Şuşa RTŞ metodkabinetinin müdiri

Rəsmiyyə Məmmədovanın çıxışı

Hörmətli qurultay nümayəndələri!

Hörmətli qonaqlar!

Müstəqil Azərbaycan dövlətinin qurucusu, dunya azərbaycanlılarının ümummilli lideri, dahi şəxsiyyət Heydər Əliyevin adını daşıyan bu möhtəşəm Mərkəzdə keçirilən Azərbaycan müəllimlərinin XIV qurultayında çıxış etmək üçün mənə söz verildiyinə görə hədsiz qürur və sevinc hissləri keçirirəm.

Qurultayımız Azərbaycan təhsilinin taleyüklü problemlərinin həll olunduğu mühüm bir dövrə təsadüf edir. Möhtərəm Prezidentimiz İlham Əliyevin Sərəncamı ilə təsdiq edilmiş tarixi əhəmiyyətə malik "Azərbaycan Respublikasında təhsilin inkişafı üzrə Dövlət Strategiyası" sənədində getdikcə qloballaşan müasir dünyamızda təhsilin prioritetliyi və müstəsna rolu bir daha təsdiqlənməklə XXI əsr Azərbaycan təhsilinin inkişaf istiqamətləri uzaqgörənlıklə müəyyənləşdirilmişdir.

Biz hamımız hörmətli nazirimiz Mikayıl Cabbarovun qurultay iştirakçılarına ünvanlanan analitik təhlil üzərində qurulmuş dərin məzmunlu məruzəsini diqqətlə dinlədik. Heç şübhəsiz, bu məruzə ümumi ruhu və mahiyyəti ilə yerli təhsil orqanları və təhsil müəssisələrinin rəhbərləri, bütövlükdə hər bir təhsil işçisi üçün perspektiv proqram xarakteri daşıyır.

Hörmətli qurultay iştirakçıları!

Dövr və zamanın tələblərinə görə ümumi təhsilin qarşısında duran məqsəd və vəzifələr bu və ya digər dərəcədə dəyişsə də bütün dövrlər üçün bir məqam dəyişilməz qalmaqdadır. O da ülvi məqsədlərin ən alisi sayılan uşaq və gənclərin vətənpərvərlik və vətəndaşlıq tərbiyəsidir.

Ulu öndər Heydər Əliyev təhsilə, təhsilin aktual problemlərinə həsr olunmuş konseptual səciyyə daşıyan çıxış və nitqlərində böyüməkdə olan gənc nəslin vətənpərvər ruhda tərbiyə edilməsini daim ön plana çəkir, bu nəcib amalı təhsilin başlıca vəzifəsi kimi dəyərləndirirdi. Hesab edirəm ki, bu məqamda ulu rəhbərimizin bütün təhsil işçilərinə örnək olan çoxsaylı müdrik fikirlərindən bir neçəsini xatırlatmaq yerinə düşərdi. Ulu öndər deyirdi: "Təhsilimizin ən böyük məqsədi Azərbaycan vətəndaşı hazırlamaqdır, müstəqil Azərbaycan cəmiyyətinin ləyaqətli üzvünü hazırlamaqdır. Məktəbdə vətənpərvərlik tərbiyəsi işini təkmilləşdirmək, onun forma və metodlarının rəngarəngliyinə çalışmaq, yüksək səmərəliliyinə nail olmaq lazımdır. Hər bir gənc vətəndaş öz ölkəsinin alovlu vətənpərvəri olmalıdır".

Dahi Heydər Əliyev siyasi-ideoloji kursunun layiqli davamçısı, Azərbaycan Respublikasının Prezidenti cənab İlham Əliyevin ölkəmizin ictimaiyyətinə müraciətlə söylədiyi "Biz istəyirik ki, gənc nəsil bilikli, savadlı olsun, eyni zamanda vətənpərvərlik ruhunda tərbiyə alsın...Vətənə bağlılıq, Vətən sevgisi mütləq yüksək səviyyədə olmalıdır. Ümid edirəm ki, bizim bütün məktəblərimizdə vətənpərvərlik mövzusu daim gündəlikdədir. Vətənə bağlılıq, sevgi, peşəkar və yüksək biliyə malik olmaq - bunlar ölkəmizi qabağa aparacaqdır" müddəası, heç şübhəsiz, müasir dövrdə təhsilimizin məqsədinin və fəlsəfi mahiyyətinin parlaq ifadəsidir.

Ulu öndərin adını daşıyan Heydər Əliyev Fondunun prezidenti, Milli Məclisin deputatı Mehriban xanım Əliyevanın vətənimizin tarixinə həssas münasibəti xüsusi qeyd olunmalıdır. Mehriban xanım Əliyeva ölkəmizdə və dünyada mədəniyyətə, idmana qayğı ilə yanaşan, elm, təhsil, səhiyyə sahələrində respublikada və beynəlxalq miqyasda böyük işlər görən bir insan kimi tanınır.

