"Sabahın alimləri" II Respublika müsabiqəsinə hazırlıq mərhələsi davam edir

Bu ilin may ayında ABŞ-ın Arizona ştatında keçiriləcək İntel İSEF - Beynəlxalq Elm və Mühəndislik Sərgisinə seçim turu olan "Sabahın alimləri" II Respublika müsabiqəsi 8-9 fevral tarixlərində Bakı şəhərində təşkil olunacaqdır. Müsabiqənin təşkilatçıları Azərbaycan Respublikasının Təhsil Nazirliyi, Gənclər və İdman Nazirliyi və "Mədəd" təşkilatıdır.

Qaydalara görə, müsabiqədə Bakı və Sumqayıt şəhərlərində yerləşən ümumi təhsil müəssisələrinin IX-XI sinif şagirdləri öz tədqiqat layihələri ilə iştirak edə bilərlər. Müsabiqədə iştirak etmək istəyən şagirdlər "Sabahinalimleri.edu.az" saytında online rejimdə qeydiyyatdan keçmiş və artıq öz tədqiqatlarına dair annotasiyalarını təqdim etmişlər. Qeydiyyata alınan şagirdlərin sayı 160-dan artıqdır. Hazırda Bakı Dövlət Universitetinin dosenti İsmət Əhmədovun rəhbərlik etdiyi və tərkibinə müxtəlif ali təhsil müəssisələrinin alimləri daxil olan müsabiqənin Elmi Ekspertiza Komitəsi tərəfindən həmin annotasiyaların qiymətləndirilməsi başa çatmaqdadır. Müsabiqəyə buraxılan şagirdlərin adları "Sabahinalimleri.edu.az" saytında yerləşdiriləcəkdir. Hazırda şagirdlərin müsabiqəyə hazırlıq mərhələsi davam edir. Bu işdə, əlbəttə ki, müəllimlərin rolu böyükdür. Müsabiqə ərəfəsində şagirdlərin elmi rəhbərləri onlara daha çox vaxt ayırır, onların layihə təqdim etməsi və posterin hazırlanması bacarıqları üzərində dönə-dönə işləyirlər.

Müsabiqənin təşkilatçılarından biri olan Azərbaycan Respublikasının Təhsil Nazirliyi də şagirdlərin müsabiqəyə hazırlaşdırılmasını diqqət mərkəzində saxlayır. Bu hazırlığın daha səmərəli təşkil olunması məqsədi ilə Azərbaycan Respublikasının Təhsil Nazirliyi Doğu Akdeniz Universiteti (Şimali Kipr Türk Respublikası) ilə birgə layihə hazırlayıb həyata keçirir. Həmin layihədə müsabiqənin Elmi Ekspertiza Komitəsi tərəfindən seçilmiş 30 nəfər (hər biri 15 nəfərdən ibarət olan iki qrup) Azərbaycan məktəblisinin "Sabahın alimləri" Respublika müsabiqəsindən öncə, bu müsabiqənin qalibləri sırasından seçilmiş 15 nəfərin isə İntel İSEF-ə hazırlıq dövründə Doğu Akdeniz Universitetində xüsusi treninqlərdən keçməsi nəzərdə tutulur. Layihə uğurla həyata keçirilməkdədir. Seçilmiş şagirdlərdən ibarət birinci qrup 21-26 yanvar tarixlərində Təhsil Nazirliyinin əmrilə Doğu Akdeniz Universitetinə ezam olunmuşdu. Sagirdlərimizlə Doğu Akdeniz Universitetinin aparıcı alimləri, o cümlədən professorlar Ozan İnamlık, Con Eldridc, Cem Tanova və başqaları məşğul olmuşlar.

Treninqlər Doğu Akdeniz Universitetinin Konqres və Mədəniyyət Mərkəzində keçirilirdi. Birinci gün DAU-nun rektoru, professor Abdullah Y.Oztoprak, rektorun Azərbaycan üzrə müşaviri İmran Muxtarov, Azərbaycan Respublikası Təhsil Nazirliyi Elm şöbəsinin müdiri Gültəkin Hüseynova, Şimali Kipr Türk Respublikasının təhsil və gənclər naziri Mutlu Atasayan və Doğa Liseyinin müdiri Beran Tanseloğlunun iştirakı ilə mətbuat konfransı keçirildi.

Sonra rəsmi açılış mərasimi oldu. DAU-nun rektoru, professor Abdullah Y.Oztoprak və digər rəsmilər treninqlərin açılışı münasibətilə şagirdləri təbrik edib onlara uğurlar dilədilər. Açılış mərasimində Doğa Liseyinin şadirdləri də iştirak edirdi.

İlk məşğələ "Fərdi reputasiyanın qurulması və idarə edilməsi" mövzusuna həsr olundu. Məşğələdən sonra Azərbaycan nümayəndələrini ŞKTR-nın təhsil, gənclər və idman naziri Mutlu Atasayan qəbul etdi.

Həmin günün sonunda isə Şimali Kipr Türk Respublikasının Prezidenti cənab Dərviş Eroğlu ilə rəsmi görüş keçirildi.

İkinci günün məşğələləri "Effektiv təqdimatın yolları", "Tənqid və dəyərləndirmə" mövzularına həsr edildi. Məşğələlərdən sonra DAU-nun rektoru, professor Abdullah Y.Oztoprakla görüş oldu.

Sonrakı məşğələlər "Mədəniyyətlərarası ünsiyyətin normaları" və "Bədən dili, jestlər" mövzularına, eləcə də layihələrin ingilis dilində təqdim olunmasına həsr olundu.

Hər gün məşğələlərdən sonra şagirdlər üçün ekskursiyalar təşkil olunurdu. Belə ki, onlar Lefkoşa, Famaqusta və Girne şəhərləri, qədim Salamis şəhərinin xarabalıqları ilə tanışlıq ekskursiyalarında oldular.

Treninqlərin sonuncu günü iştirakçılara sertifikatların təqdimetmə mərasimi keçirildi.

Hazırda Azərbaycan məktəblilərinin ikinci qrupu Doğu Akdeniz Universitetində təşkil olunan treninqlərdə iştirak edir. Ümidvarıq ki, bu treninqlər bizim məktəblilərin "Sabahın alimləri" müsabiqəsinə daha keyfiyyətli hazırlaşmasına xidmət edəcək, eyni zamanda Azərbaycan məktəbləri ilə Şimali Kipr Türk Respublikasının məktəbləri arasında dostluq və əməkdaşlıq əlaqələrinin yaradılmasına öz töhfəsini verəcək.

Azərbaycan müəllimi.- 2013.- 1 fevral.- S.3.