VII Beynəlxalq Layihə Olimpiadasında Azərbaycan məktəbliləri iyirmi altı medal qazandılar

Aprelin 6-da Heydər Əliyev adına İdman-Konsert Kompleksində ekologiya və təbiəti mühafizə problemlərinə həsr olunan "Ətraf mühitin mühafizəsi" VII Beynəlxalq Layihə Olimpiadasının (İnepo-Euroasia) qaliblərinin mükafatlandırılması mərasimi keçirildi.

Tədbirdə müvafiq dövlət qurumlarının nümayəndələri, Milli Məclisin deputatları, qeyri-hökumət təşkilatlarının təmsilçiləri, respublikanın orta ümumtəhsil məktəblərinin direktorları, görkəmli alim və pedaqoqlar iştirak edirdilər.

Azərbaycan Respublikasının Dövlət himni səsləndirildikdən sonra çıxış üçün söz alan Azərbaycan-Türkiyə Özəl Liseyləri Baş İdarəsinin rəisi, "Ətraf mühitin mühafizəsi" VII Beynəlxalq Layihə Olimpiadasının (İnepo-Euroasia) təşkilat komitəsinin sədri Məsud Kurnaz olimpiada haqqında ətraflı məlumat verdi. Bildirildi ki, 2007-ci ildən 17 ölkənin iştirakı ilə Bakıda keçirilməyə başlayan adıçəkilən beynəlxalq yarışa qatılmaq istəyənlərin sayı ildən-ilə artaraq bu il 45-ə çatmışdır. İdarə rəisi olimpiadanın əhəmiyyətinə xüsusi toxunaraq onun dünyada, o cümlədən Azərbaycanda mövcud olan ekoloji problemlərin həlli və ətraf mühitin mühafizəsi istiqamətində böyüməkdə olan gənc nəslin məlumatlandırılmasında, ekoloji biliklərin artırılmasında müsbət rol oynadığını qeyd etdi. Tədbirin açılış mərasimində Heydər Əliyev Fondunun vitse-prezidenti, "Ətraf Mühitin Mühafizəsi Fəaliyyəti üzrə Beynəlxalq Dialoq"-IDEA-nın rəhbəri Leyla xanım Əliyevanın iştirakının olimpiada iştirakçılarının hafizəsində əlamətdar hadisə kimi qalacağını deyən Məsud Kurnaz keçirilən bu nüfuzlu yarışın ulu öndər, dahi şəxsiyyət Heydər Əliyevin anadan olmasının 90 illiyinə həsr olunduğunu bildirdi.

Layihə olimpiadasının eyni zamanda ölkəmizin tanıdılmasına, Azərbaycan həqiqətlərinin təbliğinə, dünya məktəbliləri arasında dostluğun yaranmasına xidmət etdiyini vurğulayan təşkilat komitəsinin sədri tədbirin yüksək səviyyədə keçirilməsində dəstək olan dövlət qurumlarının və təşkilatların hər birinə təşəkkürünü bildirdi.

Sonra mərasim iştirakçıları beynəlxalq layihə olimpiadasının yaranma tarixindən və məzmunundan bəhs edən filmə tamaşa etdilər.

Layihə olimpiadasının adları açıqlanan qalib məktəbliləri səhnəyə dəvət olundu. 4 kateqoriya- ətraf mühit, enerji, mühəndislik və sosial elmlər üzrə keçirilən beynəlxalq layihə olimpiadasında Azərbaycan məktəbliləri 5 qızıl, 8 gümüş,13 bürünc olmaqla bütövlükdə 26 medal qazandılar. Bundan başqa, Azərbaycan Respublikası Dövlət Neft Şirkətinin təsis etdiyi xüsusi mükafat da olimpiadaya təqdim etdikləri layihələrin mövzusunun aktuallığı ilə seçilən azərbaycanlı məktəblilərə nəsib oldu. Yarışa xarici ölkələrdən qatılan şagirdlər də müvafiq yerlər tutaraq medallara sahib oldular.

Olimpiada qaliblərinə mükafatları Azərbaycan Respublikasının təhsil naziri Misir Mərdanov, Milli Məclisin deputatı Qənirə Paşayeva, Türkiyənin ölkəmizdəki səfiri İsmail Alper Coşkun, ekologiya və təbii sərvətlər nazirinin müavini Firdovsi Əliyev, "Çağ" Öyrətim İşlətmələri Şirkəti İdarə Heyətinin sədri Ənvər Özərən, Azərbaycan Respublikası Dövlət Neft Şirkətinin vitse-prezidenti Rəfiqə Hüseynzadə təqdim etdilər.

Təhsil naziri Misir Mərdanov çıxış edərək beynəlxalq layihə olimpiadasının ölkəmizdə məktəblilər arasında indiyə qədər keçirilən bilik yarışmaları arasında coğrafiyasına görə ən geniş yarışma olduğunu söylədi. Qeyd olundu ki, bu tədbir müxtəlif ölkələrdən gəlmiş bilikli və bacarıqlı şagirdlərin seçilməsinə, onların gələcək inkişafına zəmin yaradır. Bu biliklərin bacarıqlara çevrildiyini göstərən bir olimpiadadır. Nazir daha sonra yaxın keçmişə nəzər salaraq Azərbaycanda ekoloji problemlərin həlli ilə bağlı ilk addımların ümummilli lider Heydər Əliyevin təşəbbüsü ilə atıldığını bir daha mərasim iştirakçılarına xatırlatdı.