Heydər Əliyev Fondunun təşkil etdiyi və 2009-cu ildən keçirilən respublika muğam müsabiqəsi və Beynəlxalq Muğam Festivalı həm Azərbaycanda muğam sənətinə üz tutan gənclərin sayını artırıb, həm də milli muğam musiqimizi dünyaya tanıdıb. Mehriban xanım Əliyevanın maddi və qeyri-maddi mədəni dəyərlərimizin bərpası, qorunması və təbliği sahəsində zəngin və hərtərəfli fəaliyyəti vətənə, xalqa məhəbbətin bariz nümunəsidir.

Hörmətli qurultay iştirakçıları!

2013-2014-cü dərs ili hamımız üçün əlamətdar, yaddaqalan bir hadisə ilə başladı. Bu dərs ilindən etibarən məktəblərimizdə ilk dərsin "Mənim Vətənim-doğma yurdum"mövzusuna həsr edilməsinə dair hörmətli nazirimizin əmri uşaq və gənclərdə vətənpərvərlik əzminin və Vətən təəssübünün gücləndirilməsi amilinin heç bir vaxt aktuallığını itirməyən taleyüklü vəzifə olduğunu təhsil ictimaiyyətinə bir daha xatırlatdı.

Hörmətli qurultay iştirakçıları!

Mən bu əlamətdar tədbirdə Şuşa rayonunu təmsil edənlər sırasındayam. Məcburi köçkünlük həyatı yaşamaq bəlkə də maddi tərəfdən deyil, daha çox mənəvi cəhətdən ağırdır. Bizlərə ruh verən, ölkəmizdə hökm sürən coşqun fəaliyyət tempindən kənarda qalmamağa sövq edən əsas amil dövlət başçımız cənab İlham Əliyev tərəfindən işğal altında olan torpaqlarımızın düşmən ünsürlərdən azad edilməsi uğrunda məqsədyönlü və ardıcıl tədbirlərin həyata keçirilməsi, bu yolda göstərdiyi qətiyyət və siyasi uzaqgörənlikdir. Möhtərəm Prezidentimizin yürütdüyü dinamik siyasət nəticəsində ölkəmizin iqtisadi qüdrətinin ilbəil artması, milli ordumuzun durmadan güclənməsi, Azərbaycanın beynəlxalq aləmdə siyasi nüfuz dairəsinin getdikcə genişlənməsi düşmən üzərində qələbəmizi, doğma Qarabağımızın azad ediləcəyi anı günbəgün yaxınlaşdırır. Belə bir şəraitdə, ölkəmizin yağı düşmənlə üz-üzə durduğu bir vəziyyətdə gənclərimizin vətənpərvərlik ruhunda tərbiyəsinin prioritet mahiyyət daşıması inkaredilməz həqiqət kimi meydana çıxır.

Bu gün ümumi təhsilin məzmun istiqamətlərini şərtləndirən didaktik prinsiplərdən danışılarkən onun nəticəyönlü və tələbatyönlü olması ilə yanaşı, həm də şəxsiyyətyönlü keyfiyyəti ön plana çəkilir. Əlbəttə, şəxsiyyətin bütövlüyünü təyin edən çox amillər mövcuddur, lakin onların arasında ən vacibi Vətənə, doğma torpağa bağlılıq xüsusiyyətidir. Güman edirəm ki, görkəmli şairimiz Abbas Səhhətin ürəkləri riqqətə gətirən "Vətəni sevməyən insan olmaz, olsa ol şəxsdə vicdan olmaz" misraları, əslində, bütün dövrlər üçün danılmaz həqiqət, əbədi çağırışdır.

Hazırda təhsilin inkişafı üzrə Dövlət Strategiyasında irəli sürülən tələblərə uyğun olaraq, digər həlli vacib məsələlərlə bərabər, məktəbəqədər və ümumi təhsilin dövlət standartlarının və fənn kurikulumlarının təkmilləşdirilməsi və yeniləşdirilməsi istiqamətində işlərə başlanmışdır. Elə bilirəm ki, bu sənədlər hazırlanarkən istər məktəbəqədər, istərsə də ümumi təhsilin məzmununda vətənpərvərlik komponentinin daha da gücləndirilməsi diqqət mərkəzinə çəkilməlidir. Eyni zamanda bütün fənlərin, xüsusilə Azərbaycan tarixi, coğrafiya, ədəbiyyat fənlərinin məzmununda vətənpərvərlik tərbiyəsinin mühüm tərkib hissəsi olan milli iftixar hissinin şagirdlərə təlqin edilməsi ciddi nəzərə alınmalıdır.

