Azərbaycanlı alim beynəlxalq konfransdan qayıdıb

Bu yaxınlarda Ukraynanın paytaxtı Kiyev şəhərində M.P.Draqomanov adına Milli Pedaqoji Universitetində beynəlxalq elmi-təcrübi konfrans keçirilmişdir. Astara Pedaqoji Kollecinin direktoru, fəlsəfə doktoru, əməkdar müəllim, dosent Əlihəsən Həmzəyev və kollecin müəllimi Azər Fərəməzov konfransda iştirak etmişlər.

Konfrans "Beynəlxalq diplomdansonrakı təhsilin aktual problemləri: vəziyyəti və inkişaf perspektivləri" kimi əhəmiyyətli bir mövzuya həsr edilmişdi. 30-a yaxın xarici ölkədən və Ukraynanın 50-dən artıq ali təhsil müəssisəsindən olan görkəmli alimlər arasında iki gün ərzində mövzu ətrafında müzakirələr getmişdir. Mütəxəssislər fikirlərini bölüşmüş, praktik olaraq dərslərdə iştirak etmiş və təcrübə mübadiləsi aparmışlar.

Milli Pedaqoji Universitetin Yenidənhazırlanma və Pedaqoji Kadrların İxtisasının Artırılması İnstitutunun mərkəzi korpusunun konfrans zalında keçirilmiş plenar iclası giriş sözü ilə universitetin rektoru, fəlsəfə elmləri doktoru, professor, Ukrayna Milli Pedaqoji Elmlər Akademiyasının akademiki, Ukrayna Milli Elmlər Akademiyasının müxbir üzvü Viktor Petroviç Andryuşenko açmış və iştirakçıları salamlamışdır.

Fərəhləndirici haldır ki, konfransın açılış günü həmyerlimiz, fəlsəfə doktoru Əlihəsən Həmzəyevin "Qloballaşma və beynəlxalq təhsilin fəlsəfi problemləri" mövzusunda məruzə-təqdimatı dinləyicilərin böyük marağına səbəb olmuşdur. Məruzə-təqdimatda Azərbaycan və Ukrayna xalqlarının dostluq əlaqələrindən, müasir Azərbaycan dövlətinin son dövrlərdə beynəlxalq arenada əldə etdiyi uğurlardan və təhsil sahəsində qazanılan nailiyyətlərdən bəhs olunmuşdur. Məruzəçi xüsusilə vurğulamışdır ki, cəmiyyətin inkişafı konsepsiyasını və təhsil sahəsində onun innovativ modelini ilk dəfə yeni, müstəqil Azərbaycanın qurucusu və memarı ulu öndər Heydər Əliyev yaratmışdır. Ulu öndərin siyasi kursunu uğurla davam etdirən Azərbaycan Respublikasının Prezidenti cənab İlham Əliyevin titanik fəaliyyəti nəticəsində istər siyasi və iqtisadi sahədə, istərsə də elm və təhsil sahəsində böyük uğurlar əldə edilmişdir. Azərbaycan təhsilinin uğurları barədə hazırlanmış videoçarx iştirakçıların nəzərinə çatdırılmışdır. Videoçarxda həmçinin Astara Pedaqoji Kollecində görülmüş işlərdən, tədris-maddi bazanın vəziyyətindən, kollecin beynəlxalq əlaqələrindən, müxtəlif illərdə keçirilmiş beynəlxalq konfranslardan hazırlanmış foto və videomateriallar iştirakçıların dərin marağına səbəb olmuşdur.

Konfransda Ə.Həmzəyevə fəal iştiraka, maraqlı və aktual məruzəyə görə M.P.Draqomanov adına Milli Pedaqoji Universitetinin xatirə medalı və sertifikatı təqdim edildi. Xoş təəssüratla vətənə qayıdan Ə.Həmzəyev səfər təəssüratlarını bölüşərək bildirdi ki, kollecin beynəlxalq əlaqələrini bundan sonra da genişləndirmək istiqamətində əhəmiyyətli işlər aparılacaqdır. Biz orada xeyli dostlar tapdıq və onların da Azərbaycana - Astaraya gəlmələri üçün əməli addımlar atacağıq.

Azad ABDULLAYEV

Azərbaycan müəllimi.- 2013.- 19 aprel.- S.4.