Ulu öndər Heydər Əliyevin anadan olmasının 90 illiyinə həsr edilmiş "Ətraf mühitin mühafizəsi" VII Beynəlxalq Layihə Olimpiadasına 45 ölkədən 500-ə yaxın məktəblinin qatılmasının təqdirəlayiq hal olduğunu bildirən nazir iştirak etmək istəyənlərin sayının ildən-ilə artmasını ölkə başçısı cənab İlham Əliyevin respublikamızda ekologiya problemlərinə diqqətinin nəticəsi kimi dəyərləndirdi.

Ölkə Prezidentinin həyata keçirdiyi uğurlu daxili və xarici siyasət nəticəsində müstəqil Azərbaycanın paytaxtı Bakı şəhərində hər il çoxlu sayda beynəlxalq tədbirlərin yüksək səviyyədə keçirildiyini qeyd edən təhsil naziri bu layihə olimpiadasının da uğurla başa çatmasından məmnunluq hissi keçirdiyini söylədi.

Çıxışında Azərbaycan Respublikasının Prezidenti cənab İlham Əliyevin, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatu Mehriban xanım Əliyevanın, Heydər Əliyev Fondunun vitse-prezidenti Leyla xanım Əliyevanın ətraf mühitin mühafizəsi məsələlərinə və ekoloji problemlərin həllinə daim xüsusi önəm verdiklərini deyən nazir Misir Mərdanov sonda tədbirin təşkilində əməyi olanlara minnətdarlığını bildirdi, olimpiada iştirakçılarına və qaliblərə ən xoş arzularını çatdırdı.

Türkiyənin Azərbaycandakı səfiri İsmail Alper Coşkun öz ölkəsi ilə Azərbaycan arasındakı dostluq əlaqələrindən söz açaraq müstəqil respublikamızın gündən-günə inkişaf etdiyini, çoxlu sayda uğurlara imza atdığını bildirdi. Səfir hər iki dövlətin münasibətlərinin inkişafında ulu öndər Heydər Əliyevin, onun siyasi kursunu layiqincə davam etdirən Azərbaycan Respublikasının Prezidenti cənab İlham Əliyevin əvəzsiz xidmətlərini xüsusi qeyd etdi.

"Çağ" Öyrətim İşlətmələri Şirkəti İdarə Heyətinin sədri Ənvər Özərən məktəblilərin "Ətraf mühitin mühafizəsi" VII Beynəlxalq Layihə Olimpiadasının əhəmiyyətindən danışdı. Bildirdi ki, Azərbaycan dünyanın müxtəlif ölkələrində təşkil olunan fənn olimpiadalarında uğurla iştirak edir, bununla yanaşı həmçinin müxtəlif mövzularda keçirilən bilik yarışlarına ev sahibliyi vəzifəsini də öhdəsinə götürür. Ənvər Özərən daha sonra bir sıra dövlət qurumları arasında qurulmuş əməkdaşlıqdan razılıq hissi ilə danışaraq rəhbərlik etdiyi şirkətin "Azərbaycan Beynəlxalq Təhsil Mərkəzi" İctimai Birliyinin təsisçiləri sırasına qoşulmasından məmnun olduğunu bildirdi. Ənvər Özərən onlara göstərilən diqqət və qayğıya görə ölkə başçısı cənab İlham Əliyevə minnətdarlıq etdi.

Çıxış üçün söz alan Milli Məclisin deputatı Qənirə Paşayeva, ekologiya və təbii sərvətlər nazirinin müavini Firdovsi Əliyev, Azərbaycan Respublikası Dövlət Neft Şirkətinin vitse-prezidenti Rəfiqə Hüseynzadə də beynəlxalq layihə olimpiadasının məktəblilərin həyatındakı mühüm rolundan, qloballaşan dünyamızda ekologiyanın hər kəs tərəfindən qorunmasının vacibliyindən danışdılar. Qeyd etdilər ki, məktəblilərin təqdim etdikləri və dünyanın müxtəlif ölkələrindən dəvət olunan mütəxəssis və professor heyəti tərəfindən qiymətləndirilən layihələr müasir təhsil sistemi sayəsində bugünkü gənclərin mühüm ekoloji problemlərin həllinə qadir olduqlarını göstərdi. Olimpiadanın yüksək səviyyədə keçirildiyini söyləyən natiqlər qaliblərə yeni-yeni nailiyyətlər arzuladılar.

Mərasimdə Azərbaycan məktəbliləri ilə yanaşı, xarici ölkələrin şagirdlərinin doğma dilimizdə ifa etdikləri şeir və mahnılar isə əsl bayram ab-havası yaratdı, onların çıxışları iştirakçılar tərəfindən alqışlarla qarşılandı.

Samirə KƏRİMOVA

Azərbaycan müəllimi.- 2013.- 12 aprel.- S.2.