədə "Qanlı Yanvar" sözləri yazılmış slayd, Şəhidlər xiyabanından görüntülər nümayiş olundu. Həzin musiqi ilə müşayiət olunan nümayiş gedə-gedə növbə ilə çıxış edən şagirdlər 20 Yanvar hadisələri haqqında məlumat verdilər. Qeyd olundu ki, 20 Yanvarda törədilən qanlı qırğın xalqımızın azadlıq ruhunu sarsıtmaq üçün mənfur Sovet imperiyasının rəhbərləri tərəfindən düşünülmüş şəkildə həyata keçirilmişdir. O vaxt fövqəladə vəziyyət elan olunmadan Azərbaycana qoşun yeridilmiş, Bakıda və ölkənin müxtəlif regionlarında əliyalın əhaliyə qanlı divan tutulmuşdur. Tarixdə misli-bərabəri olmayan bu faciə nəticəsində 131 adam şəhid olmuş, yüzlərlə adam yaralanmış və itkin düşmüşdür.

Ünlü şairimiz Bəxtiyar Vahabzadənin şəhidlərə həsr olunmuş şeiri ifa olundu. Sonra şagirdlərdən Bilqeyis Axundova (VII "a"), Nərmin Əfəndizadə (VIII "a"), Nərmin Təhməzli (VIII "a") çıxış edərək bildirdilər ki, 20 Yanvar Azərbaycan tarixində qanla yazılmış bir səhifədir, ancaq o təkcə faciə deyil. Bu tarix Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanışı günü idi. Bu tarix uzun illər Sovet imperiyasının tərkibində qalan Azərbaycan xalqının öz suverenliyi və azadlığı uğrunda əsl cəsarət nümayiş etdirdiyi bir tarixdir. Bu tarix həm də kimin kim olduğunu göstərən növbəti bir imtahan idi.

1990-cı il 20 Yanvar hadisələrindən artıq 22 il keçir. Keçmiş Sovet dövlətinin həmin gün Azərbaycan xalqına qarşı həyata keçirdiyi bu terror aktı insanlara qarşı törədilmiş ən ağır cinayətlərdən biri kimi bəşər tarixində qara səhifə olaraq qalacaqdır.

Çıxışlarda o da qeyd olundu ki, ulu öndər Heydər Əliyev faciənin baş verdiyi günün səhəri - yanvarın 21-də Azərbaycanın Moskvadakı nümayəndəliyinə gələrək baş verən hadisələrə öz kəskin etirazını bildirmiş, onu xalqımıza qarşı soyqırımı kimi qiymətləndirmişdir.

Liseyin IX "a" sinif şagirdi Baba Abbasovun tarda, VI "b" sinif şagirdi Zərnigar Nəbiyevanın isə sazda ifa etdikləri həzin musiqi nömrələri anım mərasiminin ən təsirli anları kimi yadda qaldı. Mərasimdə liseyin istedadlı şagirdləri 20 Yanvar hadisələrinə, şəhidlərə həsr olunan çoxlu şeir söylədilər, faciə ilə bağlı öz fikirlərini bildirdilər. Anım mərasimi uşaqların ifasında "Axı biz neyləmişik?", "Ağla, qərənfil, ağla", "Bir kərə yüksələn bayraq" şeirləri, "Qalx ayağa millətim", "Şəhidlər" mahnıları, şagirdlərin vətəni qorumağa hər zaman hazır olduqlarını bildirmələri və Azərbaycan Respublikasının Prezidenti İlham Əliyevin "Güclü Azərbaycan hamımızın qürur mənbəyidir" sözlərini xorla səsləndirmələri ilə başa çatdı.

Mərasimin sonunda çıxış edən "Tərəqqi" liseyinin direktoru Məhbubə Məmmədova şagirdlərin çıxışını yüksək qiymətləndirib onların hamıya həyəcanlı anlar yaşatdığını bildirdi. Kədərli, hüznlü bir gündə həm də sevindiyini söyləyən direktor bu sevinci şagirdlərin vətənpərvərlik ruhunda tərbiyəsi istiqamətində liseylərində aparılan işlərin bu gün nəticəsini görməsindən yarandığını, şagirdlərin timsalında azadlıq mücahidlərinin ardıcıllarının yetişməsinin onda məmnunluq hissi doğurduğunu vurğuladı. O qanlı-qadalı günləri bir daha görməməyimiz, azadlığımızın, müstəqilliyimizin daimi olması üçün ulu öndərimiz Heydər Əliyevə borclu olduğumuzu söyləyən M.Məmmədova bu gün müstəqil Azərbaycanımızın möhtərəm Prezidentimiz İlham Əliyevin müdrik, uzaqgörən siyasəti nəticəsində uğurla inkişaf etdiyini, dünya dövlətləri sırasında layiqli yer tutduğunu vurğuladı, müəllimlərə, şagirdlərə möhtərəm Prezidentimizin apardığı uğurlu siyasəti daim dəstəkləməyi tövsiyə etdi, tədbirin hazırlanmasında əməyi olan müəllimlərə minnətdarlığını bildirdi.

Anım mərasimi başa çatdıqdan sonra "dəyirmi masa" ətrafında müzakirələr aparıldı. Tədbiri liseyin tarix müəllimi Sevda Yarmetova açıb onun məram və məqsədləri barədə məlumat verdikdən sonra şagirdlər çıxış edərək 20 Yanvar hadisələri ilə bağlı öz fikir və mülahizələrini bildirdilər, faciənin başvermə səbəblərindən danışdılar, onu heç vaxt unutmayacaqlarını söylədilər.

Tədbir şagirdlərin şəhidlərin ruhuna and içmələri ilə yekunlaşdı.

Yusif ƏLİYEV

Azərbaycan müəllimi.- 2012.- 20 yanvar.- S.5.