Həm də sirr deyil ki,şagirdlərin bir çoxu əksər hallarda yaşadıqları ərazidən kənara çıxmaq imkanına malik olmadıqlarından ölkəmizin ayri-ayrı bölgələri, bu bölgələrdəki flora və fauna, mədəni abidələr, tarixi məkanlar haqqında təsəvvürləri məhdud olur. Halbuki Vətənin özəlliklərini öz gözləri ilə görmək, onun gözəllikləri ilə mənəvi təmasda olmaq şagirdlərdə böyük ruh yüksəkliyi, iftixar hisslərinin yaranmasında mühüm amildir. Ona görə də ümumtəhsil məktəblərinin tədris planlarına məqsədli ekskursiyaların daxil edilməsi və bu tədbirlərin təşkili üçün maliyyə imkanlarının axtarılması məqsədəuyğun olardı.

Bu yerdə bir məqamı xatırlatmaq istərdim. Bir neçə il bundan əvvəl Təhsil Nazirliyinin təşəbbüsü ilə ümumtəhsil məktəblərinin şagirdləri arasında "Mən Vətənim, yaşadığım şəhər (kənd, qəsəbə) haqqında nələri bilirəm" mövzusunda inşa müsabiqəsi keçirilmişdi. Bu əhəmiyyətli bir tədbir idi, həm də ona görə ki, şagirdləri tədqiqatlar aparmağa sövq edirdi. O vaxt bu inşaların nəticələrinə görə məlum olmuşdu ki, şagirdlərin bir çoxu hətta öz yaşadıqları yerin tarixi, coğrafiyası və digər özəllikləri barədə dolğun təsəvvürə malik deyillər. Bu, əlbəttə, düşündürücü bir haldır və güman edirəm ki, maarifləndirmə xarakteri daşıyan bu tipli tədbirlərin və layihələrin gələcəkdə davam etdirilməsi çox vacibdir. Həm də təklif edərdim ki, xüsusi bir layihə çərçivəsində ölkəmizin hər bir bölgəsinin tarixini, coğrafiyasını, flora və faunasını, mədəni abidələrini, görkəmli şəxsiyyətlərini əhatə edən təlim materiallarının hazırlanması işi təşkil olunsun və fakültativlər formasında məktəblərdə tədris edilsin. Bu bütün şagirdlər, xüsusilə də məcburi köçkün rayonlarının şagirdləri üçün müstəsna əhəmiyyət kəsb edərdi.

Gənclərimizin vətənpərvərlik tərbiyəsi, şübhəsiz, bir çox amillərlə əlaqədardır. Yəqin hamı razılaşar ki, tərbiyə işi sahəsində şəxsi nümunə müstəsna əhəmiyyət kəsb edir.Vətənpərvərlik hissi öz-özünə yaranmır, bunu nəsihət hesabına etmək çox çətindir. Təlimdə əyanilik necə mühüm rola malikdirsə, tərbiyəolunma sisteminin düzgün qurulmasında da fərdi nümunə bir o qədər əhəmiyyətlidir. Bu mənada biz gənclərimizi görkəmli şəxsiyyətlərimizin, Vətən uğrunda qəhrəmanlıq göstərənlərin timsalında tərbiyə etməliyik. Milli Qəhrəmanımız Mübariz İbrahimovun qısa, lakin şərəfli həyat yolu vətənini, millətini, xalqını sevən hər bir Azərbaycan gənci üçün örnək olmalıdır. Mübariz İbrahimov bütün Azərbaycan gəncliyinə nümunədir.

Bəlkə də bu hələlik bir arzudur, ancaq bir anlıq təsəvvür edəndə ki, şagirdlər hər gün məktəblərin qarşısında Vətən uğrunda döyüşlərdə canlarını qurban vermiş insanların şərəfinə qurulan rəmzi əbədi məşəl abidəsinin önündən keçib onların xatirəsini yad etməklə məktəbə daxil olurlar, hesab edirəm ki, onlar üçün bundan ibrətamiz və duyğulu mənzərə ola bilməz.

Hörmətli qurultay nümayəndələri!

Fürsətdən istifadə edərək bir məsələyə toxunmaq istəyirəm. Məlumdur ki, vətənpərvərlik tərbiyəsində kütləvi informasiya vasitələrinin rolu müstəsna əhəmiyyət kəsb edir. Çox arzu edərdik ki, xüsusilə televiziya kanallarında gənclərimizin mənəvi tərbiyəsinə, vətənpərvərlik tərbiyəsinə həsr olunmuş verilişlərin sayı üstünlük təşkil etsin. Elə bilirəm, çoxlarının fikrini ifadə etmiş olaram ki, dırnaqarası reytinq gətirən bəzi verilişlərin gənclərimiz üçün heç bir əhəmiyyəti yoxdur.

Çıxışımın sonunda tam əminliyimi bildirmək istəyirəm ki, Azərbaycan dövlətinin, dövlətimizin başçısı cənab İlham Əliyevin müntəzəm diqqət və qayğısı sayəsində Azərbaycan təhsili durmadan inkişaf edəcək, dünya təhsil sistemində öz layiqli yerini tutacaqdır.

Diqqətinizə görə təşəkkür edirəm.

Azərbaycan müəllimi.- 2013.- 20 dekabr.- S.8.