Təhsil Problemləri İnstitutunda

elmi şuranın iclası keçirilib

Dekabrın 17-də Təhsil Problemləri İnstitutu elmi şurasının iclası olmuşdur. İnstitutun direktoru Qulu Novruzov Azərbaycan Respublikası təhsil nazirinin institutun elmi şurasının tərkibindəki dəyişikliklər barədə əmri ilə elmi şura üzvlərini tanış etmiş və onlara uğurlar arzulamışdır. Sonra Q.Novruzov elmi şuranın gündəliyində dayanan bir məsələ - Azərbaycan Respublikası Prezidentinin 24 oktyabr 2013-cü il tarixli "Azərbaycan Respublikasında təhsilin inkişafı üzrə Dövlət Strategiyası"nın təsdiq edilməsi haqqında" sərəncamı və institutun qarşısında duran vəzifələr barədə çıxış etmişdir. Bildirilmişdir ki, ölkəmizdə həyata keçirilən islahatlar onun bütün sahələrində inkişafın sürətləndirilməsi, Avropaya inteqrasiya olunması, eləcə də dünyanın ən inkişaf etmiş ölkələrinin səviyyəsinə yüksəldilməsi istiqamətinə yönəlmişdir.

Bu gün təhsil sahəsində görülən işlər ölkənin sosial, iqtisadi həyatında baş vermiş böyük dəyişikliklərin uğurlu nəticələri kimi davam etdirilməklə XXI əsrin möhtəşəm çağırışları qarşısında özünün növbəti mərhələsini gözləyir. "Azərbaycan Respublikasında təhsilin inkişafı üzrə Dövlət Strategiyası" bu baxımdan vaxtında qəbul edilmiş dövlət sənədi kimi xüsusi əhəmiyyət daşıyır. Orada təhsil sahəsində görülmüş işlərə qiymət verilməklə müəyyən olunmuş dövr üçün qarşıda duran vəzifələrdən, konkret olaraq həyata keçirilən tədbirlərdən danışılır.

Natiq bildirmişdir ki, Dövlət Strategiyası dünya ölkələri sırasında aparıcı mövqe tutan, səriştəli müəllim və təhsil menecerlərinə, qabaqcıl texnologiyalara əsaslanan infrastruktura malik təhsil sisteminin yaradılması məqsədi ilə beş strateji istiqamətdə tədbirlərin həyata keçirilməsini nəzərdə tutur. Onlardan birincisi, səriştələrə əsaslanan nəticəyönlü məzmunun yaradılması, ikincisi, yeni məzmunun səmərəli mənimsənilməsini təmin edəcək yüksək nüfuzlu təhsilverənlərin formalaşdırılması, üçüncüsü, yeni idarəetmə sisteminin formalaşdırılması, dördüncüsü, müasir tələblərə cavab verən və ömürboyu təhsili təmin edən təhsil infrastrukturunun yaradılması, nəhayət, yeni maliyyələşdirmə mexanizminin yaradılması.

Natiq hər bir strateji istiqamət üzrə hədəflərdən, nəzərdə tutulmuş müvafiq tədbirlərdən bəhs etmişdir. Eyni zamanda bu məsələlər baxımından Təhsil Problemləri İnstitutunun üzərinə düşən vəzifələri şərh etmişdir. Təhsilin yeni məzmunu, strategiyaları, qiymətləndirmə sistemi, idarəetmə mexanizmləri ilə bağlı nəzəri və tətbiqi xarakterli elmi-pedaqoji araşdırmaların aparılmasını, yeni təhsil sisteminin formalaşdırılmasında, onun elmi-nəzəri əsaslarının öyrənilməsində institutun müvafiq strukturlarının üzərinə ciddi vəzifələrin düşdüyünü xüsusi olaraq vurğulanmışdır. Strateji hədəflər baxımından yeni vəzifələrin həyata keçirilməsi üçün institutda struktur dəyişikliklərinin aparılmasına, onun kadr potensialının möhkəmləndirilməsi və inkişaf etdirilməsinə ehtiyac olduğu bildirilmişdir.

Daha sonra institutun ayrı-ayrı mərkəzlərinin illik hesabatları dinlənilmiş, elmi müxbirliyə qəbul olunmaq üçün müraciətlərə baxılmışdır. Tamamlanmış iki doktorluq dissertasiyasının müdafiəyə buraxılması barədə qərar qəbul olunmuş, elmi əməkdaşların müvafiq vəzifələrə seçilməsi ilə bağlı məsələlər müzakirə edilmişdir.

İlham CAVADOV,

Təhsil Problemləri İnstitutu

Kurikulum Mərkəzinin koordinatoru

Azərbaycan müəllimi.- 2013.- 20 dekabr.- S.13.