"Həyatının təhlükəsizliyi sənin öz əlindədir"

Bu günlərdə Ağcabədi rayonunun Hacıbədəlli kənd orta məktəbində Fövqəladə Hallar Nazirliyinin (FHN) Qarabağ Regional Mərkəzi tərəfindən "Həyatının təhlükəsizliyi sənin öz əlindədir" adlı maarifləndirmə tədbiri keçirilib.

Tədbirin məqsədi şagirdlərin fərdi təhlükəsizlik sahəsində biliklərini təkmilləşdirmək, onları təbii və texnogen xarakterli fövqəladə hadisələr zamanı düzgün davranış qaydaları ilə tanış etmək, həmçinin təhsil müəssisələrində, məişətdə müvafiq təhlükəsizlik vərdişləri aşılamaqdır.

Məktəb kollektivinin iştirak etdiyi tədbirdə FHN-nin əməkdaşları təmsil etdikləri qurumun fəaliyyəti, regional mərkəzin iş prinsipləri və maddi-texniki bazası haqqında geniş məlumat veriblər. Çıxış edənlər fövqəladə hallar zamanı davranış qaydaları, yanğın təhlükəsizliyi, dəm qazından qorunmaq və dəm qazı ilə zəhərlənmə zamanı ilkin yardım, regionda ehtimal edilən fövqəladə hallar, "112" qaynar telefon xəttinin əhəmiyyəti və digər məsələlər barədə də ətraflı danışıblar. Məktəb kollektivinə həmçinin zəlzələ, tufan, qasırğa zamanı və radioaktiv maddələrlə çirklənmiş ərazidə davranış qaydaları əyani vəsaitlərin köməyi ilə izah olunub.

Tədbirdə sonra şərti dəm qazı ilə zəhərlənmiş şəxsə ilkin tibbi yardım qaydaları əyani şəkildə göstərilib, bununla bağlı videoçarx nümayiş etdirilib.

Sonda məktəblilərə "FHN Qarabağ Regional Mərkəzi xəbərdarlıq edir: Dəm qazı təhlükəsindən uzaq olun!" adlı bukletlər paylanılıb və mütəxəssislər tərəfindən onları maraqlandıran suallar cavablandırılıb.

Samirə KƏRİMOVA

Azərbaycan müəllimi.- 2013.- 20 dekabr.- S.13.