"Məhəbbət əfsanəsi"nin 80

yaşlı müəllifi ilə görüş

Görkəmli bəstəkar, Dövlət mükafatı laureatı, SSRİ və Azərbaycan Respublikasının xalq artisti, AMEA-nın müxbir üzvü, professor Arif Məlikovun 80 yaşı bu ilin sentyabrında tamam olub. Azərbaycan Prezidenti İlham Əliyev bu münasibətlə mədəniyyətimizin inkişafında müstəsna xidmətləri olan tanınmış bəstəkarı ölkənin ali mükafatlarından olan "Heydər Əliyev" ordeni ilə təltif edib. Böyük sənətkara xalq məhəbbətinin təzahürü olaraq ölkənin müxtəlif şəhər və rayonlarında, eləcə də paytaxtımızın təhsil ocaqlarında, mədəniyyət beşiyi Azərbaycan Dövlət Filarmoniyasında bəstəkarın 80 illiyinə həsr olunmuş görüşlər, yubiley tədbirləri keçirilib. Belə tədbirlərdən biri də Arif Məlikova daha doğma olan bir məkanda - Azərbaycan Milli Konservatoriyası nəzdində Musiqi Kollecində dekabrın 24-də təşkil olunmuşdu.

Tədbiri Musiqi Kollecinin direktoru, əməkdar incəsənət xadimi, professor Nazim Kazımov açaraq bu gün təhsil ocağının 1951-ci il məzunu, dünya şöhrətli bəstəkar, "Şöhrət", "İstiqlal", "Heydər Əliyev" ordenli, SSRİ-nin və Azərbaycan Respublikasının xalq artisti, Azərbaycan Milli Elmlər Akademiyasının müxbir üzvü, tanınmış ictimai xadim Arif Məlikovla görüşə toplaşdıqlarını bildirdi və yubilyarı kollektiv adından salamlayıb, 80 illik yubileyi münasibəti ilə təbrik etdi. Arif müəllimin 1933-cü il sentyabrın 13-də anadan olduğunu xatırladan N.Kazımov böyük sənətkarın 70 və 75 illik yubileylərinin də ona doğma olan Musiqi Kollecində qeyd etdiklərini diqqətə çatdırdı.

Müəllim və tələbələrinin Arif Məlikovun həyat yolu və yaradıcılığı, musiqi xəzinəmizi zənginləşdirən çoxsaylı əsərləri haqqında kifayət qədər məlumatlı olduğunu söyləyən kollecin direktoru təkcə bir fakta diqqəti yönəltdi ki, yubilyarın məşhur "Məhəbbət əfsanəsi" baleti indiyədək dünyanın 70-dən çox ölkəsində səhnəyə qoyulub. Bununla belə N.Kazımov görkəmli sənətkarın həyat və yaradıcılıq yolunun bəzi nüanslarına diqqəti yönəldərək bildirdi ki, Arif Məlikov 1951-ci ildə o vaxtlar Asəf Zeynallı adına musiqi məktəbi adlanan Musiqi Kollecinin tar sinfini bitirmiş və 1 il Şuşada işlədikdən sonra Azərbaycan Dövlət Konservatoriyasına qəbul olunaraq məşhur bəstəkar Qara Qarayevin sinfində təhsil almışdır.

N.Kazımov A.Məlikovun görkəmli bəstəkar olmaqla yanaşı, həm də gözəl bir müəllim kimi musiqi kadrlarının hazırlanmasında uzun illər səmərəli fəaliyyət göstərdiyini, onlarca istedadlı tələbə yetişdirdiyini, onların bir qisminin bugünkü görüşdə də iştirak etdiyini bildirdi.

Nazim Kazımov Arif Məlikovun genişmiqyaslı ictimai fəaliyyətindən də söz açaraq 1990-cı ildə xalqımıza qarşı törədilmiş 20 Yanvar qırğını zamanı onun SSRİ Ali Sovetinin deputatı kimi faciəni törədənlərə qarşı çıxmasından, o vaxtkı SSRİ rəhbərləri ilə görüşlərində onları cəsarətlə tənqid edib, faciənin baiskarı adlandırmasından, 20 Yanvar hadisələri zamanı neçə-neçə Azərbaycan oğullarını təhlükədən qurtarmasından danışdı, onun qələmindən çıxmış "Ya obvinyayu" kitabının bu hadisələrin dünya ictimaiyyətinə çatdırılmasında mühüm rol oynadığını vurğuladı.

Sonra uzun müddət Salyan Rayon Mədəniyyət Şöbəsinin müdiri işləmiş Fərəc Dadaşova çıxışında Arif Məlikovu böyük sənətkar, dünya miqyasında tanınan bəstəkar kimi səciyyələndirərək onun Azərbaycan klassik musiqisinin beynəlxalq aləmdə tanınmasında mühüm xidmətləri olduğunu, bir həmyerliləri kimi təkcə Salyan əhalisinin deyil, bütün ölkə ictimaiyyətinin onunla fəxr etdiyini bildirdi.

Yubilyarla bağlı bəzi xatirələrini dilə gətirən natiq işinin çox olmasına baxmayaraq Salyana gələndə Arif Məlikovun onların fəaliyyəti ilə yaxından maraqlandığını, hətta mədəniyyət şöbəsinin nəzdindəki ansambllara dirijorluq etdiyini, ansambl üzvlərinə dəyərli məsləhətlər verdiyini söylədi. Böyük bəstəkarı yubileyi və "Heydər Əliyev" ordeni ilə təltif olunması münasibəti ilə təbrik edən F.Dadaşov ona cansağlığı və daha uzun ömür arzuladı.

Mərasimdə Arif Məlikovun tələbəsi olmuş Musiqi Kollecinin müəllimi Sevinc Seyidova da çıxış edərək müəllimini təbrik etdi, onun barəsində ürək sözlərini söylədi. O bildirdi ki, dünya musiqi mədəniyyətinin görkəmli simalarından biri olan Arif Məlikovun sinfində oxumaq xoşbəxtliyinin ona da nəsib olduğunu deyərək, təhsil aldığı illərdə Arif Məlikovu gözəl bəstəkar, gözəl pedaqoq, gözəl insan kimi tanıdığını, çətin işlərində müəlliminin ona həmişə atalıq qayğısı göstərdiyini diqqətə çatdırdı, həmin illərdən bəzi xatirələri görüş iştirakçıları ilə paylaşdı.

Daha sonra yubiley tədbiri kollecin tələbələrinin ifasında maraqlı konsert proqramı ilə davam etdi. Kollecin müxtəlif kurslarında təhsil alan tələbələr Arif Məlikovun əsərlərini, xüsusən də məşhur "Məhəbbət əfsanəsi" baletindən səhnələri, bəstəkarın mahnılarını məharətlə təqdim etdilər.

Konsertdən sonra Arif Məlikov görüş iştirakçıları qarşısında çıxış edərək həyat və yaradıcılıq yolunun bəzi məqamlarından, əsərlərinin səhnəyə qoyulması ilə bağlı xarici ölkələrə etdiyi çoxsaylı səfərlərdən, bu səfərlərdə qarşılaşdığı maraqlı hadisələrdən söz açdı, tələbələrə vaxtlarını boş keçirməməyi, daim oxumağı, öyrənməyi, öz üzərlərində çalışmağı tövsiyə etdi, xatirələrini danışdı.

Sonda görkəmli sənətkarla xatirə şəkli çəkdirildi.

Yusif ƏLİYEV

Azərbaycan müəllimi.- 2013.- 27 dekabr.- S.3.